مرزا غالب

موجِ خوں سر سے گزر ہی کیوں نہ جائے
آستان یار سے اٹھ جائیں کیا
دوست غمخواری میں میری سعی فرمائیں گے کیا
زخم کے بھرنے تلک ناخن نہ بڑھ جائیں گے کیا
گر کیا ناصح نے ہم کو قید، اچھا یوں سہی
یہ جنونِ عشق کے انداز چھٹ جائیں گے کیا

داغ دہلوی

لالچ عبث ہے دل کا تمہیں وقت واپسیں
یہ مال وہ نہیں کہ جسے چھوڑ جائیں ہم
جنت میں جائیں ہم کہ جہنم میں جائیں ہم
مل جائے تو کہیں نہ کہیں تجھ کو پائیں ہم

میر مہدی مجروح

ہمیں زہر و خنجر کی کیوں ہے تلاش
شبِ غم میں کیا مر نہ جائیں گے ہم
عبث ہے یہ مجروحؔ طولِ امل
بکھیڑے یہ سب چھوڑ جائیں گے ہم

فیض احمد فیض

ویرانی حیات کو ویران تر کریں
لے ناصح آج تیرا کہا مان جائیں ہم
سلجھائیں بے دلی سے یہ الجھے ہوئے سوال
واں جائیں یا نہ جائیں، نہ جائیں کہ جائیں ہم

باقی صدیقی

… نغمہ اس طرف آتا ہیں
… محفل بن کے ہم اڑ جائیں کیا
آغازِ سفر میں کیا خبر تھی
یوں راہ میں بیٹھ جائیں گے ہم
ہوتے رہتے ہیں زخمِ تازہ
تم ساتھنہ ہو تو بھول جائیں

قمر جلالوی

اے قفس والو رہائی کی تمنا ہے فضول
فصلِ گل آنے سے پہلے پر نہ کٹ جائیں گے کیا
جانتا ہوں پھونک دے گا تیرے گھر کو باغباں
آشیاں کے پاس والے پھول رہ جائیں گے کیا
ان کی محفل میں چلا آیا ہے دشمن خیر ہو
مثلِ آدم ہم بھی جنت سے نکل جائیں گے کیا
تو نے طوفاں دیکھتے ہی کیوں نگاہیں پھیر لیں
ناخدا یہ اہل کشتی ڈوب ہی جائیں گے کیا
کوئی تو مونوس رہے گا اے قمر شامِ فراق
شمع گل ہو گی تو یہ تارے بھی چھپ جائیں گے کیا

عرفان صدیقی

جب پوچھنے والا کوئی نہیں
زندہ ہیں تو کیا مر جائیں تو کیا

مجید امجد

کب تک گزری باتیں یاد کریں، پچھتائیں
آؤ، آج ان مست ہواؤں میں بہہ جائیں
ٹوٹے پیمانوں کی ٹھیکریوں کے سفینے
بیتے سمے یادوں کی رو میں بہتے جائیں

الطاف حسین حالی

واں اگر جائیں تو لے کر جائیں کیا
منہ اسے ہم جا کے یہ دکھلائیں کیا
آؤ لیں اس کو ہمیں جا کر منا
اس کی بے پروائیوں پر جائیں کیا

رئیس فروغؔ

آنکھوں کے کشکول شکستہ ہو جائیں گے شام کو
دن بھر چہرے جمع کیے ہیں کھو جائیں گے شام کو

اختر شیرانی

کام آ سکیں نہ اپنی وفائیں تو کیا کریں
اس بے وفا کو بھول نہ جائیں تو کیا کریں
عہد طرب کی یاد میں رویا کیے بہت
اب مسکرا کے بھول نہ جائیں تو کیا کریں

بشیر بدر

خواب آئینے ہیں آنکھوں میں لیے پھرتے ہو
دھوپ میں چمکیں گے ٹوٹیں گے تو چبھ جائیں گے
صبح تک دل کے دریچوں کو کھلا رہنے دو
درد گمراہ فرشتے ہیں کہاں جائیں گے
اب تو انگاروں کے لب چوم کے سو جائیں گے
ہم وہ پیاسے ہیں جو دریاؤں کو ترسائیں گے

ظہیر کاشمیری

ہم بن گئے ہیں ادا تمہاری
چھیڑوگے تو روٹھ جائیں گے ہم
صحرا تو ظہیرؔ تنگ نکلا
اب دیکھیں کدھر کو جائیں گے ہم

ماجد صدیقی

کبھی تو موت کا یہ ذائقہ بھی چکھ دیکھیں
وہ جس میں جان ہے اس سے بچھڑ بھی جائیں کبھی

سیف الدین سیف

جب تصور میں نہ پائیں گے تمہیں
پھر کہاں ڈھونڈنے جائیں گے تمہیں

شکیل بدایونی

یہ تمام غنچہ و گل میں ہنسوں تو مسکرائیں
کبھی یک بیک جو رو دوں تو ستارے ٹوٹ جائیں
مرے داغِ دل کی تابش جو کبھی یہ دیکھ پائیں
وہیں رشک بے اماں سے مہ و مہر ڈوب جائیں

عزیز حامد مدنی

انشاؔ جی ہے نام انہی کا چاہو تو تم سے ملوائیں
ان کی روح دہکتا لاوا ہم تو ان کے پاس نہ جائیں
بستی سے گزریں تو سارے پنگھٹ کی الھڑ ابلائیں
ان کی پیاس بجھانے کو خود امڈ گھمڈ بادل بن جائیں
نگری نگری گھومنے والوں میں ان کی مشہور کتھائیں
ویسے بات کرو تو لاج سے ان کی آنکھیں جھک جھک جائیں

احمد فراز

اب اور کیا کسی سے مراسم بڑھائیں ہم
یہ بھی بہت ہے ، تجھ کو اگر بھول جائیں ہم
اس زندگی میں اتنی فراغت کسے نصیب
اتنا نہ یاد آ کہ تجھے بھول جائیں ہم

امیر مینائی

جی میں ہے اب وہاں نہ جائیں ہم
دل کی طاقت بھی آزمائیں ہم