مرزا غالب

سائے کی طرح ساتھ پھریں سرو و صنوبر
تو اس قدِ دلکش سے جو گلزار میں آوے

انشاء اللہ خان انشا

ہے عزم جزم یہ کہ زبردستی آج تو
بندِ قبا ہے موسم گلزار توڑیے

داغ دہلوی

بہار عمر میں باغ جہاں کی سیر کرو
کھلا ہوا ہے یہ گلزار دیکھتے جاؤ

مصطفٰیٰ خان شیفتہ

فرشِ رہ ہیں جو دل افگار ترے کوچے میں
خاک ہو رونقِ گلزار ترے کوچے میں

فیض احمد فیض

فکر دلداریء گلزار کروں یا نہ کروں
ذکرِ مرغانِ گرفتار کروں یا نہ کروں
پھول مسلے گئے فرشِ گلزار پر
رنگ چھڑکا گیا تختۂ دار پر

مرزا رفیع سودا

نے حرف و نے حکایت و نے شعر و نے سخن
نے سیر باغ و نے گل و گلزار دیکھنا
اے ساکنان کنجِ قفس صبح کو صبا
سنتے ہیں جائے گی سوئے گلزار کچھ کہو

قمر جلالوی

اس قفس والے کی قسمت قابل افسوس ہے
چھوٹ کر جو بھول جائے راستہ گلزار کا
پھونک ڈالا برق نے گھر بلبلِ ناچار کا
پتہ پتہ ہاتھ ملتا رہ گیا گلزار کا
فصلِ گل میں کس قدر منحوس ہے رونا مرا
میں نے جب نالے کیے بجلی گری گلزار میں
جل گیا میرا نشیمن یہ تو میں نے سن لیا
باغباں تو خیریت سے ہے صبا گلزار میں
آپ اک پھول بھی دیں گے تو اس احسان کے ساتھ
جیسے گلزار کا گلزار دیے دیتے ہیں

عرفان صدیقی

کوئی سچ میرے سلگتے ہوئے سینے میں بھی ڈال
آگ ہی آگ ہوں‘ گلزار بنادے مجھ کو
بدن کی ریت پر اب تک اسی وعدے کا سایہ ہے
اب آئیں گے تو تیرے دشت کو گلزار کردیں گے

اختر شیرانی

یارو کوئے یار کی باتیں کریں
پھر گل و گلزار کی باتیں کریں

ظہیر کاشمیری

پھولوں نے بڑھ کے پاؤں میں زنجیر ڈال دی
وارفتگی میں مائل گلزار کیا ہوئے

علی سردار جعفری

کھلے ہیں مشرق و مغرب کی گود میں گلزار
مگر خزاں کو میسر نہیں یقین بہار
شمع کا مے کا شفق زار کا گلزار کا رنگ
سب ہیں اور سب سے جدا ہے لب دیدار کا رنگ

احمد راہی

بوئے گل لے کے صبا کنج قفس تک پہنچی
لاکھ پردوں میں بھی پھیلی شب گلزار کی بات

ماجد صدیقی

کن بگولوں کے حصاروں میں کھڑے دیکھتے ہیں
اب کے پت جھڑ میں سلگتے ہوئے گلزار ہمیں

شکیل بدایونی

غم میں بھی رہا احساس طرب دیکھو تو ہماری نادانی
ویرانے میں ساری عمر کٹی گلزار کی باتیں کرتے ہیں

عزیز حامد مدنی

زندہ دلان شوق نے رکھا بہار نام
اک موجِ خوں گئی سر گلزار کچھ کہو

احمد فراز

باغبانوں کو عجب رنج سے تکتے ہیں گلاب
گل فروش آج بہت جمع ہیں گلزار کے بیچ
‮‮باغباں ڈال رہا ہے گل و گلزار پہ خاک
اب بھی میں چپ ہوں تو مجھ پر مرے اشعار پہ خاک
اب کسے رنج اسیری کہ قفس میں صیاد
سارے منظر گل و گلزار کے رکھ دیتے ہیں

فراق گورکھپوری

چھالوں کو بیاباں بھی گلزار نظر آیا
جب چھیڑ پر آمادہ ہر خار نظر آیا

قتیل شفائی

رنگ جدا آہنگ جدا مہکار جدا
پہلے سے اب لگتا ہے گلزار جدا
مرتب جن کو اپنی آبلہ پائی نہیں کرتی
وہ افسانے گل و گلزار سے آگے نہیں جاتے

محسن نقوی

کاش اس خواب کی تعبیر کی مہلت نہ ملے
شعلے اگتے نظر آئے مجھے گلزار کے بیچ