مرزا غالب

اپنا احوالِ دلِ زار کہوں یا نہ کہوں
ہے حیا مانعِ اظہار، کہوں یا نہ کہوں
جب اس کے دیکھنے کے لیے آئیں بادشاہ
لوگوں میں کیوں نمود نہ ہو لالہ زار کی

امام بخش ناسخ

ہو گیا ضعف سے میرا بدن زار سفید
نظر آتا ہے صنم صورت زنار سفید
وہ بیزار مجھ سے ہوا زار میں ہوں
وہ مے خوار غیروں میں ہے خوار میں ہوں

انشاء اللہ خان انشا

نہ چھیڑ اے نکہت بادِ بہاری راہ لگ اپنی
تجھے اٹکھیلیاں سوجھی ہیں ہم بے زار بیٹھے ہیں

بہادر شاہ ظفر

ہم نے تری خاطر سے دلِ زار بھی چھوڑا
تو بھی نہ ہوا یار اور اک یار بھی چھوڑا

حیدر علی آتش

غم نہیں گو اے فلک رتبہ ہے مجھ کو خار کا
آفتاب اک زرد پتا ہے مرے گل زار کا
لطف چمن ہے بلبل گل زار کے لیے
کیفیت شراب ہے مے خوار کے لیے
بلبل ہی کو بہار کے جانے کا غم نہیں
ہر برگ ہاتھ ملتا ہے گل زار کے لیے
سونے کے پتے ہوویں ہر اک گل کے کان میں
مقدور ہو جو بلبل گل زار کے لیے
نالاں ہوا میں اس رخ رنگیں کو دیکھ کر
بلبل مجھے نظارۂِ گل زار نے کیا

داغ دہلوی

ہر دم یہ شوق تھا اسے قربان کیجیے
میں وصل میں بھی جان سے بے زار ہی رہا
نہ جاؤ حالِ دلِ زار دیکھتے جاؤ
کہ جی نہ چاہے تو ناچار دیکھتے جاؤ

مصحفی غلام ہمدانی

اڑائے ہیں لختِ جگر آہ نے جب
ہوا میں بھی گل زار پیدا ہوا ہے
لینی متاعِ حسن ہمیں اس میں تاجرو!
نقصان جان و مال دلِ زار ہو سو ہو
اس گل کا پتا گر نہیں دیتے ہو تو یارو
اتنا تو بتا دو درِ گل زار کدھر ہے
برسوں نہ ملے اس سے تو اس شوخ نے ہم کو
پوچھا نہ کبھی مصحفیٔؔ زار کدھر ہے
رات کرتا تھا وہ اک مرغِ گرفتار سے بحث
میں بھی تا صبح رکھی بلبل گل زار سے بحث
عقلِ کل نے نہیں الزام دیا اس کو حسود
دور ہو، کر نہ عبث مصحفیؔ زار سے بحث

مصطفٰی خان شیفتہ

ہم بھی وارستہ مزاجی کے ہیں اپنی قائل
خلد میں روح، تنِ زار ترے کوچے میں
کب نگہ اس کی عشوہ بار نہیں
کب نگاہیں کرشمہ زار نہیں
شبِ ہجراں نے کہا قصۂِ گیسوئے دراز
شیفتہ تو بھی دلِ زار نے سونے نہ دیا
اثر آہ دلِ زار کی افواہیں ہیں
یعنی مجھ پر کرم یار کی افواہیں ہیں

مومن خان مومن

دیکھا عذاب رنج دلِ زار کے لیے
عاشق ہوئے ہیں وہ مرے آزار کے لیے
آتا نہیں ہے تو تو نشانی ہی بھیج دے
تسکین اضطرابِ دلِ زار کے لیے
ٹھہر جا جوش تپش ہے تو تڑپنا لیکن
چارہ سازوں میں ذرا دم دلِ زار آ جائے

مرزا رفیع سودا

بے وجہ نئیں ہے آئنہ ہر بار دیکھنا
کوئی دم کو پھولتا ہے یہ گل زار دیکھنا
وہی سوداؔ کے دل کی سمجھیں قدر
دیکھیں جو لالہ زار کی صورت
غنچے سے مسکرا کے اسے زار کر چلے
نرگس کو آنکھ مار کے بیمار کر چلے
جو گل ہے یاں سو اس گل رخسار ساتھ ہے
کیا گل ہے وہ کہ جس کے یہ گل زار ساتھ ہے

