انشاء اللہ خان انشا

گالی سہی ادا سہی چینِ جبیں سہی
یہ سب سہی پر ایک نہیں کی نہیں سہی

داغ دہلوی

اس سے کیا خاک ہم نشیں بنتی
بات بگڑی ہوئی نہیں بنتی
تو نے ایسے بگاڑ ڈالے ہیں
ایک کی ایک سے نہیں بنتی

مصحفی غلام ہمدانی

اس مرگ کو کب نہیں میں سمجھا
ہر دم دم واپسیں میں سمجھا
موئے کمر اس کا کیا ہے اے عقل
سمجھا تو مجھے نہیں میں سمجھا

مصطفٰی خان شیفتہ

نہ پوچھو شیفتہؔ کا حال صاحب
یہ حالت ہے کہ اپنے میں نہیں ہے

فیض احمد فیض

شیخ سے بے ہراس ملتے ہیں
ہم نے توبہ ابھی نہیں کی ہے

مرزا رفیع سودا

ایک ہم سے تجھے نہیں اخلاص
گھر بہ گھر تجھ کو ہر کہیں اخلاص

باقی صدیقی

اتنی خموشی
گویا نہیں ہو
جیسا سنا تھا
ویسے نہیں ہو
ہم نے تیور تو بدلتے دیکھے
پھر کہا آپ نے کیا یاد نہیں
دور سے دیکھتے جائیں باقیؔ
زندگی کوئی تماشہ تو نہیں
ترے خیال میں گم ہو گئے ہیں دیوانے
ترے سوا کوئی اب تیری انجمن میں نہیں
رہتے ہیں تصور سے بھی اب دور کہیں لوگ
پہلے سے نہیں ہم کہ وہ پہلے سے نہیں لوگ
آ پہنچا ہے اس نکتے پہ افسانۂ ہستی
کچھ سنتے نہیں آپ تو کچھ کہتے نہیں لوگ

جگر مراد آبادی

کچھ اس ادا سے آج وہ پہلو نشیں رہے
جب تک ہمارے پاس رہے ہم نہیں رہے
عالم جب ایک حال پہ قائم نہیں رہے
کیا خاک اعتبار نگاہ یقیں رہے
میری زباں پہ شکوہ درد آفریں رہے
شاید مرے حواس ٹھکانے نہیں رہے
جا اور کوئی ضبط کی دنیا تلاش کر
اے عشق ہم تو اب ترے قابل نہیں رہے
اس عشق کی تلافیِ مافات دیکھنا
رونے کی حسرتیں ہیں جب آنسو نہیں رہے
صبح تک ہجر میں کیا جانیے کیا ہوتا ہے
شام ہی سے مرے قابو میں نہیں دل میرا

عبدالحمید عدم

مجھ سے چناں چنیں نہ کرو میں نشے میں ہوں
میں جو کہوں نہیں نہ کرو میں نشے میں ہوں
ہم سے چناں چنیں نہ کرو ہم نشے میں ہیں
ہم جو کہیں نہیں نہ کرو ہم نشے میں ہیں

قمر جلالوی

مشیت اے بتو، اللہ کی خالی نہیں ہوتی
خدائی تم نہ کر لیتے اگر دنیا حسیں ہوتی
اثر ہے کس قدر قاتل تری نیچی نگاہوں کا
شکایت تک خدا کے سامنے مجھ سے نہیں ہوتی
نہ رو اے بلبلِ ناشاد مجھ کمبخت کے آگے
کہ تابِ ضبط اب دکھے ہوئے دل سے نہیں ہوتی
شبِ فرقت یہ کہہ کر آسماں سے مر گیا کوئی
سحر اب اس طرح ہو گی اگر ایسے نہیں ہوتی
قسم کھاتے ہو میرے سامنے وعدے پہ آنے کی
چلو بیٹھو وفا داروں کی یہ صورت نہیں ہوتی
ترے کوچے کے باہر یہ سمجھ کر جان دیتا ہوں
کہ مرتا ہے جہاں کوئی وہیں تربت نہیں ہوتی
شبِ مہتاب بھی تاریک ہو جاتی ہے آنکھوں میں
قمر جب میرے گھر وہ چاند سی صورت نہیں ہوتی

عرفان صدیقی

شور کرنا ہمیں بے وجہ نہیں آ گیا ہے
کوئی خنجر رگِ گردن کے قریں آ گیا ہے
یہ سر کہاں وہ کلاہِ چہار ترک کہاں
ابھی اجازۂ بیعت نہیں ملا ہے مجھے