حیدر علی آتش

ایسی اونچی بھی تو دیوار نہیں گھر کی ترے
رات اندھیری کوئی آوے گی نہ برسات میں کیا
ان دنوں عشق رلاتا تھا ہمیں صورتِ ابر
کون سی فصل تھی وہ جس میں کہ برسات نہ تھی

مصحفی غلام ہمدانی

اے دیدۂ تر تم بھی جھڑی اپنی لگا دو
اس سال تو برسات میں برسات کی ٹھہرے
وہ کالی گھٹا اور وہ بجلی کا چمکنا
وہ مینہ کی بوچھاڑیں، وہ برسات کا عالم
تو اے مصحفیؔ اب تو گرمِ سخن ہو
شب آئیں دراز اور برسات نکلی

باقی صدیقی

میرے غم میں ڈوب گئی
انگڑائی لے کر برسات

عبدالحمید عدم

وہ عہدِ جوانی وہ خرابات کا عالم
نغمات میں ڈوبی ہوئی برسات کا عالم
یوں اس کی جوانی کا کچھ اندازہ تھا جیسے
مے خانے پہ امڈی ہوئی برسات کا عالم
تری زلف اعلان فرما رہی ہے
بڑی موسلا دھار برسات ہو گی
کیا بات ہے اے جانِ سخن بات کیے جا
ماحول پہ نغمات کی برسات کیے جا
توبہ کا تکلف کون کرے حالات کی نیت ٹھیک نہیں
رحمت کا ارادہ بگڑا ہے برسات کی نیت ٹھیک نہیں
حسن کو آتا ہے جب اپنی ضرورت کا خیال
عشقِ پر لطف کی برسات بھی ہو جاتی ہے
جس وقت بھی موزوں سی کوئی بات ہوئی ہے
ماحول سے نغمات کی برسات ہوئی ہے

عرفان صدیقی

بہتر یہ ہے کہ وہ تنِ شاداب ادھر نہ آئے
برسوں سے میرے شہر میں برسات نئیں ہوئی

مصطفیٰ زیدی

سینے میں خزاں آنکھوں میں برسات رہی ہے
اس عشق میں ہر فصل کی سوغات رہی ہے

رئیس فروغؔ

تمھیں بھرے ہوئے بادل تلاش کرتے ہیں
تمام شہر میں برسات ہے تمھارے لیے

اختر شیرانی

جھولا جھلائیں چل کے حسینوں کو باغ میں
گجرات میں سنا ہے کہ برسات ہو گئی

بشیر بدر

مقدر مری چشم پر آب کا
برستی ہوئی رات برسات کی
صداؤں کو الفاظ ملنے نہ پائیں
نہ بادل گھریں گے نہ برسات ہوگی

سدرشن فاکر

ہم تو سمجھے تھے کے برسات میں برسے گی شراب
آئی برسات تو برسات نے دل توڑ دیا

عبید اللہ علیم

بستر پر موجود رہے اور سیر ہفت افلاک
ایسی کسی پر رحمت کی برسات نہیں دیکھی

علی سردار جعفری

رام و گوتم کی زمیں حرمت انساں کی امیں
بانجھ ہو جائے گی کیا خون کی برسات کے بعد

غلام محمد قاصر

سروں پر خوف رسوائی کی چادر تان لیتے ہو
تمہارے واسطے رنگوں کی جب برسات ہوتی ہے

احمد راہی

وہ کہ اپنے پیار کی تھی بھیگی بھیگی ابتدا
یاد کر کے رو دیا دل آج اس برسات کو
آسمانوں سے کوئی بوند نہیں برسے گی
جلتے صحراؤں میں برسات کہاں ہوتی ہے

ماجد صدیقی

چار سو ایک ہی منظر بے سکوں
چار سو خشک پتوں کی برسات ہے

تلوک چند محروم

وہ فصل کون سی ہے جو راس آئے گی ہمیں
تسکیں بہار میں نہیں برسات میں نہیں

حفیظ جالندھری

غم تو گھنگور گھٹاؤں کی طرح اٹھتے ہیں
ضبط کا دشت ہے برسات نہیں ہوتی ہے
ضبطِ گریہ کبھی کرتا ہوں تو فرماتے ہیں
آج کیا بات ہے برسات نہیں ہوتی ہے

سید ضمیر جعفری

تپش کتنی ہے ماں کے آنسوؤں میں
یہ پانی کون سی برسات کا ہے
زندگی میری تمناؤں مرے خوابوں کا روپ
پھول میں ہوں رنگ میں ہوں ابر میں برسات میں

سیف الدین سیف

جھوم کر آج یہ شب رنگ لٹیں بکھرا دے
دیکھ برسات بڑی دیر کے بعد آئی ہے
کتنے بیتاب تھے رم جھم میں پییں گے لیکن
آئی برسات تو برسات پہ رونا آیا
سیفؔ پی کر بھی تشنگی نہ گئی
اب کے برسات اور ہی کچھ تھی

سلام مچھلی شہری

وہی گلاب کے موسم وہی شراب کے دور
وہی شریر گھٹائیں وہی بھری برسات

شان الحق حقی

سیرابی جاں دیکھ کہ ہم بزم سے اس کی
آنکھوں میں بسائے ہوئے برسات اٹھے ہیں

شکیل بدایونی

چھپ کے روتا ہوں تری یاد میں دنیا بھر سے
کب مری آنکھ سے برسات نہیں ہوتی ہے

فراق گورکھپوری

بس اک شرابِ کہن کے کرشمے ہیں ساقی
نئے زمانے نئی مستیاں نئی برسات

قتیل شفائی

کس کو خبر تھی سانولے بادل بن برسے اڑ جاتے ہیں
ساون آیا لیکن اپنی قسمت میں برسات نہیں
ہاتھ میں کاغذ کی لیے چھتریاں
گھر سے نہ نکلا کرو برسات میں
گنگناتی سی کوئی رات بھی آ جاتی ہے
آپ آتے ہیں تو برسات بھی آ جاتی ہے

نوح ناروی

نہیں رکتے ہمارے اشک اے نوحؔ
یہ طوفاں خیز ہے برسات کتنی