حیدر علی آتش

شہرۂِ آفاق مجھ سا کون سا دیوانہ ہے
ہند میں میں ہوں پرستاں میں مرا افسانہ ہے
ہمیشہ فکر سے یاں عاشقانہ شعر ڈھلتے ہیں
زباں کو اپنی بس اک حسن کا افسانہ آتا ہے
گل آتے ہیں ہستی میں عدم سے ہمہ تن گوش
بلبل کا یہ نالہ نہیں افسانہ ہے اس کا

داغ دہلوی

دمِ تقریر نالہ حلق میں چھریاں چبھوتے ہیں
زباں تک ٹکڑے ہو ہو کر مرا افسانہ آتا ہے
وہی جھگڑا ہے فرقت کا وہی قصہ ہے الفت کا
تجھے اے داغؔ کوئی اور بھی افسانہ آتا ہے

یگانہ چنگیزی

روشن تمام کعبہ و بت خانہ ہو گیا
گھر گھر جمالِ یار کا افسانہ ہو گیا
صورت پرست کب ہوئے معنی سے آشنا
عالم فریب طور کا افسانہ ہو گیا
کل کی ہے بات جوش پہ تھا عالم شباب
یادش بخیر آج اک افسانہ ہو گیا

خواجہ میر درد

وائے نادانی کہ وقت مرگ یہ ثابت ہوا
خواب تھا جو کچھ کہ دیکھا جو سنا افسانہ تھا

سراج الدین ظفر

یہ حسن و عشق افکار ازل کی یادگاریں ہیں
زبان دہر دہراتی ہے یہ افسانہ برسوں سے

عبدالحمید عدم

افسانہ چاہتے تھے وہ افسانہ بن گیا
میں حسن اتفاق سے دیوانہ بن گیا
وہ اک نگاہ دیکھ کے خود بھی ہیں شرمسار
نا آ گہی میں یوں ہی اک افسانہ بن گیا

قمر جلالوی

داستانِ غم پہ وہ کہتے ہیں یوں ہے یوں نہیں
بھول جاتے ہیں جو دانستہ کہیں افسانہ ہم
مسکرا دیتا ہے ہر تارا ہماری یاد پر
بھول جاتے ہیں قمر اپنا اگر افسانہ ہم
زباں تو بند کرواتے ہو تم اللہ کے آگے
کہا ہم نے اگر آنکھوں سے افسانہ تو کیا ہو گا
سنے جاؤ جہاں تک سن سکو جن نیند آئی گی
وہیں ہم چھوڑ دیں گے ختم افسانہ تو کیا ہو گا

عرفان صدیقی

رات کی بات کوئی اس کے سوا یاد نہیں
قصۂ شب میں اگر سچ ہے تو افسانۂ لب
لو صبح ہوئی موج سحر خیز ادھر آئے
اور آ کے چراغِ شبِ افسانہ اٹھا لے

مصطفی زیدی

کیا تیز پا تھے دن کی تمازت کے قافلے
ہاتھوں سے رشتۂ شب افسانہ چھٹ گیا

احسان دانش

وہ محبت ہی نہیں جس میں نہ ہوں شکوے گلے
اک کہانی تم سنائے جاؤٔ اک افسانہ ہم

اختر شیرانی

سوئے کلکتہ جو ہم بہ دلِ دیوانہ چلے
گنگناتے ہوئے اک شوخ کا افسانہ چلے

بہزاد لکھنوی

زخمِ دل اے زخمِ دل ناسور کیوں بنتا نہیں
لطف تو جب ہے کہ افسانے میں افسانہ رہے

علی سردار جعفری

مٹتے مٹتے دے گئے ہم زندگی کو رنگ و نور
رفتہ رفتہ بن گئے اس عہد کا افسانہ ہم

جوش ملیح آبادی

تا نہ محسوس ہو واماندگئ راہ دراز
زلف خوباں کا سناتے ہوئے افسانہ چلیں

حفیظ جالندھری

مری الفت تعجب ہو گئی توبہ معاذ اللہ
کہ منہ سے بھی نہ نکلے بات اور افسانہ ہو جائے
رہنے دے جامِ جم مجھے انجام جم سنا
کھل جائے جس سے آنکھ وہ افسانہ چاہیے

سیماب اکبر آبادی

دفعتاً ساز دو عالمِ بے صدا ہو جائے گا
کہتے کہتے رک گئے جس دن ترا افسانہ ہم
حسن کے دل میں جگہ پاتے ہی دیوانہ بنے
ہم ابھی راز بنے ہی تھے کہ افسانہ بنے
دل آزردہ ہے لبریز حدیث غمِ عشق
میں اگر چاہوں تو ہر سانس اک افسانہ بنے

شان الحق حقی

ہم تو فسانہ کہہ کر اپنے دل کا بوجھ اتار چلے
تم جو کہو گے اپنے دل سے وہ کیسا افسانہ ہو گا

شکیل بدایونی

رودادِ غمِ عشق ہے تازہ مرے دم سے
عنوان ہر افسانہ ہوں افسانہ نہیں ہوں
آغاز کائنات سے جس کی تلاش تھی
اوراقِ زندگی میں وہ افسانہ مل گیا

عزیز حامد مدنی

تشنۂ نازک مزاجان کنشت و دیر کا
برہمن کہنے بھی دے ایک آدھ افسانہ مجھے

فانی بدایونی

شعبدے آنکھوں کے ہم نے ایسے کتنے دیکھے ہیں
آنکھ کھلی تو دنیا تھی بند ہوئی افسانہ تھا

امیر مینائی

سننے والوں کے یہ ڈر ہے نہ جلیں پردۂ گوش
کیا سناؤں کہ بہت گر ہے افسانۂ عشق
آہ! عاشق سے ہوئی غفلتِ معشوق نہ کم
خواب تھا حسنِ فسوں ساز کو افسانۂ عشق

کلیم عاجز

غمِ دل ہی غمِ دوراں غم جانانہ بنتا ہے
یہی غم شعر بنتا ہے یہی افسانہ بنتا ہے
ہمیں اچھا ہے بن جائیں سراپا سرگزشت اپنی
نہیں تو لوگ جو چاہیں گے افسانہ بنا دیں گے

کیفی اعظمی

شاہ نامے لکھے ہیں کھنڈروں کی ہر اینٹ پر
ہر جگہ ہے دفن اک افسانہ تیرے شہر میں

محبوب خزاں

بھاگتے جاؤ کسی سمت کسی سائے سے
تذکرہ ایک ہے افسانہ در افسانہ کرو

مجروح سلطان پوری

اہلِ طوفاں آؤ دل والوں کا افسانہ کہیں
موج کو گیسو بھنور کو چشم جانانہ کہیں

ناصر کاظمی

پھر سرِ شام کوئی شعلہ نوا
سو گیا چھیڑ کے افسانۂ گل
ہم پہ گزرے ہیں خزاں کے صدمے
ہم سے پوچھے کوئی افسانۂ گل
کل ترا دور تھا اے بادِ صبا
ہم ہیں اب سرخی افسانۂ گل
ہمنشیں خاموش، دیواریں بھی سنتی ہیں یہاں
رات ڈھل جائے تو پھر چھیڑیں گے افسانہ کوئی