داغ دہلوی

ماتم سے مرے وہ دل میں خوش ہیں
منہ پر نہیں نام بھی ہنسی کا
ماتم سے مرے وہ دل میں خوش ہیں
منہ پر نہیں نام بھی ہنسی کا
یہ بات بات میں کیا نازکی نکلتی ہے
دبی دبی ترے لب سے ہنسی نکلتی ہے
ہماری میت پہ تم جو آنا تو چار آنسو بہا کے جانا
ذرا رہے پاس آبرو بھی کہیں ہماری ہنسی نہ کرنا
دل لگی ان کی دل لگی ہی نہیں
رنج بھی ہے فقط ہنسی ہی نہیں

مصحفی غلام ہمدانی

رونے پہ مرے جو تم ہنسو ہو
یہ کون سی بات ہے ہنسی کی

مومن خان مومن

بے روئے مثلِ ابر نہ نکلا غبارِ دل
کہتے تھے ان کو برق تبسم ہنسی سے ہم

جون ایلیا

مجھے شکوہ نہیں بس پوچھنا ہے
یہ تم ہنستی ہو اپنی ہی ہنسی کیا
ضبط کر کے ہنسی کو بھول گیا
میں تو اس زخم ہی کو بھول گیا

جگر مراد آبادی

آج کیا بات ہے کہ پھولوں کا
رنگ تیری ہنسی سے ملتا ہے

قمر جلالوی

اب تک ہے یاد دے کر دل ان کو دل لگی میں
رونا پڑا تھا برسوں مجھ کو ہنسی ہنسی میں

احسان دانش

اشکِ رواں کی آب و تاب کر نہ عوام میں خراب
عظمت عشق کو سمجھ گریۂ غم ہنسی نہیں
جانے وہ ملتفت ہوں کدھر بزم میں
آنسوؤں کی طرف یا ہنسی کی طرف
نہ رہنماؤں کی مجلس میں لے چلو مجھ کو
میں بے ادب ہوں ہنسی آ گئی تو کیا ہو گا

اختر شیرانی

خیالستان ہستی میں اگر غم ہے خوشی بھی ہے
کبھی آنکھوں میں آنسو ہیں کبھی لب پر ہنسی بھی ہے

ادا جعفری

پھولوں کے کٹوروں سے چھلک پڑتی ہے شبنم
ہنسنے کو ترے پیچھے بھی سو بار ہنسی ہوں

علی سردار جعفری

صرف اک غنچہ سے شرمندہ ہے عالم کی بہار
دل خوں گشتہ کے ہونٹوں پہ ہنسی ہے یارو

فارغ بخاری

امید ہے کہ کبھی تو لبوں پہ آئے گی
کبھی نہ آئی لبوں پر ہنسی تو کیا ہو گا

ماجد صدیقی

جھان کے جو بام پر سے سورج تری ہنسی کا
ہم بھی کریں مداوا، یخ بستہ خامشی کا

جلیل مانک پوری

غنچوں کو صبا نے گدگدایا
دشوار ہے ضبط اب ہنسی کا
پھولوں سے کہو کہ روتی ہے اوس
اب اس سے مزہ نہیں ہنسی کا
جب سے بلبل اسیرِ دام ہوئی
کسی گل کو ہنسی نہیں آتی
انتہا غم کی اس کو کہتے ہیں
زخم کو بھی ہنسی نہیں آتی
دل گیا دل لگی نہیں جاتی
روتے روتے ہنسی نہیں جاتی
ہو گئے پھول زخمِ دل کھل کر
نہیں جاتی ہنسی نہیں جاتی

حسرت موہانی

آپ نے قدر کچھ نہ کی دل کی
اڑ گئی مفت میں ہنسی دل کی

سلام مچھلی شہری

جس کی بھی تباہی ہو کچھ اثر تو رکھتی ہے
آج میری حالت پر کیوں ہنسی نہیں آئی
موتی سے اشک آپ کے قدموں کو تھے عزیز
سوکھے ہوئے لبوں کی ہنسی بھی نبھائیے

شان الحق حقی

کسی کے ناز پہ افسردہ خاطری دل کی
ہنسی کی بات ہے پھر بھی ہنسی نہیں آتی

شکیل بدایونی

رونے پہ اپنے ان کو بھی افسردہ دیکھ کر
یوں بن رہا ہوں جیسے اب آئی ہنسی مجھے
میری دیوانگی نہیں جاتی
رو رہا ہوں ہنسی نہیں جاتی

امیر مینائی

جو کچھ سوجھتی ہے نئی سوجھتی ہے
میں روتا ہوں، اس کو ہنسی سوجھتی ہے

شاذ تمکنت

یقیں آیا ترے شاداب پیکر کی کھنک سن کر
بدن کے زاویوں میں یوں ہنسی تقسیم ہوتی ہے