مرزا غالب

کچھ نہ کی اپنے جنونِ نارسا نے ، ورنہ یاں
ذرہ ذرہ روکشِ خرشیدِ عالم تاب تھا
شب کہ ذوقِ گفتگو سے تیرے ، دل بے تاب تھا
شوخی وحشت سے افسانہ فسون خواب تھا
اتنا ہی مجھ کو اپنی حقیقت سے بعد ہے
جتنا کہ وہمِ غیر سے ہوں پیچ و تاب میں
میں مضطرب ہوں وصل میں خوفِ رقیب سے
ڈالا ہے تم کو وہم نے کس پیچ و تاب میں
زخمی ہوا ہے پاشنہ پائے ثبات کا
نے بھاگنے کی گوں، نہ اقامت کی تاب ہے

امام بخش ناسخ

وہ بے نقاب ہوا ہے تو یہ تماشا ہے
دو چار ہونے کی آنکھوں میں اپنی تاب نہیں
بتوں کے پردے میں ہم دیکھتے ہیں نورِ خدا
خدا کے دیکھنے کی اے کلیم تاب نہیں

انشاء اللہ خان انشا

سیماب کے آنسو وہ سدا روئے الٰہی
کی جس نے ہو میرے دل بے تاب کی چوری
اور بھڑکے ہے اشتیاق کی آگ
اب کسے صبر و تاب باقی ہے

بہادر شاہ ظفر

رخ جو زیر سنبل پر پیچ و تاب آ جائے گا
پھر کے برج سنبلہ میں آفتاب آ جائے گا

حیدر علی آتش

نام کو میرے بھی احباب میں اپنے لکھے
ذرہ سمجھا رہے وہ مہر جہاں تاب مجھے

داغ دہلوی

ترے غمزوں کو اپنے کام سے کام
کسی کے دل کو تاب آئے نہ آئے
نئے خنجر سے مجھ کو ذبح کیجے
پھر ایسی آب و تاب آئے نہ آئے

شیخ ابراہیم ذوق

ہوا بگولے میں ہے کشتگان زلف کی خاک
کہ بعدِ مرگ بھی معلوم پیچ و تاب تو دے
کرے گا قتل وہ اے ذوقؔ تجھ کو سرمے سے
نگہ کی تیغ کو ہونے سیاہ تاب تو دے
قصۂِ زلفِ یار دل کے لیے
ہیں عجب پیچ و تاب کی باتیں
ذکر کیا جوش عشق میں اے ذوقؔ
ہم سے ہوں صبر و تاب کی باتیں

مصحفی غلام ہمدانی

اس زلف کا اینٹھنا تو دیکھو
بن چھیڑے ہی پیچ و تاب میں ہے
یہ مقام آفریں ہے کہ بزور مصحفی نے
انہی قافیوں کو پھر بھی بصد آب و تاب الٹا
خمِ ابرو کی ترے کیوں کہ نہ تعریف کروں
اس سے بہتر بھی کوئی تیغ سیہ تاب ہے یاں
روئیں گلے سے لگ کے بہم خوب کوئی دم
کیا دیکھتا ہے اے دل بے صبر و تاب آ
کس کی زلفوں کے پیچ و تاب سے ہے
رات دن میری پیچ و تاب میں جان

مصطفٰی خان شیفتہ

وہ بھی محروم نہیں جن کو نہیں بزم میں بار
تیرے رخسار کی ہے تاب ترے کوچے میں
پڑے صبر آرام کی جان پر
مری جان بے صبر و بے تاب کا

مومن خان مومن

پھیلی شمیم یار مرے اشکِ سرخ سے
دل کو غضب فشار ہوا پیچ و تاب میں

میر مہدی مجروح

اس کے نبھنے کے کچھ نہیں اسباب
وہ تغافل شعار میں بے تاب
واجب القتل ہے دل بے تاب
کشتہ ہونا ہی خوب ہے سیماب
سامنے اس کے جو ٹھہر جائیں
نہیں بے تابیوں کو اتنی تاب

جون ایلیا

سطر مو اس کی زیر ناف کی ہائے
جس کی چاقو زنوں کو تاب نہیں
سب چلے جاؤٔ مجھ میں تاب نہیں
نام کو بھی اب اضطراب نہیں
زلف کوچوں میں شانہ کش نے ترے
کتنے ہی پیچ و تاب بیچے ہیں
ہم نے لکھا نصاب تیرہ شبی
اور بہ صد آب و تاب ہی لکھا

سراج الدین ظفر

طوفاں کی ٹھوکروں میں ہمیشہ سے ہوں ظفرؔ
وہ شمع ہوں ہواؤں میں جو شعلہ تاب ہے

عرفان صدیقی

اٹھو یہ منظرِ شب تاب دیکھنے کے لیے
کہ نیند شرط نہیں خواب دیکھنے کے لیے