مرزا غالب

یہ رات بھر کا ہے ہنگامہ صبح ہونے تک
رکھو نہ شمع پر اے اہلِ انجمن تکیہ
وہ آیا بزم میں ، دیکھو ، نہ کہیو پھر کہ غافل تھے
شکیب و صبر اہلِ انجمن کی آزمائش ہے

حیدر علی آتش

عالم حجاب یار کا تا حال ہے وہی
خلوت نشیں ہے روشنی انجمن ہنوز
رخِ سادہ نہیں اس شوخ کا نقش عداوت سے
نظر آتے ہی آپس میں ہر اہلِ انجمن بگڑا
دور گردوں ہے خداوندا کہ یہ دور شراب
دیکھتا ہوں جس کو میں اس انجمن میں مست ہے

شیخ ابراہیم ذوق

تسبیح دور بزم میں دیکھو امام کو
بخشی ہے حق نے زیب سرِ انجمن مجھے

فیض احمد فیض

ستم کی رسمیں بہت تھیں لیکن، نہ تھی تری انجمن سے پہلے
سزا، خطائے نظر سے پہلے ، عتاب جرمِ سخن سے پہلے

قمر جلالوی

بلبل ہے گلستاں میں پروانہ انجمن میں
سب اپنے اپنے گھر ہیں اک ہم نہیں وطن میں
سونی پڑی ہے محفل، محفل میں جا کے بیٹھو
آتے نہیں پتنگے بے شمعِ انجمن میں
ہوا آخر نہ ہمر کوئی ان کے روئے روشن کا
تراشے گل بھی شمعوں کے چراغِ انجمن بدلے

عرفان صدیقی

جنگلوں سے کون سا جھونکا لگا لایا اسے
دل کہ جگنو تھا چراغِ انجمن لگنے لگا
مکان چھوڑ گئے لوگ، ڈھونڈتے ہو کسے
کوئی ستارہ اب اس بامِ انجمن پہ نہیں
بجھیں چراغ تو اس رنگِ رخ کا راز کھلے
یہ روشنی تو تری انجمن کا جادو ہے
میں زندہ ہوں تو مری انجمن بھی زندہ رہے
مرا رقیب بھی، میرا سجن بھی زندہ رہے

اختر شیرانی

نہ ساز و مطرب نہ جام و ساقی نہ وہ بہارِ چمن ہے باقی
نگاہ شمعِ سحر کے پردے یہ نقشۂ انجمن ہے باقی

عبید اللہ علیم

نہ کوئی ہجر کا دن ہے نہ کوئی وصل کی رات
مگر وہ شخص کہ ہے جان انجمن کیا کیا

ثروت حسین

مشقت بھرے دن کے آخیر پر
ستاروں بھری انجمن بھی تو ہے

حسرت موہانی

واں سے نکل کے پھر نہ فراغت ہوئی نصیب
آسودگی کی جان تری انجمن میں تھی
روشن جمالِ یار سے ہے انجمن تمام
دہکا ہوا ہے آتشِ گل سے چمن تمام
دیکھو تو چشمِ یار کی جادو نگاہیاں
بے ہوش اک نظر میں ہوئی انجمن تمام

احمد فراز

ہزار مفلس سہی مگر ہم سخی بلا کے
کبھی تو تم اہلِ درد کی انجمن میں آؤ

شاذ تمکنت

میں اہلِ انجمن کی خلوت دل کا مغنی ہوں
مجھے پہچان لے گی انجمن آہستہ آہستہ
یہی تجھ سے اپنا تھا واسطہ یہی تھی حیات معاشقہ
تری خلوتوں کے شریک تھے تری انجمن سے چلے گئے
ہر ایک ڈوب گیا اپنی اپنی یادوں میں
کہ تیرا ذکر سرِ انجمن ہی ایسا تھا

کیفی اعظمی

دیوانہ وار چاند سے آگے نکل گئے
ٹھہرا نہ دل کہیں بھی تری انجمن کے بعد

مجروح سلطان پوری

ہمیں شعور جنوں ہے کہ جس چمن میں رہے
نگاہ بن کے حسینوں کی انجمن میں رہے
نہ آخر کہہ سکا اس سے مرا حالِ دلِ سوزاں
مہِ تاباں کہ جو اس کا شریک انجمن تک ہے

محسن نقوی

بدن کی چاپ نگہ کی زباں بھی ہوتی ہے
یہ بھید ہم پہ مگر اس کی انجمن میں کھلا

ناصر کاظمی

بے حجابانہ انجمن میں آ
کم سخن محفلِ سخن میں آ
کبھی فرصت ملے تو پچھلے پہر
شب گزیدوں کی انجمن میں آ
کنج کنج نغمہ زن بسنت آ گئی
اب سجے گی انجمن بسنت آ گئی