بہادر شاہ ظفر

ہے شمعِ سر کے بل جو محبت میں گرم ہو
پروانہ اپنے دل سے یہ کہتا ہے جل کے چل

شیخ ابراہیم ذوق

جو چشم کہ بے نم ہو وہ ہو کور تو بہتر
جو دل کہ ہو بے داغ وہ جل جائے تو اچھا

مصطفٰیٰ خان شیفتہ

جی داغِ غمِ رشک سے جل جائے تو اچھا
ارمان عدو کا بھی نکل جائے تو اچھا

مومن خان مومن

آگ اشک گرم کو لگے جی کیا ہی جل گیا
آنسو چو اس نے پونچھے شب اور ہاتھ پھل گیا
کیا باتیں بناتا ہے وہ جان جلاتا ہے
پانی میں دکھاتا ہے کافور کا جل جانا

فیض احمد فیض

بزمِ خیال میں ترے حسن کی شمع جل گئی
درد کا چاند بجھ گیا، ہجر کی رات ڈھل گئی

باقی صدیقی

اپنی دھوپ میں بھی کچھ جل
ہر سائے کے ساتھ نہ ڈھل
دنیا برف کا تودہ ہے
جتنا جل سکتا ہے جل
اشکوں میں خیال ڈھل رہے ہیں
بجھ بجھ کے چراغ جل رہے ہیں
کہتے ہیں اسے نصیب باقیؔ
پانی سے چراغ جل رہے ہیں

جون ایلیا

جی ہی جی میں وہ جل رہی ہو گی
چاندنی میں ٹہل رہی ہو گی
سو گئی ہو گی وہ شفق اندام
سبز قندیل جل رہی ہو گی
شاخ امید جل گئی ہو گی
دل کی حالت سنبھل گئی ہو گی
ہم نے دیکھے تھے خواب شعلوں کے
نیند آنکھوں میں جل گئی ہو گی

عبدالحمید عدم

مری جوانی کے گرم لمحوں پہ ڈال دے گیسوؤں کا سایہ
یہ دوپہر کچھ تو معتدل ہو تمام ماحول جل رہا ہے
یہ بھینی بھینی سی مست خوشبو یہ ہلکی ہلکی سی دل نشیں بو
یہیں کہیں تیری زلف کے پاس کوئی پروانہ جل رہا ہے

قمر جلالوی

باغباں برق کا جب طور بدل جاتا ہے
یہ نشیمن تو ہے کیا طور بھی جل جاتا ہے
عشق اور حسن سے مانوس یہ کیسے مانیں
شمع کو دیکھ کہ پروانہ تو جل جاتا ہے
یاس و امید کا عالم ہے یہ شامِ وعدہ
کبھی بجھتا ہے چراغ اور کبھی جل جاتا ہے
موسیٰؑ سمجھے تھے ارماں نکل جائے گا
یہ خبر ہی نہ تھی طور جل جائے گا

عرفان صدیقی

بدن کے دونوں کناروں سے جل رہا ہوں میں
کہ چھو رہا ہوں تجھے اور پگھل رہا ہوں میں
یہ ہوس ہو کہ محبت ہو، مگر چہرے پر
اک نیا رنگ اسی آگ میں جل کر آیا

رئیس فروغؔ

جب سے تمہارا ساتھ ہوا ہے
روز ذرا سے جل جاتے ہیں

ادا جعفری

سانچے میں خبر کے ڈھل رہی تھی
اک خواب کی لو سے جل رہی تھی

بیان میرٹھی

مہر تم سوختہ میں شیشۂ آتش ہے رقیب
اس پہ ڈالو گے تجلی تو میں جل جاؤں گا

زہرا نگاہ

اس شہر کو راس آئی ہم جیسوں کی گم نامی
ہم نام بتاتے تو یہ شہر بھی جل جاتا

ضیا جالندھری

شجر جلتے ہیں شاخیں جل رہی ہیں
ہوائیں ہیں کہ پیہم چل رہی ہیں
اندھیروں میں کمی کیا ہو گی لیکن
یہ شمعیں شام ہی سے جل رہی ہیں

عبید اللہ علیم

میں وہ چراغِ سرِ رہ گزار دنیا ہوں
جو اپنی ذات کی تنہائیوں میں جل جائے

غلام محمد قاصر

میرے قصے میں اچانک جگنوؤں کا ذکر آیا
آسماں پر میرے حصے کے ستارے جل رہے ہیں

ماجد صدیقی

خون میں برپا رہتی تھی جو ہلچل سی
اب کے لگے ہے ٹھہری وہ ٹھنڈے جل سی

ثروت حسین

اک روز میں بھی باغ عدن کو نکل گیا
توڑی جو شاخ رنگ فشاں ہاتھ جل گیا

شکیل بدایونی

تری گفتگو کو ناصح دل غم زدہ سے جل کر
ابھی تک تو سن رہا تھا مگر اب سنبھل سنبھل کر

عزیز حامد مدنی

مری آنکھیں گواہ طلعت آتش ہوئیں جل کر
پہاڑوں پر چمکتی بجلیاں نکلیں ادھر چل کر
جب آئی ساعت بے تاب تیری بے لباسی کی
تو آئینے میں جتنے زاویے تھے رہ گئے جل کر

اختر ہوشیارپوری

آندھی میں چراغ جل رہے ہیں
کیا لوگ ہوا میں پل رہے ہیں

احمد فراز

یہ شعلگی ہو بدن کی تو کیا کیا جائے
سو لازمی تھا ترے پیرہن کا جل جانا
یہ کون لوگ ہیں موجود تیری محفل میں
جو لالچوں سے تجھے مجھ کو جل کے دیکھتے ہیں
ابھی تلک تو نہ کندن ہوئے نہ راکھ ہوئے
ہم اپنی آگ میں ہر روز جل کے دیکھتے ہیں

امیر مینائی

کیا قصد جب کچھ کہوں ان کو جل کر
دبی بات ہونٹوں میں منہ سے نکل کر
وہ ہوں لالہ ساں سوختہ بخت میکش
کہ مے ہو گئی داغ ساغر میں جل کر

شاذ تمکنت

تشنہ لبی کہیں مجھے غرقاب کر نہ دے
تھوڑی سی روشنی کے لیے گھر ہی جل نہ جائے

فراق گورکھپوری

حیات لو تہ‌ دامان مرگ دے اٹھی
ہوا کی راہ میں یہ شمع جل تو سکتی ہے

مجروح سلطان پوری

مجھے سہل ہو گئیں منزلیں وہ ہوا کے رخ بھی بدل گئے
ترا ہاتھ ہاتھ میں آ گیا کہ چراغِ راہ میں جل گئے

ناصر کاظمی

برف کے نگر میں
آگ جل رہی ہے