مرزا غالب

مرنے کی اے دل اور ہی تدبیر کر کہ میں
شایانِ دست و خنجرِ قاتل نہیں رہا
سادگی پر اس کی، مر جانے کی حسرتِ دل میں ہے
بس نہیں چلتا کہ پھر خنجر کفِ قاتل میں ہے

امام بخش ناسخ

اپنے ابرو آئنے میں دیکھ کر بسمل ہوا
کھینچ کر تلوار اپنا آپ وہ قاتل ہوا
بھاگ کر کب تجھ سے جاں بر کوئی اے قاتل ہوا
اڑ چلا گرِ ہوش اپنا طائر بسمل ہوا
جو یہاں مغلوب ہے عقبیٰ میں غالب ہے وہی
مرکب مقتول ہے اک روز جو قاتل ہوا

بہادر شاہ ظفر

واں ارادہ آج اس قاتل کے دل میں اور ہے
اور یہاں کچھ آرزو بسمل کے دل میں اور ہے
چشم قاتل مری دشمن تھی ہمیشہ لیکن
جیسی اب ہو گئی قاتل کبھی ایسی تو نہ تھی
منہ کھولے ہیں یہ زخم جو بسمل کے چار پانچ
پھر لیں گے بوسے خنجرِ قاتل کے چار پانچ

داغ دہلوی

زہے تقدیر کس آرام و راحت سے وہ بسمل ہے
کہ جس کے سر کا تکیہ دیر سے زانوئے قاتل ہے
ستم بھی ہو تو مجھ پر ہو جفا بھی ہو تو مجھ پر ہو
مجھے اس رشک نے مارا وہ کیوں عالم کا قاتل ہے
جس نے کچھ ہوش سنبھالا وہ جواں قتل ہوا
عہدِ پیری نہ ترے عہد میں قاتل آیا
خدا رکھے سلامت جن کو ان کو موت کب آئے
تڑپتے لوٹتے ہم کوچۂِ قاتل میں رہتے ہیں
مجھے آتا ہے کیا کیا رشک وقت ذبح اس سے بھی
گلا جس دم لپٹ کر خنجرِ قاتل سے ملتا ہے

مصحفی غلام ہمدانی

کب خوں میں بھرا دامن قاتل نہیں معلوم
کس وقت یہ دل ہو گیا بسمل نہیں معلوم
میں حشر کے دن دعویٰ خوں کس سے کروں گا
وہ کشتہ ہوں جس کشتہ کا قاتل نہیں معلوم
خدا کے واسطے اس کو نہ لاؤ
ابھی تو یاں سے وہ قاتل گیا ہے
بہ وقت ذبح بھی ہلتے رہیں ہیں لب میرے
ز بسکہ خنجرِ قاتل سے بات کرتا ہوں
قابو میں آئے پر میں چھوڑا نہ اس کو ہرگز
بل کھا کے گرچہ نکلا قاتل تڑپ تڑپ کر

مصطفٰی خان شیفتہ

نیرنگِ حسن و عشق کے کیا کیا ظہور ہیں
بسمل کو اضطراب ہے ، قاتل کو اضطراب
زخم میرے خنجرِ خوں ریز تھے اغیار کو
بے وفائی سے خجل کس وقت قاتل ہو گیا

مومن خان مومن

اے آرزوئے قتل ذرا دل کو تھامنا
مشکل پڑا مرا مرے قاتل کو تھامنا

فیض احمد فیض

ہر اک قدم اجل تھا، ہر اک گام زندگی
ہم گھوم پھر کے کوچہء قاتل سے آئے ہیں
اماں کیسی کہ موجِ خوں ابھی سر سے نہیں گزری
گزر جائے تو شاید بازوئے قاتل ٹھہر جائے

یگانہ چنگیزی

یہیں سے سیر کر لو یاسؔ اتنی دور کیوں جاؤٔ
عدم آباد کر ڈانڈا ملا ہے کوئے قاتل سے

جون ایلیا

اک زخم بھی یاران بسمل نہیں آنے کا
مقتل میں پڑے رہیے قاتل نہیں آنے کا

جگر مراد آبادی

پہلے کہاں یہ ناز تھے یہ عشوہ و ادا
دل کو دعائیں دو تمہیں قاتل بنا دیا
یوں تڑپ کر دل نے تڑپایا سرِ محفل مجھے
اس کو قاتل کہنے والے کہہ اٹھے قاتل مجھے
جان دی کہ حشر تک میں ہوں مری تنہائیاں
ہاں مبارک فرصت نظارۂ قاتل مجھے
خونِ دل رگ رگ میں جم کر رہ گیا اس وہم سے
بڑھ کے سینے سے نہ لپٹا لے مرا قاتل مجھے
حکومت کے مظالم جب سے ان آنکھوں نے دیکھے ہیں
جگرؔ ہم بمبئی کو کوچۂ قاتل سمجھتے ہیں

قمر جلالوی

اب تو قتلِ عام اس صورت سے روکا جائے گا
بڑھ کے خنجر چھین کیں گے پنجۂ قاتل سے ہم
کس خطا پر خوں کیے اے مالک روز جزاً
تو اگر کہہ دے تو اتنا پوچھ لیں قاتل سے ہم
لحد والے امیدِ فاتحہ اور تجھ کو قاتل سے
کہیں ڈوبی ہوئی کشتی ملا کرتی ہے ساحل سے
ترے کہنے سے تیرا نام بھی لوں گا محشر میں
مگر مجھ سے اگر پوچھا گیا قاتل تو کیا ہو گا
سرِ محشر میں اپنے خون سے انکار تو کر دوں
مگر چھینٹے ہوئے تلوار پر قاتل تو کیا ہو گا
جو یہ کار نمایاں تو میری سخت جانی کا
بھلا تلوار زور بازوئے قاتل سے ٹوٹے گی

عرفان صدیقی

خاک میں اس کی اگر خون بھی شامل ہے تو کیا
یہ مرا گھر بھی تو ہے کوچۂ قاتل ہے تو کیا
میرے ہونے میں کسی طور سے شامل ہو جاؤ
تم مسیحا نہیں ہوتے ہو تو قاتل ہو جاؤ