داغ دہلوی

دل میں ہے غم و رنج و الم، حرص و ہوا بند
دنیا میں مخمس کا ہمارے نہ کھلا بند

مومن خان مومن

پھیلی وہ بو جو ہم میں نہاں مثل غنچہ تھی
جھونکے نسیم کے یہ نیا گل کھلا گئے

فیض احمد فیض

یاد کا پھر کوئی دروازہ کھلا آخرِ شب
دل میں بکھری کوئی خوشبوئے قبا آخرِ شب

جون ایلیا

مست ہوں میں مہک سے اس گل کی
جو کسی باغ میں کھلا ہی نہیں

خواجہ میر درد

دل کے پھر زخمِ تازہ ہوتے ہیں
کہیں غنچہ کوئی کھلا ہو گا

قمر جلالوی

تنہا وہ مری قبر پہ ہیں چاکِ گریباں
جیسے کسی صحرا میں کوئی پھول کھلا ہو

شکیب جلالی

اے روشنی کی لہر‘ کبھی تو پلٹ کے آ
تجھ کو بلا رہا ہے دریچہ کھلا ہوا

عرفان صدیقی

سینے کے ویرانے میں یہ خوشبو ایک کرامت ہے
ورنہ اتنا سہل نہیں تھا راکھ میں پھول کھلا دینا
جب ادھر سے ہو کے گزرے گا گہر افشاں جلوس
میرا دروازہ کھلا ہو گا علیؑ آنے کو ہیں
کیا چھپاؤں مرے مہتاب کہ تیرے آگے
دل کف دست کے مانند کھلا رکھا ہے

مجید امجد

رہیں دردوں کی چوکیاں چوکس
پھول لوہے کی باڑ پر بھی کھلا

اختر حسین جعفری

ایک پردہ ہٹا ایک چہرہ کھلا رات ڈھلنے لگی رت بدلنے لگی
چاند چلتا ہوا مہر سے جا ملا رات ڈھلنے لگی رت بدلنے لگی
دل سے نکلا لبوں تک سوال آ گیا اپنے رہنے سے چل کر غزال آ گیا
بند رخت صبا باب نافہ کھلا رات ڈھلنے لگی رت بدلنے لگی

رئیس فروغؔ

روشنیوں پہ پاؤں جما کے چلنا ہم کو آئے نہیں
ویسے در خورشید تو ہم پر گاہے گاہے کھلا بھی ہے
کوئی بھی جس کے پیچھے نہ تھا
وہ دروازہ کھلا نہیں
ابر کی اوٹ میں کہیں نرم سی دستکیں ہوئیں
ساتھ ہی کوئی در کھلا پھر مجھے نیند آ گئی

اختر شیرانی

ہو چکی سیر بہاراں کدۂ قیصر باغ
باغ لارنس میں بھی پھول کھلا دے آ کر

ادا جعفری

اس قدر تیز ہوا کے جھونکے
شاخ پر پھول کھلا تھا شاید

بشیر بدر

دعا کرو کہ یہ پودا سدا ہرا ہی لگے
اداسیوں میں بھی چہرہ کھلا کھلا ہی لگے
مان موسم کا کہا چھائی گھٹا جام اٹھا
آگ سے آگ بجھا پھول کھلا جام اٹھا

ضیا جالندھری

عجیب لمحہ وہ دیدار حسنِ یار کا تھا
اس ایک پل کی تجلی میں یہ کھلا کہ میں ہوں

فارغ بخاری

کچھ اب کے بہاروں کا بھی انداز نیا ہے
ہر شاخ پہ غنچے کی جگہ زخم کھلا ہے

ماجد صدیقی

صورت خار دے چبھن، صورت گل کھلا مجھے
تجھ پہ ہے اب یہ فیصلہ، چاہیے انتہا مجھے
جانے وہ ہم سے کیوں جھینپتا رہ گیا
بھید اس پر ہمارا کھلا بھی نہ تھا

جوش ملیح آبادی

کوری آنکھوں کے تازہ اشکوں سے
اک نیا گل کھلا رہا ہے یہ کون

حسرت موہانی

نگہِ یار سے پیکان قضا کا مشتاق
دلِ مجبور نشانے پہ کھلا رکھا ہے

حفیظ جالندھری

داغ ہے مجھ پہ عشق کا میرا گناہ بھی تو دیکھ
اس کی نگاہ بھی تو دیکھ جس نے یہ گل کھلا دیا

رسا چغتائی

الفاظ میں بند ہیں معانی
عنوان کتاب دل کھلا ہے

خاطر غزنوی

کب دہلا ہے آفات زمانہ سے مرا دل
طوفانوں کو آنا ہے تو دروازہ کھلا ہے

سیف الدین سیف

تم تو کہتے تھے کہ رت کا جادو
دشت میں پھول کھلا دیتا ہے

احمد فراز

دشتِ افسردہ میں اک پھول کھلا ہے سو کہاں
وہ کسی خوابِ گریزاں میں ملا ہے سو کہاں

شاذ تمکنت

میں لوٹ آؤں کہیں تو یہ سوچتا ہی نہ ہو
کہ رات دیر گئے تیرا در کھلا ہی نہ ہو

قتیل شفائی

جو بھی غنچہ ترے ہونٹوں پہ کھلا کرتا ہے
وہ تری تنگی داماں کا گلا کرتا ہے
جب مری سیج پہ ہوتا ہے بہاروں کا نزول
صرف اک پھول کواڑوں میں کھلا کرتا ہے
لوگ کہتے ہیں جسے نیل کنول وہ تو قتیلؔ
شب کو ان جھیل سی آنکھوں میں کھلا کرتا ہے

قیوم نظر

احساس نو نے زیست کا نقشہ بدل دیا
محرومیوں کا یوں تو چمن ہے کھلا ہوا

ناصر کاظمی

اک رخسار پہ زلف گری تھی
اک رخسار پہ چاند کھلا تھا
کالے پتھر کی سیڑھی پر
نرگس کا اک پھول کھلا تھا
آگ کی محل سرا کے اندر
سونے کا بازار کھلا تھا
پیٹ کی ہری بھری کیاری میں
سرج مکھی کا پھول کھلا تھا
دیر کے بعد مرے آنگن میں
سرخ انار کا پھول کھلا تھا
چاندی کا وہی پھول گلے میں
ماتھے پر وہی چاند کھلا تھا
خوشوں کے اندر خوشے تھے
پھول کے اندر پھول کھلا تھا
سوکھ گئی جب سکھ کی ڈالی
تنہائی کا پھول کھلا تھا
جز دل کوئی مکان نہیں دہر میں جہاں
رہزن کا خوف بھی نہ رہے در کھلا بھی ہو
دوست بچھڑے ہیں کئی بار مگر
یہ نیا داغ کھلا ہے اب کے
ہاتھ ملتے ہی رہیں گے گل چیں
آج وہ پھول کھلا ہے دل میں
کہیں چہرے کہیں آنکھیں کہیں ہونٹ
اک صنم خانہ کھلا ہے دل میں