حیدر علی آتش

پسیجے گا کبھی تو دل کسی کا
ہمیشہ اپنی آہوں کا دھواں ہے
اس برق وش کا عشق نہانی عیاں ہوا
ابرِ سیاہ آہوں کا میرے دھواں ہوا
دیکھا جو میں نے اس کو سمندر کی آنکھ سے
گل زار آگ ہو گئی سنبل دھواں ہوا
سوزشِ دل سے تسلسل ہے وہی آہوں کا
عود کے جلنے سے مجمر میں دھواں ہے کہ جو تھا
نسیمِ صبح نے کیسا یہ اس کو بھڑکایا
ہنوز آتشِ گل کا دھواں نہیں معلوم

شیخ ابراہیم ذوق

نہ کرتا ضبط میں نالہ تو پھر ایسا دھواں ہوتا
کہ نیچے آسماں کے اور پیدا آسماں ہوتا
ابھی کیا سرد قاتل یہ شہید تفتہ جاں ہوتا
کوئی دم شمع مردہ میں بھی ہے باقی دھواں ہوتا

مومن خان مومن

گر پھر بھی اشک آئیں تو جانوں کہ عشق ہے
حقہ کا منہ سے غیر کی جانب دھواں نہ چھوڑ

یگانہ چنگیزی

چراغ زیست بجھا دل سے اک دھواں نکلا
لگا کے آگ مرے گھر سے میہماں نکلا
دل اپنا خاک تھا پھر خاک کو جلانا کیا
نہ کوئی شعلہ اٹھا اور نہ کچھ دھواں نکلا

باقی صدیقی

مسافر کوئی شاید لٹ گیا ہے
چراغِ راہ دے اٹھا دھواں کیوں
تو نے بخشی ہے روشنی ورنہ
دیدہ و دل دھواں دھواں ہوتے
احساس سفر داغ سفر ن کے عیاں ہے
منزل پہ چراغ سرِ منزل کا دھواں ہے
ناند چبھنے لگی بند آنکھوں میں
جب چراغوں کا دھواں یاد آیا
گردشِ زمانہ کا اک طویل افسانہ
یہ جلی جلی نظریں، یہ دھواں دھواں چہرے

جون ایلیا

کتنا جلا ہوا ہوں بس اب کیا بتاؤں میں
عالم دھواں دھواں نہ ہوا کچھ نہیں ہوا
جاؤ قرار بے دلاں شام بخیر شب بخیر
صحن ہوا دھواں دھواں شام بخیر شب بخیر

سراج الدین ظفر

شوق راتوں کو ہے درپئے کہ تپاں ہو جاؤں
رقص وحشت میں اٹھوں اور دھواں ہو جاؤں

شکیب جلالی

غمِ الفت مرے چہرے سے عیاں کیوں نہ ہوا
آگ جب دل میں سلگتی تھی‘ دھواں کیوں نہ ہوا
بڑا زمانہ ہوا آشیاں کو راکھ ہوئے
مگر نگاہ ہے اب تک دھواں دھواں لوگو

عرفان صدیقی

چراغ دینے لگے گا دھواں، نہ چھوِ لینا
تو میرا جسم کہیں میری جاں نہ چھوِ لینا
غزل میں ہم سے غمِ جاں بیاں کبھی نہ ہوا
تمام عمر جلے اور دھواں کبھی نہ ہوا
ابھی آتا ہے نظر چاند میں چہرہ تیرا
ایک دو پل میں یہ منظر بھی دھواں ہے جاناں
اتنی مدت تو سلگتا نہیں رہتا کچھ بھی
اور کچھ ہو گا جسے دل کا دھواں لکھتے ہو
جوئے مہتاب تو میلی نہیں ہوتی‘ شاید
آج کچھ میری ہی آنکھوں میں دھواں جیسا ہے
غبارِ تیرہ شبی بھر گیا ہے آنکھوں میں
یہیں چراغ جلے تھے دھواں کہاں جائے
غبارِ تیرہ شبی بھر گیا ہے آنکھوں میں
یہیں چراغ جلے تھے دھواں کہاں جائے

مجید امجد

مری نگاہ میں دورِ زماں کی ہر کروٹ
لہو کی لہر، دلوں کا دھواں، گلاب کے پھول

جمال احسانی

میرے ہونے سے نہ ہونا ہے مرا
آگ جلنے سے دھواں آباد ہے

رئیس فروغؔ

چہرے پہچان میں آتے ہی نہیں
شاہراہوں پہ دھواں ایسا ہے

اسرار الحق مجاز

مے کے آگے غموں کا کوہِ گراں
ایک پل میں دھواں نہ ہو جائے
میرے ہر لفظ میں بیتاب مرا شور دروں
میری ہر سانس محبت کا دھواں ہے ساقی

علی سردار جعفری

صبح ہر اجالے پہ رات کا گماں کیوں ہے
جل رہی ہے کیا دھرتی عرش پہ دھواں کیوں ہے

ماجد صدیقی

شعلۂ گل سے دیے تک ماجدؔ
اٹھ رہا ہے مری آہوں کا دھواں

جوش ملیح آبادی

ملگجاہٹ سی ہے سر گردوں
ابر ہے یا دھواں ہے کیا معلوم

خاطر غزنوی

حسن جلتا رہا شمعوں کی تپاں خلوت میں
ہو گئی مشعل مہتاب دھواں راتوں رات

سلام مچھلی شہری

طوفان عہد تازہ ترا شکریہ کہ اب
جتنے ستارے ذہن میں چمکے دھواں ہوئے

شان الحق حقی

راہ جینے کی کہاں سوختہ جانی کے بغیر
ہر نفس شعلۂ خاطر کا دھواں ہو جیسے
آہ سوزاں کو مری دیکھ نہ دیکھا ہو گا
کہ ہوا اور طرف کی ہو دھواں اور طرف

عزیز حامد مدنی

حساب مے ہے حریفان بادہ پیما سے
اٹھے گا اب کے رگِ تاک سے دھواں کیا کیا

احمد فراز

جو دشت عشق میں بچھڑے وہ عمر بھر نہ ملے
یہاں دھواں ہی دھواں ہے قریب آ جاؤ

فراق گورکھپوری

تیرہ بختی نہیں جاتی دلِ سوزاں کی فراقؔ
شمع کے سر پہ وہی آج دھواں ہے کہ جو تھا
آج بھی آگ دبی ہے دلِ انساں میں فراقؔ
آج بھی سینوں سے اٹھتا وہ دھواں ہے کہ جو تھا
شعلوں میں وہ انداز کہاں سوزِ نہاں کے
اٹھتا ہے جو دل سے وہ دھواں اور ہی کچھ ہے

کیفی اعظمی

وہ میرا گاؤں ہے وہ میرے گاؤں کے چولھے
کہ جن میں شعلے تو شعلے دھواں نہیں ملتا

محسن احسان

لگا کے آگ بدن میں وہ مجھ سے چاہتا ہے
کہ سانس لوں تو فضا کو دھواں دھواں نہ کروں

محسن نقوی

کس کے بس میں تھا ہوا کی وحشتوں کو روکنا
برگِ گل کو خاک شعلے کو دھواں ہونا ہی تھا

ناصر کاظمی

پرانی صحبتیں یاد آ رہی ہیں
چراغوں کا دھواں دیکھا نہ جائے
اوس بھی ہے کہیں کہیں لرزاں
بزمِ انجم دھواں دھواں بھی ہے
ہم نے روشن کیا معمورۂ غم
ورنہ ہر سمت دھواں تھا پہلے