مرزا غالب

مجھ کو یہ وہم کہ انکار نہ ہو جائے کہیں
ان کو یہ فکر کہ اقرار کروں یا نہ کروں

بہادر شاہ ظفر

کرتا تھا جو یاں آنے کا جھوٹا کبھی اقرار
مدت سے ظفرؔ اس نے وہ اقرار بھی چھوڑا

مصطفٰی خان شیفتہ

لا و نعم نہیں جو تمنائے وصل پر
انکار سے حجاب ہے ، اقرار سے حجاب

مومن خان مومن

مفت اول سخن میں عاشق نے جان دے دی
قاصد بیان تیرا اقرار تک نہ پہنچا

باقی صدیقی

دب گئے ان کی نگاہوں کے اثر سے باقیؔ
کر لیا جرم کا اقرار! نہیں کوئی نہیں

جگر مراد آبادی

ان آنکھوں کی زہے معجز بیانی
بہم انکار بھی اقرار بھی ہے

عرفان صدیقی

ایک شکل اور بھی ہے چپ کھڑے رہنے کے سوا
آپ اس جرم کا اقرار بھی کر سکتے ہیں
مرے شانوں پہ دو لکھنے والے ، تحریر سرِ دیوار لکھیں
مرے دل کی گواہی درج کریں، مرے ہونٹوں کا اقرار لکھیں
تشنہ رکھا ہے نہ سرشار کیا ہے اس نے
میں نے پوچھا ہے تو اقرار کیا ہے اس نے

الطاف حسین حالی

قول دینے میں تامل نہ قسم سے انکار
ہم کو سچا نظر آتا کوئی اقرار نہیں

بیخود بدایونی

حشر پر وعدۂ دیدار ہے کس کا تیرا
لاکھ انکار اک اقرار ہے کس کا تیرا

ظہیر کاشمیری

اتنی گریز پا تو نہ تھی عمر دوستی
اے خندۂ خفی ترے اقرار کیا ہوئے
صحرا صحرا ہم نے نوکِ خار سے تلوے سہلائے
محفل محفل ہم نے اپنی وحشت کا اقرار کیا

علی سردار جعفری

نوک ابرو میں کبھی تلخی انکار لیے
کبھی گھولے ہوئے شیرینی اقرار آنکھیں

ماجد صدیقی

سامنے اس کے خاموش تھے اس طرح
ہر خطا کا ہمیں جیسے اقرار تھا

تلوک چند محروم

قسمیں نہ بار بار دلائیں تو کیا کریں
اقرار سا کوئی ترا اقرار بھی تو ہو

جلیل مانک پوری

رازِ عشق اظہار کے قابل نہیں
جرم یہ اقرار کے قابل نہیں

شکیل بدایونی

ہوئی تو ہے یوں ہی تردید عہد لطف و کرم
دبی زبان سے اقرار کر کے چھوڑ دیا

فانی بدایونی

دشواری انکار سے طالب نہیں ڈرتے
یوں سہل تو اقرار ہوا بھی نہیں جاتا

احمد فراز

سخت جاں ہیں پر ہماری استواری پر نہ جا
ایسے ٹوٹیں گے ترا اقرار بن جائیں گے ہم
انکار نہ اقرار بڑی دیر سے چپ ہیں
کیا بات ہے سرکار بڑی دیر سے چپ ہیں

فراق گورکھپوری

کچھ نہ کچھ عشق کی تاثیر کا اقرار تو ہے
اس کا الزام تغافل پہ کچھ انکار تو ہے
عشق کا شکوۂ بے جا بھی نہ بے کار گیا
نہ سہی جور مگر جور کا اقرار تو ہے
چونک اٹھتے ہیں فراقؔ آتے ہی اس شوخ کا نام
کچھ سراسیمگی عشق کا اقرار تو ہے
ایک ادا سے بے نیاز قرب و دوری کر دیا
ماور ائے وصل و ہجراں حسن کا اقرار تھا

قتیل شفائی

کیسے کیسے بھید چھپے ہیں پیار بھرے اقرار کے پیچھے
کوئی پتھر تان رہا ہے شیشے کی دیوار کے پیچھے
بے خودی میں پہلوئے اقرار پہلے تو نہ تھا
اتنا غافل وہ بتِ عیار پہلے تو نہ تھا