مرزا غالب

ہے سبزہ زار ہر در و دیوارِ غم کدہ
جس کی بہار یہ ہو پھر اس کی خزاں نہ پوچھ

امام بخش ناسخ

دو روز ایک وضع پہ رنگ جہاں نہیں
وہ کون سا چمن ہے کہ جس کو خزاں نہیں
پژمردہ ایک ہے تو شگفتہ ہے دوسرا
باغ جہاں میں فصلِ بہار و خزاں نہیں
ہو گیا زرد پڑی جس کی حسینوں پہ نظر
یہ عجب گل ہیں کہ تاثیر خزاں رکھتے ہیں

حیدر علی آتش

پیری میں شغلِ مے ہے جوانانہ روز و شب
بوئے بہار آتی ہماری خزاں میں ہے
شگفتہ رہتی ہے خاطر ہمیشہ
قناعت بھی بہارِ بے خزاں ہے
نیرنگ روزگار سے ایمن ہیں شکل سرو
رکھتے ہیں ایک حال بہار و خزاں میں ہم
افسوس کیا جوانی رفتہ کا کیجیے
وہ کون سی بہار تھی جس کو خزاں نہ تھی
اخیر ہو گئے غفلت میں دن جوانی کے
بہار عمر ہوئی کب خزاں نہیں معلوم

داغ دہلوی

بنا ہے ہمیشہ یہ دل باغ و صحرا
بہار آتے آتے خزاں آتے آتے
جلا کے داغِ محبت نے دل کو خاک کیا
بہار آئی مرے باغ میں خزاں کی طرح

مصحفی غلام ہمدانی

رنگِ رخ پر ہمارے ، زردی سی
نظر آتی ہے ، کیا خزاں ہیں ہم
شاخِ گل کے گلے سے لگ لگ کر
روتے ہیں موسم خزاں میں ہم
تماشے کی شکلیں عیاں ہو گئی ہیں
بہاریں بہت یاں خزاں ہو گئی ہیں
یہ دمِ سرد ہے کس کا کہ ہر اک نخل بہ باغ
یاد بے برگی ایام خزاں دیتا ہے
ہے صحبت کا پریشانوں کے یہ رنگ
ہوا سے ہوویں جو برگِ خزاں جمع
ہوئی محبوس قفس بلبل نے
رنج دیکھا یہ خزاں کی دولت

مصطفٰی خان شیفتہ

مدت ہوئی بہارِ جہاں دیکھتے ہوئے
دیکھا نہیں کسی نے گلِ بے خزاں ہنوز

فیض احمد فیض

آتے آتے یونہی دم بھر کو رکی ہو گی بہار
جاتے جاتے یونہی پل بھر کو خزاں ٹھہری ہے

مرزا رفیع سودا

اس گلشنِ ہستی میں عجب دید ہے لیکن
جب چشم کھلی گل کی تو موسم ہے خزاں کا
موسم شیب میں بے فائدہ ہے لعب شباب
کب ثمر دیوے ہے جو نخل خزاں پر آیا

یگانہ چنگیزی

لگا ہے دل کو اب انجام کار کا کھٹکا
بہارِ گل سے بھی اک پہلوئے خزاں نکلا
کچھ زرد زرد پتے نشاں جو خزاں کے ہیں
نیرنگ دل فریب یہ سب آسماں کے ہیں
انقلابِ دہر نے آنکھوں کو اندھا کر دیا
آخر اب نظارۂ فصلِ خزاں کیوں کر کریں

باقی صدیقی

آگ گلشن میں لگی تھی باقیؔ
فصلِ گل تھی کہ خزاں یاد نہیں
اپنا لہو ہی رنگ ہے ، اپنی تپش ہی بو
ہو فصلِ گل کہ دورِ خزاں بولتے رہو
ہمارے خون سے ابھریں چمن کی دیواریں
ہمارے قصے بہار و خزاں کے ساتھ چلے

