مرزا غالب

ہوئی تاخیر تو کچھ باعثِ تاخیر بھی تھا
آپ آتے تھے ، مگر کوئی عناں گیر بھی تھا

امام بخش ناسخ

کہتے ہیں دیکھ کے زلف اس کے رخِ تاباں پر
کبھی ہوتا نہیں اس شمع سے گل گیر جدا
کیوں نہ ہو جلوۂِ خورشید سے سائے کا وجود
کیا ترے چہرے سے ہو زلفِ گرہ گیر جدا
سب ہمارے لیے زنجیر لیے پھرتے ہیں
ہم سر زلفِ گرہ گیر لیے پھرتے ہیں
تو جو آئے تو شبِ تار نہیں یاں ہر سو
مشعلیں نالۂِ شب گیر لیے پھرتے ہیں
سرکشی شمع کی لگتی نہیں گر ان کو بری
لوگ کیوں بزم میں گل گیر لیے پھرتے ہیں

بہادر شاہ ظفر

میری گرہِ دل نہ کھلی ہے نہ کھلے گی
جب تک نہ کھلے زلفِ گرہ گیر کسی کی
تاج زر کے لیے کیوں شمع کا سر کاٹے ہے
رشتۂِ الفت پروانہ کو گل گیر نہ توڑ

شیخ ابراہیم ذوق

یہ دل لب تشنہ تیغ یار کا ہے رات بھر کرتا
صدائے العطش جوں نالۂِ شب گیر پہلو سے

مصحفی غلام ہمدانی

چین مطلق نہیں پڑتا شبِ ہجراں میں مجھے
صبح تک نالۂِ شب گیر کیے جاتا ہوں
اے مہ یہ تیری دور کشی کب تلک بھلا
اک شب تو تو ارادۂِ شب گیر وصل کر

مصطفٰی خان شیفتہ

پابندیِ وحشت میں زنجیر کے مشتاق
دیوانے ہیں اس زلفِ گرہ گیر کے مشتاق
شیفتہ ہجر میں تو نالۂِ شب گیر نہ کھینچ
صبح ہونے کی نہیں خجلتِ تاثیر نہ کھینچ
ہے یہ سامان صفائی کا عدو سے کیوں کر
دستِ مشاطہ سے یوں زلفِ گرہ گیر نہ کھینچ

مرزا رفیع سودا

سودائی دل کو زلفِ گرہ گیر شرط ہے
دیوانے کے علاج میں زنجیر شرط ہے

یگانہ چنگیزی

داد خواہی کو اٹھا ہے ذرۂ پامال تک
سوتے فتنوں کو جگایا حشر عالم گیر نے

باقی صدیقی

مرحلہ دل کا نہ تسخیر ہوا
تو کہاں آ کے عناں گیر ہوا

عرفان صدیقی

اس تکلف سے نہ پوشاکِ بدن گیر میں آ
خواب کی طرح کبھی خواب کی تعبیر میں آ

مجید امجد

میں نہ سمجھا، ورنہ ہنگاموں بھری دنیا میں، اک آہٹ کے سنگ
کوئی تو تھا، آج جس کا قہقہہ دل میں ہے دامن گیرِ دل

غلام محمد قاصر

کچھ بے ترتیب ستاروں کو پلکوں نے کیا تسخیر تو کیا
وہ شخص نظر بھر رک نہ سکا احساس تھا دامن گیر تو کیا

سیماب اکبر آبادی

وہ جب رنگ پریشانی کو خلوت گیر دیکھیں گے
تو اپنے ہر تصور میں مری تصویر دیکھیں گے

فانی بدایونی

ہوشیار او شوخ بے پروا خرام
بچ کے میری خاک دامن گیر سے

اختر ہوشیارپوری

جس سے ملنا تھا مقدر وہ دوبارہ نہ ملا
اور امکاں نہ تھا جس کا وہ عناں گیر بھی ہے
میں یہ سمجھا تھا سلگتا ہوں فقط میں ہی یہاں
اب جو دیکھا تو یہ احساس ہمہ گیر بھی ہے

احمد فراز

کوئی تو زخم اسے بھولنے نہیں دیتا
کوئی تو یاد عناں گیر، گھر کی دیکھتے ہیں

قتیل شفائی

جب سے اسیرِ زلفِ گرہ گیر ہو گیا
میں بے نیاز حلقۂ زنجیر ہو گیا
مجھ میں رچی ہوئی تری خوشبو تھی اس لیے
بڑھ کر عدو بھی مجھ سے بغل گیر ہو گیا
مہرباں ہم پہ جو تقدیر ہماری ہو گی
آپ کی زلفِ گرہ گیر ہماری ہو گی

محسن احسان

کس ہجر سے گزرا ہوں کہ بے ساختہ محسنؔ
لیلائے تمنا سے بغل گیر ہوا میں