انشاء اللہ خان انشا

حضرتِ دل تو بگاڑ آئے ہیں اس سے لیکن
اب بھی ہم چاہیں تو پھر بات بنا سکتے ہیں
ہم تو ہنستے نہیں پر آپ کے ہنسنے کے لیے
اور اگر سانگ نہیں کوئی بنا سکتے ہیں

بہادر شاہ ظفر

دیکھو انساں خاک کا پتلا بنا کیا چیز ہے
بولتا ہے اس میں کیا وہ بولتا کیا چیز ہے

حیدر علی آتش

سوزِ دل و جگر کی شدت پھر آج کل ہے
پھر پہلوؤں کے تکیے مشعل بنا دیے ہیں

داغ دہلوی

نامہ بر تجھ کو سلیقہ ہی نہیں
کام باتوں میں بنا کرتے ہیں
کس خوشی کی خبر سنا کے مجھے
غم کا پتلا بنا دیا تو نے
دیکھیں مسجد ہو کہ مے خانہ ہو پہلے آباد
دونوں دیوار بہ دیوار بنا ہوتے ہیں

شیخ ابراہیم ذوق

دیوانہ آ کے اور بھی دل کو بنا چلے
اک دم تو ٹھہرو اور بھی کیا آئے کیا چلے
دکھلا کے مجھ کو نرگسِ بیمار کیا چلے
آوارہ مثل آہوئے صحرا بنا چلے
سلجھائیں زلفیں کیا لب دریا پہ آپ نے
ہر موج مثل مارسیہ تم بنا چلے
نوک مژگاں جب ہوئی سینہ فگاروں سے دو چار
پارہ ہائے دل سے گلدستہ بنا کر لے گئی

مصحفی غلام ہمدانی

تو آ کے تو دیکھ در پہ تیرے
کیا سانگ بنا ہوا کھڑا ہے
خونیں کفن شہید الفت
دولہا سا بنا ہوا کھڑا ہے
ہرگز رہا نہ ان کا نشاں وہ جو مصحفیؔ
قصر و محل زمیں پہ بنا کر چلے گئے

فیض احمد فیض

وہ مرے ہو کے بھی مرے نہ ہوئے
ان کو اپنا بنا کے دیکھ لیا
جو رکے تو کوہِ گراں تھے ہم، جو چلے تو جاں سے گزر گئے
رہِ یار ہم نے قدم قدم تجھے یادگار بنا دیا

مرزا رفیع سودا

غرہ مت ہو جو زمانے سے تری بن آئی
تھا وہ کیا کیا کہ نہ بگڑا نہ بنا کیا کیا کچھ

یگانہ چنگیزی

خودی کا نشہ چڑھا آپ میں رہا نہ گیا
خدا بنے تھے یگانہؔ مگر بنا نہ گیا

باقی صدیقی

خود کو دیکھا تو نہ پہچان سکے
ہم بھی کیا حال بنا بیٹھے ہیں
صحبت شیشہ گراں سے انکار
سنگ آئنہ بنا ہے کہ نہیں
دیوانہ اپنے آپ سے تھا بے خبر تو کیا
کانٹوں میں ایک راہ بنا کر چلا گیا
کس نے دیکھا ہے غم کا آئنہ
دل تماشا بنا تھا پہلے بھی

جگر مراد آبادی

میری حیات عشق کو دے کر جنونِ شوق
مجھ کو تمام ہوش بنا کر چلے گئے
ہر شے کو میری خاطر ناشاد کے لیے
آئینۂ جمال بنا کر چلے گئے
آئے تھے چشمِ شوق کی حسرت نکالنے
سر تا قدم نگاہ بنا کر چلے گئے
شکر کرم کے ساتھ یہ شکوہ بھی ہو قبول
اپنا سا کیوں نہ مجھ کو بنا کر چلے گئے
اپنا زمانہ آپ بناتے ہیں اہلِ دل
ہم وہ نہیں کہ جن کو زمانہ بنا گیا
خوشا وہ جان جسے دی گئی امانت عشق
رہے وہ دل جسے اپنا بنا کے لوٹ لیا
نگاہ ڈال دی جس پر حسین آنکھوں نے
اسے بھی حسنِ مجسم بنا کے لوٹ لیا
ہائے اس مرد کی قسمت جو ہوا دل کا شریک
ہائے اس دل کا مقدر جو بنا دل میرا
نگاہوں کا مرکز بنا جا رہا ہوں
محبت کے ہاتھوں لٹا جا رہا ہوں
نیا زمانہ بنانے چلے تھے دیوانے
نئی زمین نیا آسماں بنا نہ سکے

سراج الدین ظفر

بزم میں اے نگاہِ دوست اس طرح اہلِ دل سے کھیل
اس کو مٹا کے بھول جا اس کو بنا کے بھول جا

