مرزا غالب

عہدے سے مدحناز کے باہر نہ آ سکا
گراک ادا ہو تو اسے اپنی قضا کہوں
کبھی آ جائے گی کیوں کرتے ہو جلدی غالب
شہرۂِ تیزی شمشیر قضا ہے تو سہی

بہادر شاہ ظفر

روبرو اس زلف کے دام بلا کیا چیز ہے
اس نگہ کے سامنے تیرِ قضا کیا چیز ہے
میں سسکتا رہ گیا اور مر گئے فرہاد و قیس
کیا انہیں دونوں کے حصہ میں قضا تھی میں نہ تھا

داغ دہلوی

گر تو کسی بہانے آ جائے وقتِ نزع
ظالم کریں ہزار بہانے قضا سے ہم

شیخ ابراہیم ذوق

اے ذوقؔ ہے غضب نگہِ یار الحفیظ
وہ کیا بچے کہ جس پہ یہ تیرِ قضا چلے
آنکھ اس پرجفا سے لڑتی ہے
جان کشتی قضا سے لڑتی ہے
پوچھ آ قاتل سے تو وہ کب کرے گا ہم کو قتل
آج ہم تاریخ مرگ آپ اے قضا کہنے کو ہیں
نفس کی آمد و شد ہے نماز اہل حیات
جو یہ قضا ہو تو اے غافلو قضا سمجھو

مصطفٰی خان شیفتہ

ہیں جاں بلب کسی کے اشارے کی دیر ہے
دیکھے ہے اس نگہ کو قضا اور قضا کو ہم
کیا کیجے ، بد گمانیِ ابرو کا دھیان ہے
کرتے وگرنہ ہجر میں تیغِ قضا سے ربط

مومن خان مومن

بہرِ عیادت آئے وہ لیکن قضا کے ساتھ
دم ہی نکل گیا مرا آواز پا کے ساتھ
قہر ہے موت ہے قضا ہے عشق
سچ تو یوں ہے بری بلا ہے عشق

فیض احمد فیض

ہم سمجھے تھے صیاد کا ترکش ہوا خالی
باقی تھا مگر اس میں ابھی تیرِ قضا اور

میر انیس

اشارے کیا نگۂ ناز دل ربا کے چلے
ستم کے تیر چلے نیمچے قضا کے چلے
خود نویدِ زندگی لائی قضا میرے لیے
شمعِ کشتہ ہوں فنا میں ہے بقا میرے لیے

شکیب جلالی

شاید ہی کوئی آ سکے اس موڑ سے آگے
اس موڑ سے آگے تو قضا تک نہیں آتی

مجید امجد

آتا ہے خود ہی چوٹ پہ صیدِ سبک مراد
ہوتا ہے ورنہ کون ز کارِ قضا شکار

اختر شیرانی

ان رس بھری آنکھوں میں حیا کھیل رہی ہے
دو زہر کے پیالوں پہ قضا کھیل رہی ہے
اس بزم میں جائیں تو یہ کہتی ہیں ادائیں
کیوں آئے ہو، کیا سر پہ قضا کھیل رہی ہے

اسرار الحق مجاز

بن گئی رسمِ بادہ خواری بھی
یہ نماز اب قضا بھی ہوتی ہے

حسرت موہانی

کشمکش ہائے الم سے اب یہ حسرتؔ جی میں ہے
چھٹ کے ان جھگڑوں سے مہمان قضا ہو جائیے

حفیظ جالندھری

غیر بھی ایک دن مریں گے ضرور
ان کے حصے میں کیا قضا ہی نہیں

شاد عظیم آبادی

الزام تاکہ سر پہ کسی طرح کا نہ ہو
اے شادؔ ڈھونڈتی ہے بہانے قضا غرض

شکیل بدایونی

جینے والے قضا سے ڈرتے ہیں
زہر پی کر دوا سے ڈرتے ہیں

فانی بدایونی

کچھ ایسی یاس سے حسرت سے میں نے دم توڑا
جگر کو تھام کے رہ رہ گئی قضا میری
محتاج اجل کیوں ہے خود اپنی قضا ہو جا
غیرت ہو تو مرنے سے پہلے ہی فنا ہو جا
ہائے میں کشتۂ انداز ہوں یا رب کس کا
حور آئی مجھے لینے کو قضا کے بدلے
تیر سے تیغ سے خنجر سے سناں سے مارا
کئی پہلو مرے قاتل نے قضا کے بدلے

اکبر حمیدی

اتفاقات کے پیچھے بھی ہیں اسباب و علل
اک نہ اک اپنا سبب دست قضا نے رکھا

احمد فراز

تجھ ایسے مسیحا کے تغافل کا گلہ کیا
ہم جیسوں کی پرسش کو قضا تک نہیں آئی

امیر مینائی

پیچھے پڑا ہے افعیِ گیسو کے دل، امیر
جاتا ہے دوڑ دوڑ کے یہ خود قضا کے پاس
مقتل ہے میری جاں کو وہ جلوہ گاہ ناز
دل سے ادا یہ کہتی ہے تیری قضا ہوں میں
تیغِ قاتل پہ ادا لوٹ گئی
رقصِ بسمل پہ قضا لوٹ گئی
خنجرِ ناز نے کشتوں سے امیر
چال وہ کی کہ قضا لوٹ گئی

فراق گورکھپوری

موت کے نام سے ڈرتے تھے ہم اے شوق حیات
تو نے تو مار ہی ڈالا تھا قضا سے پہلے

کیف بھوپالی

بیمارِ محبت کی دوا ہے کہ نہیں ہے
میرے کسی پہلو میں قضا ہے کہ نہیں ہے