مرزا غالب

نکو ہش مانعِ بے ربطی شور جنوں آئی
ہوا ہے خندہ احباب بخیہ جیب و دامن میں
آبرو کیا خاک اس گل کی، کہ گلشن میں نہیں
ہے گریبان ننگِ پیراہن جو دامن میں نہیں
ضعف سے اے گریہ کچھ باقی مرے تن میں نہیں
رنگ ہو کر اڑ گیا، جو خوں کہ دامن میں نہیں
خدا شرمائے ہاتھوں کو کہ رکھتے ہیں کشاکش میں
کبھی میرے گریباں کو کبھی جاناں کے دامن کو

داغ دہلوی

کھڑے ہوں زیر طوبیٰ وہ نہ دم لینے کو دم بھر بھی
جو حسرت مند تیرے سایۂِ دامن کے بیٹھے ہیں

مصطفٰی خان شیفتہ

دامن تک اس کے ہائے نہ پہنچا کبھی وہ ہاتھ
جس ہاتھ نے کہ جیب کو دامن بنا دیا

یگانہ چنگیزی

چھپیں گے کیا اسیران بلا صحرا کے دامن میں
محبت دام کی پھر کھینچ کر لائے گی گلشن میں
بتاؤ سیر صحرا کی کوئی تدبیر وحشی کو
گریباں میں تو ہاتھ الجھا پھنسا ہے پاؤں دامن میں

جگر مراد آبادی

پھول کھلے ہیں گلشن گلشن
لیکن اپنا اپنا دامن
تجھ سا حسیں اور خون محبت
وہم ہے شاید سرخی دامن
رحمت ہو گی طالب عصیاں
رشک کرے گی پاکی دامن
کانٹوں کا بھی حق ہے کچھ آخر
کون چھڑائے اپنا دامن
بیٹھے ہم ہر بزم میں لیکن
جھاڑ کے اٹھے اپنا دامن

قمر جلالوی

جنوں میں بھی یہاں تک ہے کسی کا پاسِ رسوائی
گریباں پھاڑتا ہوں اور رکھ لیتا ہوں دامن میں
اب سے ذرا فاصلے پر ہے حدِ دستِ جنوں
آ گیا چاکِ گریباں بڑھ کے دامن کے قریب
وہ تو یوں کہیے سرِ محشرِ خیال آ ہی گیا
ہاتھ جا پہنچا تھا ورنہ ان کے دامن کے قریب

عرفان صدیقی

میرے تصور سے سوا ان کی عطا، ان کی سخا
اتنے خزانے مل گئے چھوٹا لگا دامن مجھے

مصطفی زیدی

کون سی فصل میں اس بار ملے ہیں تجھ سے
کہ نہ پروائے گریباں ہے نہ فکر‌ دامن

رئیس فروغؔ

نئی نویلی کلیاں تھیں
جلتے بجھتے دامن میں

بیان میرٹھی

ابھی نادان ہیں محشر کے فتنے
رہیں تھامے ہوئے دامن کسی کا
ہماری خاک محشر تک اڑی ہے
نہ ہاتھ آیا مگر دامن کسی کا
بجائے گل مری تربت پہ ہوں خار
کہ الجھے گوشۂ دامن کسی کا

علی سردار جعفری

آنکھوں کی کچھ نورس کلیاں نیم شگفتہ غنچۂ لب
کیسے کیسے پھول بھرے ہیں گلچینوں کے دامن میں