اڑ گئی مفت میں ہنسی دل کی
حسرت موہانی
آپ نے قدر کچھ نہ کی دل کی
اڑ گئی مفت میں ہنسی دل کی
خو ہے از بس کہ عاشقی دل کی
غم سے وابستہ ہے خوشی دل کی
یاد ہر حال میں رہے وہ مجھے
الغرض بات رہ گئی دل کی
مل چکی ہم کو ان سے دادِ وفا
جو نہیں جانتے لگی دل کی
چین سے محوِ خواب ناز میں وہ
بیکلی ہم نے دیکھ لی دل کی
ہمہ تن صرف ہوشیاری عشق
کچھ عجب شے ہے بے خودی دل کی
ان سے کچھ تو ملا وہ غم ہی سہی
آبرو کچھ تو رہ گئی دل کی
مر مٹے ہم نہ ہو سکی پوری
آرزو تم سے ایک بھی دل کی
وہ جو بگڑے رقیب سے حسرتؔ
اور بھی بات بن گئی دل کی
فاعِلاتن مفاعِلن فِعْلن
خفیف مسدس مخبون محذوف مقطوع