جگر مراد آبادی

معاذ اللہ اس کی واردات غم معاذ اللہ
چمن جس کا وطن ہو اور چمن بے زار ہو جائے
وہ بوئے گل کہ ہے جان چمن بھی
قیامت ہے چمن بے زار بھی ہے
یہی دنیا ہے نسبت آنسوؤں کی
یہی دنیا تبسم زار بھی ہے

مجید امجد

قصہ کوئی بہ ماتمِ جام و سبو سنا
نغمہ کوئی بہ تعزیتِ سبزہ زار چھیڑ

الطاف حسین حالی

فغان شوق کو مانع نہیں وصل
یہ نکتہ عندلیب زار سے پوچھ

احسان دانش

رعنائی کونین سے بے زار ہمیں تھے
ہم تھے ترے جلووں کے طلب گار ہمیں تھے
فسوں عجیب یہ اے موسمِ بہار کیا
کہ خار زار کو ہم رنگِ لالہ زار کیا

ظہیر کاشمیری

اے فرزانو! دیوانوں کے جذبۂ دل کی قدر کرو
ان کی ایک نظر نے آتش آتش کو گل زار کیا

علی سردار جعفری

وہی حسنِ یار میں ہے وہی لالہ زار میں ہے
وہ جو کیفیت نشے کی مے خوش گوار میں ہے

تلوک چند محروم

بایں کمال خرد کیوں ہے مائل الحاد
مقام جوشؔ کو محرومؔ زار کیا جانے

جلیل مانک پوری

شاعری کو طبع رنگیں چاہیے
ہر زمیں گل زار کے قابل نہیں

جوش ملیح آبادی

گداز دل سے باطن کا تجلی زار ہو جانا
محبت اصل میں ہے روح کا بیدار ہو جانا
مزاج حسن کو اب بھی نہ سمجھو تو قیامت ہے
ہمارا اور وفا کے نام سے بے زار ہو جانا

حفیظ جالندھری

ہوں وادی حیات میں اس طرح سست گام
جیسے ہو پا شکستہ کوئی خار زار میں
تنہائی فراق میں امید بارہا
گم ہو گئی سکوت کے ہنگامہ زار میں

سیف الدین سیف

کیا اسی طرح گزر جائے گی
کچھ تو ان پر بھی دلِ زار کھلے

سلام مچھلی شہری

میں خزاں میں بھی پرستار رہا ہوں اس کا
موسمِ گل میں چمن زار کو کیسے چھوڑوں

شاد عظیم آبادی

حقیقت میں ہمیں کو جب نہیں خود اعتبار اپنا
غلط سمجھی اگر سمجھی ہے تن کو جان زار اپنا
خبر کیا غیب کی غم خوار کو اور یاں یہ عالم ہے
کہا جاتا نہیں اپنی زباں سے حالِ زار اپنا

شکیل بدایونی

آ مسیحا آ کہ اب تیرا شکیلؔ
جان سے بے زار ہے تیرے بغیر

فانی بدایونی

ہو غمِ ہستی جاؤید گوارا کیونکر
جان کیا دیں کہ بہت جان سے بے زار ہیں ہم
یاں ہوش سے بے زار ہوا بھی نہیں جاتا
اس بزم میں ہشیار ہوا بھی نہیں جاتا
جاتے ہوئے کھاتے ہو مری جان کی قسمیں
اب جان سے بے زار ہوا بھی نہیں جاتا

احمد فراز

سو دیکھ کر ترے رخسار و لب یقیں آیا
کہ پھول کھلتے ہیں گل زار کے علاوہ بھی

امیر مینائی

دل جو سینے میں زار سا ہے کچھ
غم سے بے اختیار سا ہے کچھ

قتیل شفائی

مصر کی گلیاں اتر آئی ہیں اپنے شہر میں
حسن والوں کا یہ حالِ زار پہلے تو نہ تھا

ناصر کاظمی

فلک نے پھینک دیا برگِ گل کی چھاؤں سے دور
وہاں پڑے ہیں جہاں خار زار بھی تو نہیں

نوح ناروی

دنیا میں بہار اب آ پہنچی مے خانے کا در بھی کھل جائے
ایک ایک گلی ایک ایک مکاں گل زار ہوئی گل زار ہوا