مرزا غالب

شورِ نیرنگِ بہارِ گلشنِ ہستی، نہ پوچھ
ہم خوشی اکثر رہینِ نا خوشی کرتے رہے

انشاء اللہ خان انشا

ہزار شکر کہ انشاؔ کسی کی محفل میں
خفا سے آئے تھے پر ہو ہنسی خوشی نکلے
مجھے غمگیں نہ چھوڑ روتا آج
تجھے اپنی ہنسی خوشی کی قسم

داغ دہلوی

پھر دیکھتے ہیں عیش آدمی کا
بنتا جو فلک میر خوشی کا
نہیں ہے کچھ قتل ان کا آساں یہ سخت جاں ہیں برے بلا کے
قضا کو پہلے شریک کرنا یہ کام اپنی خوشی نہ کرنا
ہلاک انداز وصل کرنا کہ پردہ رہ جائے کچھ ہمارا
غم جدائی میں خاک کر کے کہیں عدو کی خوشی نہ کرنا
ہم تو دشمن کو دوست کر لیتے
پر کریں کیا تری خوشی ہی نہیں
عید کو بھی خفا خفا ہی رہے
آج کے دن خوشی سے ملنا تھا
نہ ہو دل تو کیا لطف آزار و راحت
برابر خوشی نا خوشی جانتے ہیں
محبت میں کرے کیا کچھ کسی سے ہو نہیں سکتا
مرا مرنا بھی تو میری خوشی سے ہو نہیں سکتا
غضب میں جان ہے کیا کیجے بدلہ رنج فرقت کا
بدی سے کر نہیں سکتے خوشی سے ہو نہیں سکتا

شیخ ابراہیم ذوق

لائی حیات آئے قضا لے چلی چلے
اپنی خوشی نہ آئے نہ اپنی خوشی چلے

باقی صدیقی

واقف رنگ دہر ہو کر بھی
تجھ سے ملتے ہیں کس خوشی سے ہم
انہی مجبوریوں نے مارا ڈالا
کہ تیری ہر خوشی میری خوشی ہے

جون ایلیا

حادثہ زندگی ہے آدم کی
ساتھ دے گی بھلا خوشی کب تک
ہمیں شکوہ نہیں اک دوسرے سے
منانا چاہیے اس پر خوشی کیا
گاہے گاہے بس اب یہی ہو کیا
تم سے مل کر بہت خوشی ہو کیا
روٹھا تھا تجھ سے یعنی خود اپنی خوشی سے میں
پھر اس کے بعد جان نہ روٹھا کسی سے میں
تمام دل کے محلے اجڑ چکے تھے مگر
بہت دنوں تو ہنسی ہی رہی خوشی ہی رہی
شام تک میری بیکلی ہے شراب
شام کو میری سر خوشی ہے شراب

جگر مراد آبادی

تری خوشی سے اگر غم میں بھی خوشی نہ ہوئی
وہ زندگی تو محبت کی زندگی نہ ہوئی

قمر جلالوی

جا تو رہے ہو موسیٰ دیدار کی خوشی میں
اوپر نظر نہ اٹھے بس خیر ہے اسی میں
قیدِ قفس میں مجھ سے ارماں کا پوچھنا کیا
صیاد اب تو جو کچھ آئے تری خوشی میں
پیش آئے لاکھ رنج اگر اک خوشی ہوئی
پروردگار یہ بھی کوئی زندگی ہوئی
تمھاری فرقت میں کیا ملے گا، تمھارے ملنے سے کیا ملے گا
قمر کے ہوں گے ہزار ہا غم رقیب کو اک خوشی ملے گی

عرفان صدیقی

ترے وصال سے کچھ کم نہیں امیدِ وصال
سو ہم ہلاک ہوئے ہیں خوشی میں پہلے سے

مصطفیٰ زیدی

یوں تو وہ ہر کسی سے ملتی ہے
ہم سے اپنی خوشی سے ملتی ہے

اختر شیرانی

خیالستان ہستی میں اگر غم ہے خوشی بھی ہے
کبھی آنکھوں میں آنسو ہیں کبھی لب پر ہنسی بھی ہے

ادا جعفری

دل اپنا جلایا ہے کسی نے بھی خوشی سے
بن جاتی ہے جی پر تو گزر جاتے ہیں جی سے
مجھے جانتا بھی کوئی نہ تھا مرے بے نیاز ترے سوا
نہ شکستِ دل نہ شکستِ جاں کہ تری خوشی کو خوشی کہا

بہزاد لکھنوی

مسرور بھی ہوں خوش بھی ہوں لیکن خوشی نہیں
تیرے بغیر زیست تو ہے زندگی نہیں
لا غم ہی ڈال دے مرے دست سوال میں
میں کیا کروں خوشی کو جو تیری خوشی نہیں

زہرا نگاہ

نہیں نہیں ہمیں اب تیری جستجو بھی نہیں
تجھے بھی بھول گئے ہم تری خوشی کے لیے

ماجد صدیقی

ہم خاک ہوئے تری خوشی کو
ہاں دیکھ ہماری سادگی کو

جلیل مانک پوری

جیسے اس کا کبھی یہ گھر ہی نہ تھا
دل میں برسوں خوشی نہیں آتی

حسرت موہانی

خو ہے از بس کہ عاشقی دل کی
غم سے وابستہ ہے خوشی دل کی

سلام مچھلی شہری

غم پر ہیں طعنہ زن تو خوشی بھی نبھائیے
سرکار میری بادہ کشی بھی نبھائیے

شکیل بدایونی

اب تو خوشی کا غم ہے نہ غم کی خوشی مجھے
بے حس بنا چکی ہے بہت زندگی مجھے
راضی ہوں یا خفا ہوں وہ جو کچھ بھی ہوں شکیلؔ
ہر حال میں قبول ہے ان کی خوشی مجھے
دل نظر بن جائے گا غم ہر خوشی ہو جائے گی
آپ کے جاتے ہی دنیا دوسری ہو جائے گی
ہم ہیں اور ان کی خوشی ہے آج کل
زندگی ہی زندگی ہے آج کل

شاذ تمکنت

خوشی کے نام پر آنکھوں میں آنسو آ ہی جاتے ہیں
بقدر غم محبت میں خوشی تقسیم ہوتی ہے

فراق گورکھپوری

اور ہوں گے طالب مدح جہاں
مجھ کو بس تیری خوشی درکار ہے

قابل اجمیری

رضائے دوست قابلؔ میرا معیار محبت ہے
انہیں بھی بھول سکتا تھا اگر ان کی خوشی ہوتی

قتیل شفائی

ستم تو یہ ہے کہ وہ بھی نہ بن سکا اپنا
قبول ہم نے کیے جس کے غم خوشی کی طرح
نگاہوں میں چمک دل میں خوشی محسوس کرتا ہوں
کہ تیرے بس میں اپنی زندگی محسوس کرتا ہوں

محبوب خزاں

خزاںؔ کبھی تو کہو ایک اس طرح کی غزل
کہ جیسے راہ میں بچے خوشی سے کھیلتے ہیں

ناصر کاظمی

غم ہے یا خوشی ہے تو
میری زندگی ہے تو

نوح ناروی

کیا وصل کے اقرار پہ مجھ کو ہو خوشی آج
اس کی بھی یہ صورت ہے کبھی کل ہے کبھی آج
وہ ہاتھ میں تلوار لیے سر پہ کھڑے ہیں
مرنے نہیں دیتی مجھے مرنے کی خوشی آج
اے نوحؔ ہمیں عشق میں پروا نہیں اس کی
آزار ہو یا لطف ہو غم ہو کہ خوشی ہو