مرزا غالب

ہم سے عبث ہے گمانِ رنجشِ خاطر
خاک میں عشاق کی غبار نہیں ہے

امام بخش ناسخ

ہوس عروج کی لے جائیں گر یہ دنیا سے
کبھی بلند ہوا سے کوئی غبار نہ ہو
مجھ سے اب صاف بھی ہو جا یوں ہی یار آپ سے آپ
جس طرح ہے تری خاطر میں غبار آپ سے آپ
کسی طریق سے دل میں اگر غبار آیا
ہوا یقین یہ مجھ کو وہ شہ سوار آیا

حیدر علی آتش

گدا نواز کوئی شہسوار راہ میں ہے
بلند آج نہایت غبارِ راہ میں ہے

داغ دہلوی

نہ اس کے دل سے مٹایا کہ صاف ہو جاتا
صبا نے خاک پریشاں مرا غبار کیا
طوفانِ نوح بھی ہو تو مل جائے خاک میں
اللٰہ رے غبار ترا پر غبارِ دل

شیخ ابراہیم ذوق

ہو رازِ دل نہ یار سے پوشیدہ یار کا
پردہ نہ درمیاں ہو جو دل کے غبار کا

مصحفی غلام ہمدانی

پس قافلہ جو غبار تھا کوئی اس میں ناقہ سوار تھا
ابھی گرد باد ہو اڑ گیا وہ عجب طرح کا غبار تھا
میں مزار کو بھی مٹا دیا میں غبار کو بھی اڑا دیا
کہ تری صفائے مزاج پر مری خاک سے بھی غبار تھا
اگر یہ ہے ترے دامن کی حشر و نشر میاں
زمیں پہ خاک ہمارا غبار ٹھہرے گا

مصطفٰی خان شیفتہ

تا دلِ کینہ ور میں پائیں جگہ
خاک ہو کر ملے غبار میں ہم
تا دلِ کینہ ور میں پائیں جگہ
خاک ہو کر ملے غبار میں ہم

مومن خان مومن

خاک ہوتا نہ میں تو کیا کرتا
اس کے در کا غبار ہونا تھا
کلفت ہجر کو کیا روؤں ترے سامنے میں
دل جو خالی ہو تو آنکھوں میں غبار آ جائے

مرزا رفیع سودا

دامن صبا نہ چھو سکے جس شہ سوار کا
پہنچے کب اس کو ہاتھ ہمارے غبار کا
جو اٹھ نہ سکے تری گلی سے
رہنے دے کہ تا غبار ہووے

یگانہ چنگیزی

مزاجِ یار مکدر نہ ہونے پائے یاسؔ
بلند دامن زیں کہیں سے غبار نہ ہو

باقی صدیقی

کارواں یا غبار کو دیکھا
دیر تک رہگزار کو دیکھا
بھٹک رہا ہے خیال سود و زیاں کے پر پیچ راستوں میں
کہاں کی منزل ابھی تو گردو غبار پر غور کر رہا ہوں

جون ایلیا

آپ اپنا غبار تھے ہم تو
یاد تھے یادگار تھے ہم تو
بزم سے جب نگار اٹھتا ہے
میرے دل سے غبار اٹھتا ہے
وہ ہجوم دل زدگاں کہ تھا تجھے مژدہ ہو کہ بکھر گیا
ترے آستانے کی خیر ہو سرِ رہ غبار بھی اب نہیں

جگر مراد آبادی

یہ کمال عشق کی سازشیں یہ جمال حسن کی نازشیں
یہ عنایتیں یہ نوازشیں مری ایک مشتِ غبار پر

شکیب جلالی

کچھ ہو گیا ہے دھوپ سے خاکستری بدن
کچھ جم گیا ہے راہ کا مجھ پر غبار بھی
اگرچہ بے خانماں ہیں لیکن ہمارا ملنا نہیں ہے مشکل
ادھر ہی صحرا میں دوڑ پڑنا‘ جدھر سے اٹھتا غبار دیکھو

عرفان صدیقی

یہ چراغ کشتہ نہ جانے کب سے پڑے ہیں راہ گزار میں
مگر آج تک کوئی شہ سوار چھپا ہواہے غبار میں
اب کہیں اور چل اے ناقہ سوار دنیا
بھر گیا ہے مری آنکھوں میں غبار دنیا