مرزا غالب

نہ پوچھ بے خودی عیش مقدمِ سیلاب
کہ ناچتے ہیں پڑے سر بسر در و دیوار

انشاء اللہ خان انشا

اک پھریری جو ترا خاک بسر لیتا ہے
تھام جبریل امیں اپنا جگر لیتا ہے
ہاتھ اپنے کے سوا اور تو کیا ہو ہیہات
والہ و در بہ در و خاک بسر کا تکیہ

داغ دہلوی

شبِ وصل ضد میں بسر ہو گئی
نہیں ہوتے ہوتے سحر ہو گئی
برے حال سے یا بھلے حال سے
تمہیں کیا ہماری بسر ہو گئی

شیخ ابراہیم ذوق

بید مجنوں کو ہو جب دیکھتے اے اہلِ نظر
کسی مجنوں کو بھی آشفتہ بسر دیکھتے ہو
مانند شمع گریہ ہے کیا شغل طرفہ تر
ہو جاتی رات اس میں بلا سے بسر تو ہے

مصطفٰیٰ خان شیفتہ

اب کے ارادہ ملکِ عدم کا ہے شیفتہ
گھبرا گئے کہ ایک جگہ کیا بسر کریں
شبِ وصل کی بھی چین سے کیوں کر بسر کریں
جب یوں نگاہبانی مرغِ سحر کریں

فیض احمد فیض

فیض تکمیلِ آرزو معلوم
ہو سکے تو یونہی بسر کر دے
کب ٹھہرے گا درد اے دل، کب رات بسر ہو گی
سنتے تھے وہ آئیں گے ، سنتے تھے سحر ہو گی
واعظ ہے نہ زاہد ہے ، ناصح ہے نہ قاتل ہے
اب شہر میں یاروں کی کس طرح بسر ہو گی
دیکھ آئیں چلو ہم بھی جس بزم میں سنتے ہیں
جو خندہ بلب آئے وہ خاک بسر جائے

یگانہ چنگیزی

دیارِ بے خودی ہے اپنے حق میں گوشۂ راحت
غنیمت ہے گھڑی بھر خوابِ غفلت میں بسر ہونا
سلامت رہیں دل میں گھر کرنے والے
اس اجڑے مکاں میں بسر کرنے والے
کجا صحن عالم کجا کنج مرقد
بسر کر رہے ہیں بسر کرنے والے
فکر انجام و حسرت آغاز
دو گھڑی چین سے بسر نہ ہوئی

باقی صدیقی

خیر ہو ترے غم کی شام ہونے والی ہے
اور کر لیا ہم نے ایک دن بسر اپنا
اندر سے ٹوٹتے رہے ہیں
باہر سے زندگی بسر کی
کرم ہے ہم پہ تیری اک نظر بھی
مگر یوں زندگی ہو گی بسر بھی
صبح کیفکر میں رہنے والے
رات کرتے ہیں بسر آنکھوں میں
اعتبار نظر کریں کیسے
ہم ہوا میں بسر کریں کیسے

جون ایلیا

کیا ترستا ہوں کہ باہر کے کسی کام آئے
وہ اک انبوہ کہ بس خاک بسر ہے مجھ میں

شکیب جلالی

اب یہ ویران دن‘ کیسے ہو گا بسر
رات تو کٹ گئی‘ درد کی سیج پر

عرفان صدیقی

وہ اک کھنڈر ہے ‘ مگر راستے میں پڑتا ہے
سو ایک رات وہاں بھی بسر کروں گا میں
اب ضیابار وہ مہتاب ادھر بھی ہو جائے
ورنہ ممکن ہے مری رات بسر بھی ہو جائے

جمال احسانی

سب بدلتے جا رہے ہیں سر بسر اپنی جگہ
دشت اب اپنی جگہ باقی نہ گھر اپنی جگہ

ضیا جالندھری

تاراج بہاراں ہے کہ اک جشن جنوں ہے
رقصاں ہیں بگولے کہ ہوا خاک بسر ہے

حسرت موہانی

ہمیں وقف غم سر بسر دیکھ لیتے
وہ تم کچھ نہ کرتے مگر دیکھ لیتے

رسا چغتائی

رات ہم نے جہاں بسر کی ہے
یہ کہانی اسی شجر کی ہے

سیف الدین سیف

کتنا بے کار تمنا کا سفر ہوتا ہے
کل کی امید پہ ہر آج بسر ہوتا ہے

سیماب اکبر آبادی

حد ہو کوئی تو صبر ترے ہجر پر کریں
آخر ہم ایک حال میں کب تک بسر کریں
تم نے تو اپنے حسن کو محفوظ کر لیا
ہم کس کے ساتھ عمر محبت بسر کریں

شاد عظیم آبادی

کوچ کی ساعت آ گئی سر پر شادؔ اٹھا لے جھولی بستر
نیند میں ساری رات بسر کی چونک مسافر رات نہیں ہے

فانی بدایونی

شکوہ کیا ان سے خونِ ناحق کا
زندگی تھی ہوئی بسر نہ ہوئی
غم نے مہلت نہ دی کہ ہم فانیؔ
اور کچھ دن ابھی بسر کرتے

اقبال ساجد

ظالموں کے ساتھ مل جاؤ رہو گے عیش میں
عمر ساجدؔ کسمپرسی میں بسر کرتے ہو کیوں

شاذ تمکنت

کوئی اس کا درد بھی پوچھتا کہ وہ کچھ دنوں سے اداس ہے
یہ جنوں کی پرسشِ حال کیا جو ازل سے خاک بسر بھی ہے

فراق گورکھپوری

ستم کے رنگ ہیں ہر التفات پنہاں میں
کرم نما ہیں ترے جور سر بسر پھر بھی
نہ رہا حیات کی منزلوں میں وہ فرقِ ناز و نیاز بھی
کہ جہاں ہے عشق برہنہ پا وہیں حسن خاک بسر بھی ہے

قتیل شفائی

قسم جسے ضبطِ غم کی دے کر اٹھا دیا اپنے در سے تو نے
کہیں وہ دیوانہ عمر اپنی بغیر تیرے بسر نہ کر دے

کلیم عاجز

یہی بیکسی تھی تمام شب اسی بیکسی میں سحر ہوئی
نہ کبھی چمن میں گزر ہوا نہ کبھی گلوں میں بسر ہوئی
مجھے کیا اگر ترے دوش سے تری زلف تا بہ کمر ہوئی
کہ میں ایسا خانہ خراب ہوں کبھی چھاؤں میں نہ بسر ہوئی

مجروح سلطان پوری

رخ تیغ سے جو نہ ہو کبھی سحر ایسی کوئی نہیں مری
نہیں ایسی ایک بھی شام جو تہ زلف دار بسر نہ ہو

محسن احسان

خود اپنے آپ سے یہ گلہ عمر بھر کیا
کیسے ترے فراق کا موسم بسر کیا

محسن نقوی

پھر وہی میں ہوں وہی شہر بدر سناٹا
مجھ کو ڈس لے نہ کہیں خاک بسر سناٹا

میرا جی

جیسے ہوتی آئی ہے ویسے بسر ہو جائے گی
زندگی اب مختصر سے مختصر ہو جائے گی

نوح ناروی

دل و نظر کو لحاظ و حیا سے کیا مطلب
یہ بے ادب ہے سراسر وہ سر بسر گستاخ