عبدالحمید عدم

عدمؔ بڑے ادب آداب سے حسینوں نے
ہمیں ستم کا نشانہ بنا کے مار دیا

عرفان صدیقی

عشق میاں اس آگ میں میرا ظاہر ہی چمکا دینا
میرے بدن کی مٹی کو ذرا کندن رنگ بنا دینا
نظر آنے لگے اپنے ہی خط و خالِ زوال
اور دیکھا کرو آئینہ بنا کر اس کو
ہے مری خاکِ بدن آئینہ گر تیرا کمال
تو نے کس چیز کو آئینہ بنا رکھا ہے
ہم نے ان لفظوں کے پیچھے ہی چھپایا ہے تجھے
اور انہیں سے تری تصویر بنا چاہتی ہے

الطاف حسین حالی

فرہاد کوہکن کی لی تو نے جانِ شیریں
اور قیس عامری کو مجنوں بنا کے چھوڑا
افسانہ تیرا رنگین، روداد تیری دلکش
شعر و سخن کا تو نے جادو بنا کے چھوڑا

جمال احسانی

مجھ کو معلوم ہے میری خاطر
کہیں اک جال بنا رکھا ہے

رئیس فروغؔ

اپنی انا کا جال کسی دن پاگل پن میں توڑوں گا
اپنی انا کے جال کو میں نے پاگل پن میں بنا بھی ہے
ماتھے پہ جو زخموں سے دوراہا سا بنا ہے
یہ آدمی احساس کی سائیکل سے گرا ہے
اس جسم کو ہر وقت دوا چاہیے کوئی
معلوم نہیں کون سی مٹی سے بنا ہے

احسان دانش

جرأت لمس بھی امکان طلب میں ہے مگر
یہ نہ ہو اور گناہ گار بنا دو ہم کو
نہ کچھ ملال‌ اسیری نہ خطرۂ صیاد
قفس سمجھ کے نشیمن بنا رہا ہے کوئی
کسی کو اس کی خبر ہی نہیں تھی کچھ احسانؔ
کہ مٹ کے اپنا زمانہ بنا رہا ہے کوئی

اختر شیرانی

فکرِ فردا و غم دوش بھلا دے آ کر
پھر اسی ناز سے دیوانہ بنا دے آ کر
شوق نادیدہ میں لذت ہے مگر ناز نہیں
آ مرے عشق کو مغرور بنا دے آ کر
کب تلک رونق شام اودھ اے ماہِ رواں
شام لاہور کو بھی صبح بنا دے آ کر
گومتی دیکھ چکی جلوۂ عارض کی بہار
سطح راوی کو بھی آئینہ بنا دے آ کر
جوانی ہو گر جاؤدانی تو یا رب
تری سادہ دنیا کو جنت بنا دیں
تم افسانۂ قیس کیا پوچھتے ہو
ادھر آؤ ہم تم کو لیلیٰ بنا دیں

ادا جعفری

روز و شب کی کوئی صورت تو بنا کر رکھوں
کسی لہجے کسی آہٹ کو سجا کر رکھوں

اسرار الحق مجاز

نقابِ رخ سے اٹھا چکے ہیں کھڑے ہوئے مسکرا رہے ہیں
میں حیرتی ازل ہوں اب بھی وہ خاک حیراں بنا رہے ہیں
عطا کیا ہے مجازؔ فطرت نے وہ مذاق لطیف ہم کو
کہ عالم آب و گل سے ہٹ کر اک اور عالم بنا رہے ہیں

اکبر معصوم

نیند میں گنگنا رہا ہوں میں
خواب کی دھن بنا رہا ہوں میں

سدرشن فاکر

ہر اک موڑ پر ہم غموں کو سزا دیں
چلو زندگی کو محبت بنا دیں
کبھی غم کی آندھی جنہیں چھو نہ پائے
وفاؤں کے ہم وہ نشیمن بنا دیں

ظہیر کاشمیری

دل مر چکا ہے اب نہ مسیحا بنا کرو
یا ہنس پڑو یا ہاتھ اٹھا کر دعا کرو
اک سوز اک دھواں ہے پسِ پردہ جمال
تم لاکھ شمع بزم رقیباں بنا کرو

عبید اللہ علیم

سچ ہوں تو مجھے امر بنا دے
جھوٹا ہوں تو نقش سب مٹا دے
تمام رنگ مرے اور سارے خواب مرے
فسانہ تھے کہ فسانہ بنا گیا اک شخص
کھلا یہ راز کہ آئینہ خانہ ہے دنیا
اور اس میں مجھ کو تماشا بنا گیا اک شخص
اب کہیں بولتا نہیں غیب جو کھولتا نہیں
ایسا اگر کوئی خدا تم نے بنا لیا تو کیا

جوش ملیح آبادی

ایک مدت سے جو مفکر ہے
اس کو مطرب بنا رہا ہے یہ کون
جوشؔ میرے کھنڈر کو از سر نو
راجدھانی بنا رہا ہے یہ کون

