مرزا غالب

مقتل کو کس نشاط سے جا تا ہوں میں، کہ ہے
پرگل خیالِ زخم سے دامن نگاہ کا
ابھرا ہوا نقاب میں ہے ان کے ایک تار
مرتا ہوں میں کہ یہ نہ کسی کی نگاہ ہو

انشاء اللہ خان انشا

تفضلات نہیں لطف کی نگاہ نہیں
معاملہ ابھی مطلق وہ رو بہ راہ نہیں
انشاؔ سے آپ اب خفا ہیں
یوں بھر کے نگاہ دیکھئے گا

حیدر علی آتش

کیوں کر آنکھیں نہ ہم کو دکھلاؤ
کیسے خوش چشم خوش نگاہ ہو تم

داغ دہلوی

بھلا ہو پیرِ مغاں کا ادھر نگاہ ملے
فقیر ہیں کوئی چلو خدا کی راہ ملے
کہاں تھے رات کو ہم سے ذرا نگاہ ملے
تلاش میں ہو کہ جھوٹا کوئی گواہ ملے
یہ ہے مزے کی لڑائی یہ ہے مزے کا ملاپ
کہ تجھ سے آنکھ لڑی اور پھر نگاہ ملے
مثل سنی ہے کہ ملنے سے کوئی ملتا ہے
ملو تو آنکھ ملے دل ملے نگاہ ملے

مصحفی غلام ہمدانی

پلکیں نہیں چھوڑتیں کہ اک دم
آنکھوں سے تری نگاہ نکلے
نہ وہ وعدۂِ سرِ راہ ہے نہ وہ دوستی نہ نباہ ہے
نہ وہ دل فریبی کے ہیں چلن نہ وہ پیاری پیاری نگاہ ہے
دیکھ اس کو اک آہ ہم نے کر لی
حسرت سے نگاہ ہم نے کر لی
اوروں کی طرف تو دیکھتا ہے
ایدھر بھی تو کر نگاہ ظالم

مومن خان مومن

دیکھ دشمن کو اٹھ گیا بے دید
میرے احوال پر نگاہ نہ کی

یگانہ چنگیزی

اب کیا لگے گا دل چمن روزگار میں
مارا ہوا ہے دیدۂ عبرت نگاہ کا
دنیا مقامِ ہو نظر آئے گی ناگہاں
ٹوٹے گا جب طلسم فریبِ نگاہ کا

باقی صدیقی

جب جھجک کر تری نگاہ ملی
حادثات جہاں کو راہ ملی

جگر مراد آبادی

ہائے وہ رازِ غم کہ جو اب تک
تیرے دل میں مری نگاہ میں ہے
میں جہاں ہوں ترے خیال میں ہوں
تو جہاں ہے مری نگاہ میں ہے
حسن کو بھی کہاں نصیب جگرؔ
وہ جو اک شے مری نگاہ میں ہے
ایسی بھی اک نگاہ کیے جا رہا ہوں میں
ذروں کو مہر و ماہ کیے جا رہا ہوں میں
دفتر ہے ایک معنی بے لفظ و صوت کا
سادہ سی جو نگاہ کیے جا رہا ہوں میں
اٹھتی نہیں ہے آنکھ مگر اس کے روبرو
نادیدہ اک نگاہ کیے جا رہا ہوں میں

اختر شیرانی

ہر ایک جلوۂ رنگیں مری نگاہ میں ہے
غمِ فراق کی دنیا دلِ تباہ میں ہے
ہزار پردوں میں او چھپنے والے یہ سن لے
ترا جمال مرے دامن نگاہ میں ہے

ادا جعفری

آپ ہی مرکز نگاہ رہے
جانے کو چار سو نگاہ گئی
اس نے نظریں اٹھا کے دیکھ لیا
عشق کی جرات نگاہ گئی

ضیا جالندھری

کیسے دکھ کتنی چاہ سے دیکھا
تجھے کس کس نگاہ سے دیکھا
اتنا سوچا تجھے کہ دنیا کو
ہم نے تیری نگاہ سے دیکھا
چھیڑی بھی جو رسم و راہ کی بات
وہ سن نہ سکے نگاہ کی بات

جلیل مانک پوری

اب کون پھر کے جائے تری جلوہ گاہ سے
او شوخ چشم پھونک دے برق نگاہ سے
جھپکی پلک تو برق فلک سے زمیں پہ تھی
سنبھلا نہ کوئی گر کے تمہاری نگاہ سے
دیکھو پھر ایسے دیکھنے والے نہ پاؤ گے
کیوں خاک میں ملاتے ہو نیچی نگاہ سے
آئینے آرسی تو فقط دیکھنے کے ہیں
دیکھو تم اپنے حسن کو میری نگاہ سے
پھر وہی وہ تھے وہاں کچھ بھی نہ تھا
جس طرف دیکھا نگاہِ ناز سے

حفیظ جالندھری

اس شوخ نے نگاہ نہ کی ہم بھی چپ رہے
ہم نے بھی آہ آہ نہ کی ہم بھی چپ رہے

شاد عظیم آبادی

تا عمر آشنا نہ ہوا دل گناہ کا
خالق بھلا کرے تری ترچھی نگاہ کا
تنہا مزا اٹھاتا ہے دل رسم و راہ کا
بینا تو ہے پہ بس نہیں چلتا نگاہ کا

شکیل بدایونی

سب کی نظروں میں سر بلند رہے
جب تک ان کی نگاہ میں گزری
عشق کا کوئی خیر خواہ تو ہے
تو نہیں ہے تری نگاہ تو ہے
تاب جلوہ مجھے نہیں نہ سہی
لیکن اک جرات نگاہ تو ہے