جون ایلیا

تو مری شاعری میں ہے رنگ طراز و گل فشاں
تیری بہارِ بے خزاں شام بخیر شب بخیر

جگر مراد آبادی

مرا تو فرض چمن بندی جہاں ہے فقط
مری بلا سے بہار آئے یا خزاں گزرے

قمر جلالوی

ہوا کسی کی بھی اے باغباں نہیں رہتی
تری بہار تو کیا ہے خزاں نہیں رہتی

مجید امجد

فریبِ رنگ و بو ہے اور تم ہو
بہارِ صد خزاں ہے اور میں ہوں

اختر شیرانی

یہ بہار گلشن آب و گل ہے فنا اثر تو ہوں کیوں خجل
وہ گل فسردہ ہے میرا دل کہ ہمیشہ نذر خزاں رہا

ضیا جالندھری

دیکھ پھولوں سے لدے دھوپ نہائے ہوئے پیڑ
ہنس کے کہتے ہیں گزاری ہے خزاں بھی ہم نے

علی سردار جعفری

کرنا ہے ابھی خونِ جگر صرف بہاراں
کچھ دیر اٹھانا ہے ابھی ناز خزاں اور

فارغ بخاری

شاداب بہاروں کے تمنائی کہاں ہیں
موسم کے قدم زخم خزاں تک نکل آئے

ماجد صدیقی

تھا زیست میں بہار کا طوفاں بھی پل دو پل
اس بحر میں تموج گرد خزاں بھی دیکھ

تلوک چند محروم

نسیم فصلِ گل آئی نہ ان بارہ مہینوں میں
رہے گا باغ میں اے باغباں دورِ خزاں کب تک

ثروت حسین

حسن بہار مجھ کو مکمل نہیں لگا
میں نے تراش لی ہے خزاں اپنے ہاتھ سے

جوش ملیح آبادی

ضمیر فطرت میں پر فشاں ہے چمن کی ترتیب نو کا ارماں
خزاں جسے تو سمجھ رہا ہے وہ در حقیقت خزاں نہیں ہے

خاطر غزنوی

ہر حقیقت کو گماں تک سوچوں
میں بہاروں کو خزاں تک سوچوں

سلام مچھلی شہری

ہم ایسے لوگ جلد اسیر‌ خزاں ہوئے
لیکن غرور‌ و تمکنت گلستاں ہوئے

شان الحق حقی

چاہیے باغ کو بس ایک لہو کا چھینٹا
آن کی آن میں جاتی ہے خزاں اور طرف

شکیل بدایونی

مسرتیں رازدار غم تھیں مسرتوں میں الم تھا پنہاں
جبھی تو صحنِ چمن میں شاید بہار آئی خزاں سے پہلے

اختر ہوشیارپوری

میں کس کا نام نہ لوں اور نام لوں کس کا
ہزاروں پھول کھلے تھے خزاں کے ہوتے ہوئے

احمد فراز

سکوتِ شام خزاں ہے قریب آ جاؤ
بڑا اداس سماں ہے قریب آ جاؤ

فراق گورکھپوری

جو زخم کھلا دے جو مرا رنگ اڑا دے
وہ فصلِ گل و فصلِ خزاں اور ہی کچھ ہے

قتیل شفائی

ہمیں تو موسمِ گل نے ہی کر دیا رسوا
سنا ہے لوگ سلامت خزاں میں رہتے ہیں

کلیم عاجز

فصلِ گل تک رہے یا دورِ خزاں تک پہنچے
بات جب نکلی ہے منہ سے تو جہاں تک پہنچے

ناصر کاظمی

فکرِ تعمیرِ آشیاں بھی ہے
خوفِ بے مہری خزاں بھی ہے
آنے والی بہار کے افسوں
دیکھ ویرانۂ خزاں سے دور
یہ خرابے ضرور چمکیں گے
اعتبارِ خزاں کرے کوئی
باغ سنسان ہو گیا ناصر
آج وہ گل خزاں نے چھین لیا
ہم نے محفوظ کیا حسنِ بہار
عطرِ گل صرفِ خزاں تھا پہلے
جہانوں کے مالک زمانوں سے پردہ اٹھا دے
کہ دل ان دنوں بے نیازِ بہار و خزاں ہے
پر سال تو کلیاں ہی جھڑی تھیں مگر اب کے
گلشن میں ہیں آثارِ خزاں اور طرح کے