انشاء اللہ خان انشا

نہ جان اس کو شبِ مہ یہ چاندنی خانم
کمند نور پہ اوج قمر سے اتری ہے

حیدر علی آتش

ہالے میں ماہ کا ہوتا ہے چکوروں کو یقیں
کبھی انگڑائی جو وہ رشکِ قمر لیتا ہے
کچھ تو ہمیں حقیقت شمس و قمر کھلے
کس کج کلہ کے عشق میں پھرتے ہیں سر کھلے
انصاف کو ہیں دیدۂِ اہلِ نظر کھلے
پردہ اٹھا کہ پردۂِ شمس و قمر کھلے
کیف شرابِ ناب کا انجام ہو بخیر
شلوار بند ساقی رشکِ قمر کھلے

داغ دہلوی

تیور ترے اے رشکِ قمر دیکھ رہے ہیں
ہم شام سے آثار سحر دیکھ رہے ہیں

مصحفی غلام ہمدانی

کیا جاگا ہے یہ بھی ہجر کی شب
زردی سی ہے کیوں رخ قمر پر
خوش طالعی میں شمس و قمر دونوں ایک ہیں
دن رات کا تو فرق ہے پر دونوں ایک ہیں
ایسے گھبرائے کہ حالت نہ رہی کچھ باقی
دیکھ آئے جو اسے شمس و قمر اور کہیں
تو جو بے پردہ ہو منہ غیر کو دکھلاتا ہے
پاس میرا بھی کچھ اے رشکِ قمر ہے کہ نہیں

مصطفٰی خان شیفتہ

اے شیفتہ نوید شبِ غم سحر ہے آج
ہم تاب آفتاب، فروغِ قمر ہے آج
پروانوں کا دماغ بھی ہے آسمان پر
نورِ چراغ میں جو فروغِ قمر ہے آج
پروانہ ہو گیا ہے رقیبِ کتاں کہ ہے
اس مہر وش کے جلوے کے آگے قمر چراغ

باقی صدیقی

میں رات اداس ہو گیا تھا
اتنی تھی روشنی قمر کی
خورشید و قمر بھی دیکھ لیں گے
یہ راہگزر بھی دیکھ لیں گے

جگر مراد آبادی

کھیل ہے بازیچۂ شام و سحر میرے لیے
دو گلِ بازی ہیں یہ شمس و قمر میرے لیے
گرم ہے ہنگامۂ شام و سحر میرے لیے
رات دن گردش میں ہیں شمس و قمر میرے لیے

قمر جلالوی

رات کی رات مجھے بزم میں رہنے دیجیے
آپ دیکھیں گے سحر کو نہ قمر کی صورت
ہر اک سے کہتے ہو کہ وہ مرتا مجھ پر
چاہے کبھی صورت بھی نہ دیکھی ہو قمر کی
یہ بہت اچھا ہوا آئیں گے وہ پہلے پہر
چاندنی بھی ختم جب تک اے قمر ہو جائے گی
لی دی سی اک نگاہ ستاروں پہ ڈال کہ
شرما گئے کہ دیکھ رہا ہے قمر مجھے
داغِ دل اس سے نہ پوچھا حالِ شامِ غم کے ساتھ
تم کو صورت سے وہ شاید اے قمر سمجھا نہیں
ابھی تک یاد ہے کل کی شبِ غم اور تنہائی
پھر اس پر چاند کا ڈھلنا قمر آہستہ آہستہ
جب چاندنی میں آ کے ہوئے تو وہ میہماں
تاروں بھری وہ رات قمر کچھ نہ پوچھیے

عرفان صدیقی

لشکر زمیں پہ جس نے اتارے ہیں رات کے
کھلتا ہوا نشان قمر بھی اسی کا ہے

ادا جعفری

ہر اک دریچہ کرن کرن ہے جہاں سے گزرے جدھر گئے ہیں
ہم اک دیا آرزو کا لے کر بطرز شمس و قمر گئے ہیں

علی سردار جعفری

ڈرا سکی نہ مجھے تیرگی زمانے کی
اندھیری رات سے گزرا ہوں میں قمر کی طرح
یادوں سے تری روشن محراب شبِ ہجراں
ڈھونڈیں گے تجھے کب تک قندیل قمر لے کر
شبوں کی زلف کی روئے سحر کی خیر مناؤ
نگار‌ شمس عروس قمر کی خیر مناؤ

فارغ بخاری

میرا افلاک بھی تسکینِ نظر ہو نہ سکا
تھے وہی شمس و قمر شمس و قمر سے آگے

تلوک چند محروم

لبِ بام آئے تم اور ان کے چہرے ہو گئے پھیکے
قمر نے تم کو خورشید اور ستاروں نے قمر جانا

جوش ملیح آبادی

ہشیار باش ظلمت غم خانۂ حیات
پھر مرکز تجلئ شمس و قمر ہیں ہم
آؤ پھر دھوم سے ہو آج غروب اور طلوع
سنت بندگئ شمس و قمر تازہ کریں

شاد عظیم آبادی

نیلے نیلے رنگ کے اوپر بڑھتی ہی جاتی ہے سفیدی
ہو گئی رنگت زر و قمر کی چونک مسافر رات نہیں ہے

امیر مینائی

فرقت میں یاں سیاہ زمانہ ہے مجھ کو کیا
گردوں پہ آفتاب نہ ہو یا قمر نہ ہو

فراق گورکھپوری

جو الٹ چکے ہیں بساط دہر کو اگلے وقتوں میں بارہا
وہی آج گردشِ بخت ہے وہی رنگ دور قمر بھی ہے

محسن احسان

مجھے تلاش ہمیشہ نئے چراغوں کی تھی
کہ آسمانوں کے شمس و قمر پرانے تھے

نوح ناروی

اے نوحؔ شب ماہ میں پاس اس کو بٹھا کر
کہتا ہوں مرا رشکِ قمر بھی ہے کوئی چیز