مرزا غالب

منظر اک بلندی پر اور ہم بنا سکتے
عرش سے ادھر ہوتا، کاش کہ مکاں اپنا

انشاء اللہ خان انشا

وہ رو رو مجھ سے کہتا ہے خدا کی باتیں ہیں ورنہ
بھلا ٹک دل میں اپنے غور کر تو یہ مکاں اور ہم

حیدر علی آتش

دکھلا رہی ہے دل کی صفا دو جہاں کی سیر
کیا آئینہ لگا ہوا اپنے مکاں میں ہے
مشاہد جمال پری کی تھی آنکھیں
مکان وصال اک طلسمی مکاں تھا
یہ کس رشک مسیحا کا مکاں ہے
زمیں یاں کی چہارم آسماں ہے
دل روشن ہے روشن گر کی منزل
یہ آئینہ سکندر کا مکاں ہے
وحشی تھے بوئے گل کی طرح اس جہاں میں ہم
نکلے تو پھر کے آئے نہ اپنے مکاں میں ہم
ساقی ہے یار ماہ لقا ہے شراب ہے
اب بادشاہ وقت ہیں اپنے مکاں میں ہم
دروازہ بند رکھتے ہیں مثل حباب بحر
قفل درونِ خانہ ہیں اپنے مکاں میں ہم
معدوم داغ عشق کا دل سے نشاں ہوا
افسوس بے چراغ ہمارا مکاں ہوا
کون سے دن نئی قبریں نہیں اس میں بنتیں
یہ خرابہ وہی عبرت کا مکاں ہے کہ جو تھا
دل و دیدۂِ اہل عالم میں گھر ہے
تمہارے لیے ہیں مکاں کیسے کیسے
مرے صنم کا کسی کو مکاں نہیں معلوم
خدا کا نام سنا ہے نشاں نہیں معلوم
عجب نہیں ہے جو اہلِ سخن ہوں گوشہ نشیں
کسی دہن میں زباں کا مکاں نہیں معلوم

داغ دہلوی

جلوے مری نگاہ میں کون و مکاں کے ہیں
مجھ سے کہاں چھپیں گے وہ ایسے کہاں کے ہیں
سنے جو حضرت زاہد سے وصف جنت کے
تو صاف پھر گئی آنکھوں میں اس مکاں کی طرح

مصحفی غلام ہمدانی

مر کے نکلے قفس سے خوب ہوا
تنگ آئے تھے اس مکاں میں ہم
جب سے صانع نے بنایا ہے جہاں کا بہروپ
اپنی نظروں میں ہے سب کون و مکاں کا بہروپ
ہم جہاں رہتے ہیں یارو وہ جہاں اور ہی ہے
وہ جگہ اور ہی ہے اور وہ مکاں اور ہی ہے
اک حرف کن میں جس نے کون و مکاں بنایا
سارے جہاں کا تجھ کو آرام جاں بنایا
کچھ تو جگہ ہے مری دل میں بھی اس کے ورنہ
غیروں کو یوں کوئی پہلو میں مکاں دیتا ہے
دو گھڑی مل بیٹھیں ہم تم ایک دم جو چین سے
ہائے زیر آسماں ایسا مکاں کوئی نہیں

مومن خان مومن

مومنؔ خدا کے واسطے ایسا مکاں نہ چھوڑ
دوزخ میں ڈال خلد کو کوئے بتاں نہ چھوڑ

میر انیس

علم خالق کا خزانہ ہے میان کاف و نون
ایک کن کہنے سے یہ کون و مکاں پیدا ہوئے

باقی صدیقی

کیا رنگ حیات پوچھتے ہو
کچھ لوگ ہیں اور کچھ مکاں ہیں
ایک انسان بھی نہ مل سکتا
گرچہ آباد سب مکاں ہوتے
کہتا ہے ہر مکیں سے مکاں بولتے رہو
اس چپ میں بھی ہے جی کازیاں بولتے رہو
جو جہاں کی نظر میں کانٹا تھے
ہم نے آباد وہ مکاں دیکھے

جون ایلیا

اس شہر کی حفاظت کرنی تھی ہم کو جس میں
آندھی کی تھیں فصیلیں اور گرد کا مکاں تھا
مکان و لا مکاں کے بیچ کیا ہے
جدا جس سے مکاں ہے لا مکاں سے
اب ہمارا مکان کس کا ہے
ہم تو اپنے مکاں کے تھے ہی نہیں

جگر مراد آبادی

جب کوئی حادثۂ کون و مکاں ہوتا ہے
ذرہ ذرہ میری جانب نگراں ہوتا ہے

قمر جلالوی

یادِ شباب یوں ہے دلِ ناتواں سے دور
جیسے کوئی غریب مسافر مکاں سے دور
دلِ شکستہ سے جا رہی ہے ان کی یاد
مکیں کو جیسے ہو ٹوٹے ہوئے مکاں سے گریز