حسرت موہانی

تم نے بال اپنے جو پھولوں میں بسا رکھے ہیں
شوق کو اور بھی دیوانہ بنا رکھا ہے
اللہ ری بہار کی رنگ آفرینیاں
صحنِ چمن کو تختۂ جنت بنا دیا
مل کے ان کی نگاہ جادو سے
دل کو حیراں بنا گئیں آنکھیں

حفیظ جالندھری

عشق نے عقل کو دیوانہ بنا رکھا ہے
زلف انجام کی الجھن میں پھنسا رکھا ہے
حسنِ نظر کی آبرو صنعت برہمن سے ہے
جس کو صنم بنا لیا اس کو خدا بنا دیا
ان تلخ آنسوؤں کو نہ یوں منہ بنا کے پی
یہ مے ہے خودکشید اسے مسکرا کے پی

رسا چغتائی

زلف اس کی ہے جو اسے چھو لے
بات اس کی ہے جو بنا لے جائے

سیف الدین سیف

دکھ تو دیتا ہے ترا غم لیکن
دل کو اکسیر بنا دیتا ہے

سیماب اکبر آبادی

محفل عشق میں جب نام ترا لیتے ہیں
پہلے ہم ہوش کو دیوانہ بنا لیتے ہیں
رنگ بھرتے ہیں وفا کا جو تصور میں ترے
تجھ سے اچھی تری تصویر بنا لیتے ہیں
جہاں خرابۂ ہستی مٹا رہا ہے کوئی
وہیں کہیں نئی دنیا بنا رہا ہے کوئی

شاد عظیم آبادی

ہزار تلخ ہو پیرِ مغاں نے جب دی ہے
خدا نہ کردہ جو میں منہ بنا بنا کے پیوں
جو پوچھیں حشر میں کچھ وہ تو ہاں دلا شاباش
وہاں بھی تو یوں ہی باتیں بنا کے رہ جانا

فانی بدایونی

روزِ جزا گلہ تو کیا شکرِ ستم ہی بن پڑا
ہائے کہ دل کے درد نے درد کو دل بنا دیا
جب دل میں ترے غم نے حسرت کی بنا ڈالی
دنیا مری راحت کی قسمت نے مٹا ڈالی
تسلیم کی نظر سے کرشمے رضا کے دیکھ
بیگانگی دوست کو اپنا بنا کے دیکھ
دنیا کو دیکھنا تو میسر نہیں تجھے
ذرے کو دیکھنا ہے تو دنیا بنا کے دیکھ

احمد فراز

وہی عشق جو تھا کبھی جنوں اسے روزگار بنا دیا
کہیں‌ زخم بیچ میں‌ آ گئے کہیں‌ شعر کوئی سنا دیا
جو کچھ ہو فراز اپنے تئیں، یار کے آگے
اس سے تو کوئی بات بنا تک نہیں آئی

امیر مینائی

اے انقلابِ دہر، مٹاتا ہے کیوں مجھے
نقشے ہزاروں مٹ گئے ہیں تب بنا ہوں میں
دل جدا، مال جدا، جان جدا لیتے ہیں
اپنے سب کام بگڑ کر وہ بنا لیتے ہیں
آدمی زاد ہیں دنیا کے حسیں، لیکن امیر
یار لوگوں نے پری زاد بنا رکھا ہے

شاذ تمکنت

وجہ آوارگی عشق فسردہ معلوم
نگہِ ناز کو پردہ سا بنا رکھا ہے
سانسوں میں بسے ہو تم آنکھوں میں چھپا لوں گا
جب چاہوں تمہیں دیکھوں آئینہ بنا لوں گا

فراق گورکھپوری

تب کہیں کچھ پتہ چلا صدق و خلوص حسن کا
جب وہ نگاہیں عشق سے باتیں بنا کے رہ گئیں

قابل اجمیری

ہم نے اس کے لب و رخسار کو چھو کر دیکھا
حوصلے آگ کو گلزار بنا دیتے ہیں

قتیل شفائی

حالات سے خوف کھا رہا ہوں
شیشے کے محل بنا رہا ہوں
لوٹا ہے سدا جس نے ہمیں دوست بنا کر
ہم خوش ہیں اسی شخص سے پھر ہاتھ ملا کر
ڈر ہے کہ نہ لے جائے وہ ہم کو بھی چرا کر
ہم لائے ہیں گھر میں جسے مہمان بنا کر
اک موج دبے پاؤں تعاقب میں چلی آئی
ہم خوش تھے بہت ریت کی دیوار بنا کر
اپنے ہاتھوں کی لکیروں میں سجا لے مجھ کو
میں ہوں تیرا تو نصیب اپنا بنا لے مجھ کو

کلیم عاجز

گو ستم نے تیرے ہر اک طرح مجھے ناامید بنا دیا
یہ مری وفا کا کمال ہے کہ نباہ کر کے دکھا دیا

ناصر کاظمی

آہ پھر نغمہ بنا چاہتی ہے
خامشی طرزِ ادا چاہتی ہے
وہم کی مکڑی نے چہرے پر
مایوسی کا جال بنا تھا