مرزا غالب

پھر تیرے کوچے کو جاتا ہے خیال
دلِ گم گشتہ، مگر، یاد آیا
نہ کہہ کسی سے کہ غالب نہیں زمانے میں
حریفِ رازِ محبت مگر در و دیوار
کعبے کس منہ سے جاؤ گے غالب
شرم تم کو مگر نہیں آتی
تسکیں کو ہم نہ روئیں جو ذوقِ نظر ملے
حورانِ خلد میں تری صورت مگر ملے

بہادر شاہ ظفر

کر لے اے دل جان کو بھی رنج و غم میں تو شریک
یہ جو محنت تجھ پہ ہے کچھ کچھ مگر بٹ جائے گی

داغ دہلوی

غم ہجر سے داغؔ مجھ کو نجات
یقیں تھا نہ ہو گی مگر ہو گئی
دل کو تو گھونٹ گھونٹ کر رکھا
مانتی ہی نہیں مگر آنکھیں
نوحہ گر کون ہے مقدر میں
رونے والوں میں ہیں مگر آنکھیں
ادھر دیکھ لینا ادھر دیکھ لینا
کن انکھیوں سے اس کو مگر دیکھ لینا
دیے جاتے ہیں آج کچھ لکھ کے تم کو
اسے وقت فرصت مگر دیکھ لینا
ہر چند کہ ہر روز کی رنجش ہے قیامت
ہم کوئی دن اس کو بھی مگر دیکھ رہے ہیں

شیخ ابراہیم ذوق

بڑھتی جاتی ہے جو مشقِ ستم اس ظالم کی
کچھ محبت مری اصلاح مگر دیتی ہے

مصحفی غلام ہمدانی

میں ترک عشق کو کہتا ہوں مصحفیؔ تجھ سے
یہ بات دھیان میں تیرے مگر نہیں آتی
گو خلق بھی جانے حال میرا
پوشیدہ نہیں مگر خدا سے
وادی قیس میں جو لے گئی مجھ کو وحشت
دل کے بہلانے کی جا تھی نہ مگر اور کہیں
جب دیکھتا ہوں ان کو تب تا کمر پڑے ہیں
یہ بال میرے جی کے پیچھے مگر پڑے ہیں

میر مہدی مجروح

مانگیں نہ ہم بہشت نہ ہو واں اگر شراب
دوزخ میں ڈال دیجیے دیجے مگر شراب

یگانہ چنگیزی

دور سے آج ان کو دیکھ لیا
دل کو تسکیں ہوئی مگر نہ ہوئی
ادب کے واسطے کتنوں کے دل دکھائے ہیں
یگانہؔ حد سے گزرنا نہ تھا مگر گزرے

باقی صدیقی

ربطِ باہم کی تمنا معلوم
حادثہ ایک مگر یاد آیا
کسی پتھر کی حقیقت ہی کیا
دلکا آئنہ مگر یاد آیا
ہونٹوں سے آہیں چھیننے والے ادھر تو دیکھ
ہم چپ تو ہو گئے ہیں مگر مطمئن نہیں
ہر زخمِ دل میں زیست نے دیکھا ہے اپنا عکس
ہم آئنہ نہیں تھے مگر آئنہ بنے
تار دل کے ٹوٹ کر چپ ہو گئے
چپ نہ ہوتے تھے مگر چپ ہو گئے

جون ایلیا

نام جس کا بھی نکل جائے اسی پر ہے مدار
اس کا ہونا یا نہ ہونا کیا، مگر رکھا ہے نام

جگر مراد آبادی

نہیں جانتے کچھ کہ جانا کہاں ہے
چلے جا رہے ہیں مگر جانے والے

خواجہ میر درد

درویش ہر کجا کہ شب آمد سرائے اوست
تو نے سنا نہیں ہے یہ مصرع مگر کہیں

عبدالحمید عدم

عدم اب دوستوں کی بے رخی کی ہے یہ کیفیت
کھٹکتی تو نہیں اتنی مگر محسوس ہوتی ہے

قمر جلالوی

اللٰہ رے الفت بتِ کافر ترے در کی
منت مجھے درباں کی نہ کرنی تھی مگر کی
آ تو جائیں گے وہ میری آہِ پر تاثیر سے
محفلِ دشمن میں رسوائی مگر ہو جائے گی
ہٹی زلف ان کے چہرے سے مگر آہستہ آہستہ
عیاں سورج ہوا وقتِ سحر آہستہ آہستہ
میں کچھ اس حالت سے ان کے سامنے پہنچا کہ وہ
گو مری صورت سے نفرت تھی مگر دیکھا کیے
ان کی تجلیوں کا اشر کچھ نہ پوچھیے
وہ میرے سامنے تھے مگر کچھ نہ پوچھیے

عرفان صدیقی

اس پار ساحلوں نے سفینے ڈبو دیے
سب کچھ بچا لیا تھا مگر کچھ نہیں بچا
خرابہ تھا مگر ایسا نہیں تھا
عزیزو، میرا گھر ایسا نہیں تھا
رفتہ رفتہ سارے چہرے درمیاں سے ہٹ گئے
ایک رشتہ آج بھی باقی مگر آنکھوں کا ہے