شکیب جلالی

دشت بھی اس کے مکیں ‘ شہر بھی اس میں آباد
تو جہاں آن بسے دل وہ مکاں کیوں نہ ہوا

عرفان صدیقی

کوئی آواز نہیں ہے پسِ دیوار سخن
عشق نے چھوڑ دیا ہے یہ مکاں بھی شاید
کوئی یاد آئے تو یہ دل کے دریچے وا ہوں
آنے والا ہی نہیں کوئی، مکاں کیسے کھلے
کسی تعبیر نے کھڑکی سے نہ جھانکا، عرفانؔ
شوق کی راہ میں خوابوں کے مکاں تھے کتنے
زیرِ محراب نہ بالائے مکاں بولتی ہے
خامشی آ کے سر خلوتِ جاں بولتی ہے

مجید امجد

ترس رہے ہیں سدا خشت خشت لمحوں کے دیس
جو میرے دل میں ہے اس شہرِ بے مکاں کے لیے

جمال احسانی

ایک میں آباد ہوں اس شہر میں
اور اک میرا مکاں آباد ہے

رئیس فروغؔ

عشق ہو جائے جواں ایسا ہے
شہر میں ایک مکاں ایسا ہے

ادا جعفری

کوئی طائر ادھر نہیں آتا
کیسی تقصیر اس مکاں سے ہوئی

بہزاد لکھنوی

ہونا ہی کیا ضرور تھے یہ دو جہاں ہیں کیوں
اللہ اک فریب میں کون و مکاں ہیں کیوں

بشیر بدر

مرے لبوں پہ کوئی بوند ٹپکی آنسو کی
یہ قطرہ کافی تھا جلتے ہوئے مکاں کے لئے

ضیا جالندھری

خود کو سمجھا ہے فقط وہم و گماں بھی ہم نے
خود کو پایا ہے دل کون و مکاں بھی ہم نے

ثروت حسین

تھامی ہوئی ہے کاہکشاں اپنے ہاتھ سے
تعمیر کر رہا ہوں مکاں اپنے ہاتھ سے
گردش سیارگاں خوب ہے اپنی جگہ
اور یہ اپنا مکاں خوب ہے اپنی جگہ

حفیظ جالندھری

نگاہیں کام دیتی ہیں نہ راہیں
مکان و لا مکاں والے نے مارا

حفیظ ہوشیارپوری

لوٹ کر نور کی کرن جیسے
سفر لا مکاں سے آتی ہے

رسا چغتائی

اٹھا لایا ہوں سارے خواب اپنے
تری یادوں کے بوسیدہ مکاں سے

خاطر غزنوی

حدِ پرواز مری اتنی ہے
لا مکاں کو بھی مکاں تک سوچوں

شکیل بدایونی

وہ دل میں رہتے ہیں دل کا نشاں نہیں معلوم
مکین ڈھونڈ رہا ہوں مکاں نہیں معلوم
لطیف پردوں سے تھے نمایاں مکیں کے جلوے مکاں سے پہلے
محبت آئینہ ہو چکی تھی وجود بزمِ جہاں سے پہلے
روشن ضمیر جیسے کوئی صرف دید ہوئے
یوں جلوہ ہائے کون و مکاں دیکھتا ہوں میں

فانی بدایونی

ہو بھی چکے تھے دام محبت میں ہم اسیر
عالم ابھی بقید زمان و مکاں نہ تھا

اختر ہوشیارپوری

ہر ایک رخت سفر کو اٹھائے پھرتا تھا
کوئی مکیں نہ کہیں تھا مکاں کے ہوتے ہوئے
نکل کر آ گئے ہیں جنگلوں میں
مکاں کو لا مکاں کرنا پڑا ہے

اکبر حمیدی

کبھی جو وقت زمانے کو دیتا ہے گردش
مرے مکاں سے بھی کچھ لا مکاں گزرتے ہیں

احمد فراز

کچھ روشنی شہر کو ملی تو
جلتا ہے جلے مکاں میرا

فراق گورکھپوری

آج پھر عشق دو عالم سے جدا ہوتا ہے
آستینوں میں لیے کون و مکاں ہے کہ جو تھا
غم ترا جلوہ گہہ کون و مکاں ہے کہ جو تھا
یعنی انسان وہی شعلہ بجاں ہے کہ جو تھا
کچھ بھی عیاں نہاں نہ تھا کوئی زماں مکاں نہ تھا
دیر تھی اک نگاہ کی پھر یہ جہاں جہاں نہ تھا
یہ موت و عدم کون و مکاں اور ہی کچھ ہے
سن لے کہ مرا نام و نشاں اور ہی کچھ ہے

قتیل شفائی

حدود جلوۂ کون و مکاں میں رہتے ہیں
نہ جانے اہلِ نظر کس جہاں میں رہتے ہیں

محسن نقوی

بجلیوں سے بھری بارشیں زور پر
اپنی بستی میں کچا مکاں ایک میں

ناصر کاظمی

دل عجب گوشۂ فراغت ہے
کیوں بھٹکتے ہو اس مکاں سے دور
دل ترے بعد سو گیا ورنہ
شور تھا اس مکاں میں کیا کیا کچھ
سفرِ شوق کے فرسنگ نہ پوچھ
وقت بے قیدِ مکاں تھا پہلے
ہر خرابہ یہ صدا دیتا ہے
میں بھی آباد مکاں تھا پہلے
زمیں چل رہی ہے کہ صبحِ زوالِ زماں ہے
کہو اے مکینو کہاں ہو یہ کیسا مکاں ہے