مصطفی زیدی

چلے تو کٹ ہی جائے گا سفر آہستہ آہستہ
ہم اس کے پاس جاتے ہیں مگر آہستہ آہستہ

الطاف حسین حالی

ہم جس پہ مر رہے ہیں وہ ہے بات ہی کچھ اور
عالم میں تجھ سے لاکھ سہی تو مگر کہاں

اختر شیرانی

دل میں ارمان وصال آنکھ میں طوفان جمال
ہوش باقی نہیں جانے کا مگر جاتے ہیں
اگلے وقتوں میں لٹا کرتے تھے رہرو اکثر
ہم تو اس عہد میں بھی لٹ کے مگر جاتے ہیں

ادا جعفری

جو آنکھوں اوٹ ہے چہرہ اسی کو دیکھ کر جینا
یہ سوچا تھا کہ آساں ہے مگر آساں نہیں ہوتا

ماجد صدیقی

جگمگائیں گے نگر آخرِ شب
چاند ابھرے گا مگر آخرِ شب

تلوک چند محروم

دیکھو جسے وہ مستِ مئے کبر و ناز ہے
دنیا بہت خراب ہے جائیں مگر کہاں
محرومؔ کیا ہی خوب ہے حالیؔ کی وہ غزل
تجھ سے جہاں میں لاکھ سہی تو مگر کہاں
ہے طبیعت تری رسا محرومؔ
تجھ کو اردو مگر نہیں آتی

حسرت موہانی

ہمیں وقف غم سر بسر دیکھ لیتے
وہ تم کچھ نہ کرتے مگر دیکھ لیتے

حفیظ جالندھری

وہ ہر وعدے سے انکار بہ طرز اقرار
وہ ہر اک بات پہ ہاں لفظ مگر سے پہلے

رسا چغتائی

موج اپنی جگہ کنارا ہے
یہ کنارا مگر رہے گا کیا

سیف الدین سیف

لوگ کہتے ہیں مقدر کا نوشتہ جس کو
ہم نہیں مانتے ہر چند مگر ہوتا ہے

فانی بدایونی

کچھ نظر کہہ گئی زباں نہ کھلی
بات ان سے ہوئی مگر نہ ہوئی
سنگِ در دیکھ کے سر یاد آیا
کوئی دیوانہ مگر یاد آیا
جمع کرتا ہوں غبارِ رہ دوست
سرِ شوریدہ مگر یاد آیا
بے بسی دیکھ یہ سو بار کیا عہد کہ اب
تجھ سے امید نہ رکھیں گے مگر رکھتے ہیں
آس ہوتی تو اس سہارے پر
صبر ممکن نہ تھا مگر کرتے

احمد فراز

میر کے مانند اکثر زیست کرتا تھا فراز
تھا تو وہ دیوانہ سا شاعر مگر اچھا لگا
پھر اسی رہ گزار پر شاید
ہم کبھی مل سکیں مگر شاید
تمام عمر کہاں کوئی ساتھ دیتا ہے
یہ جانتا ہوں مگر تھوڑی دور ساتھ چلو
گئی رتوں میں تو شام و سحر نہ تھے ایسے
کہ ہم اداس بہت تھے مگر نہ تھے ایسے
ہار کے دکھ سے پچھتاوا بڑھ کر ہے فرازؔ
دکھ کا نہیں افسوس مگر افسوس کا ہے
رات کے پچھلے پہر رونے کے عادی روئے
آپ آئے بھی مگر رونے کے عادی روئے
ان کے آ جانے سے کچھ تھم سے گئے تھے آنسو
ان کے جاتے ہی مگر رونے کے عادی روئے

فراق گورکھپوری

کسی کا یوں تو ہوا کون عمر بھر پھر بھی
یہ حسن و عشق تو دھوکا ہے سب مگر پھر بھی

قابل اجمیری

اضطرابِ دل سے قابلؔ وہ نگاہِ بے نیاز
بے خبر معلوم ہوتی ہے مگر ہوتی نہیں

کلیم عاجز

کوئے قاتل ہے مگر جانے کو جی چاہے ہے
اب تو کچھ فیصلہ کر جانے کو جی چاہے ہے

محبوب خزاں

تیری ہی طرح اب یہ ترے ہجر کے دن بھی
جاتے نظر آتے ہیں مگر کیوں نہیں جاتے
دیکھیے خوابِ سحر چاٹیے دیوار ازل
رات جاتی نظر آتی ہے مگر جائے کہاں

مجروح سلطان پوری

ترے پا زمیں پہ رکے رکے ترا سر فلک پہ جھکا جھکا
کوئی تجھ سے بھی ہے عظیم تر یہی وہم تجھ کو مگر نہ ہو

ناصر کاظمی

تیری مجبوریاں درست مگر
تو نے وعدہ کیا تھا یاد تو کر
تجھے کہنا ہے کچھ مگر خاموش
دیکھ اور دیکھ کر گزر خاموش
ہر نفس اک پیام تھا ناصر
ہم ہی بیٹھے رہے مگر خاموش

نوح ناروی

ہم اور ذکر محبت دل اور شکوۂ غم
خموشیوں نے تمہاری کیا مگر گستاخ
مرے دل کو چرا کر پھر چراؤ آنکھ کیا معنی
نگاہ قہر ہی سے تم مجھے دیکھو مگر دیکھو
کہتے ہو ہم آئیں گے مگر ظلم کریں گے
سوچو تم اگر تو یہ مگر بھی ہے کوئی چیز