مرزا غالب

ہے جوشِ گل بہار میں یاں تک کہ ہر طرف
اڑتے ہوئے الجھتے ہیں مرغِ چمن کے پاؤں
حضورِ شاہ میں اہلِ سخن کی آزمائش ہے
چمن میں خوش نوایانِ چمن کی آزمائش ہے

امام بخش ناسخ

جو عندلیب کی آنکھوں سے دیکھے وہ سمجھے
ظہور ہے اسی گل کا چمن کے پردے میں

انشاء اللہ خان انشا

نرگسستاں کی بھی ٹک دیکھو پھبن آئینے میں
باغ مت جاؤ کہ ہے امن و چمن آئینے میں
دیکھ کر اپنی بہار اس نے یہ انشاؔ سے کہا
باغ میں کب ہے چمن جو ہے چمن آئینے میں

حیدر علی آتش

جوش و خروش پر ہے بہارِ چمن ہنوز
پیتے ہیں نوجوان شرابِ کہن ہنوز
کہا بلبل نے جب توڑا گل سوسن کو گلچیں نے
الٰہی خیر کیجو نیل رخسار چمن بگڑا
باغ عالم کا ہر اک گل ہے خدا کی قدرت
باغباں کون ہے اس کا یہ چمن ہے کس کا
کوچۂِ دلبر میں میں بلبل چمن میں مست ہے
ہر کوئی یاں اپنے اپنے پیرہن میں مست ہے

شیخ ابراہیم ذوق

پھرتا لیے چمن میں ہے دیوانہ پن مجھے
زنجیرِ پا ہے موجِ نسیمِ چمن مجھے
آ اے مرے چمن کہ ہوا میں تری ہوا
صحرائے دل ہوا ہے چمن در چمن مجھے

مصحفی غلام ہمدانی

جلوہ گر اس کا سراپا ہے بدن آئنے میں
نظر آتا ہے ہمیں سرو چمن آئنے میں
دو پھول کوئی رکھ کر گزرا تھا جو کل یاں سے
تربت پہ مری بلوا مرغان چمن کا تھا
جس مرغِ چمن کو میں دیکھا تو چمن میں بھی
حسرت کش نظارہ اس رشک چمن کا تھا

فیض احمد فیض

حالِ چمن پر تلخ نوائی
مرغِ چمن، کچھ اس سے زیادہ

سراج الدین ظفر

در مے خانہ سے دیوارِ چمن تک پہنچے
ہم غزالوں کے تعاقب میں ختن تک پہنچے
پھرتی ہے جستجو میں نسیم وطن کہاں
اب میں خزاں رسیدہ کہاں اور چمن کہاں
آتا ہے کون ہجر میں اے ذوق انتظار
دورِ خزاں میں صدر نشین چمن کہاں
جو ان کی رہ گزر میں پڑے تھے پڑے رہے
جاتے ظفرؔ یہ خلوتیان چمن کہاں

قمر جلالوی

صبر آ گیا یہ کہہ کر دل سے غمِ وطن میں
سب پھول ہی نہیں کانٹے بھی تھے چمن میں
صیاد باغباں کی ہم سے کبھی نہ کھٹکی
جیسے رہے قفس میں ویسے رہے چمن میں
صیاد آج کل میں شاید قفس بدل دے
خوشبو بتا رہی ہے پھول آ گئے چمن میں
اے باغباں تجھے بھی اتنی خبر تو ہو گی
جب ہم چمن میں آئے کچھ بھی نہ تھا چمن میں
نہ روکی برق تو نے آشیاں بدلے چمن بدلے
یہ کب کے لے رہا ہے ہم سے اے چرخِ کہن بدلے

عرفان صدیقی

اس نے کیا دیکھا کہ ہر صحرا چمن لگنے لگا
کتنا اچھا اپنا من‘ اپنا بدن لگنے لگا
اب بدن سے موجِ خوں گزری تو اندازہ ہوا
کیا گزر جاتی ہے صحرا پہ چمن ہوتے ہوئے

مجید امجد

شاخِ ابد سے جھڑتے زمانوں کا روپ ہیں
یہ لوگ جن کے رخ پہ گمانِ چمن پڑے
اک پل بھی کوئے دل میں نہ ٹھہرا وہ رہ نورد
اب جس کے نقشِ پا ہیں چمن در چمن پڑے
صحرائے زندگی میں جدھر بھی قدم اٹھیں
رستے میں ایک آرزوؤں کا چمن پڑے

مصطفی زیدی

میں ایک اعتبار سے آتش پرست تھا
وہ سارے زاویوں سے چمن کی شریک تھی

الطاف حسین حالی

کبک و قمری میں ہے جھگڑا کہ چمن کس کا ہے
کل بتا دے گی خزاں یہ کہ وطن کس کا ہے
شان دیکھی نہیں گر تو نے چمن میں اس کی
ولولہ تجھ میں یہ اے مرغِ چمن کس کا ہے

احسان دانش

آیا نہیں ہے راہ پہ چرخِ کہن ابھی
خطرے میں دیکھتا ہوں چمن کا چمن ابھی
نبض بہار پر ہیں بگولوں کی انگلیاں
چلنے کو چل رہی ہے نسیمِ چمن ابھی
شبنم کے اشک سوکھنے دیتی نہیں فضا
ہنستا ہے خود بہارِ چمن پر چمن ابھی

اختر شیرانی

نہ ساز و مطرب نہ جام و ساقی نہ وہ بہارِ چمن ہے باقی
نگاہ شمعِ سحر کے پردے یہ نقشۂ انجمن ہے باقی

زہرا نگاہ

خزاں نے آ کے کہا میرے غم سے کیا حاصل
جہاں بہار لٹی اس چمن کی بات کرو

علی سردار جعفری

وطن سے دور یارانِ وطن کی یاد آتی ہے
قفس میں ہم نوایانِ چمن کی یاد آتی ہے

ثروت حسین

نہیں شام تیرہ سے مایوس میں
بیاباں کے پیچھے چمن بھی تو ہے

حسرت موہانی

کچھ دل ہی بجھ گیا ہے مرا ورنہ آج کل
کیفیت بہار کی شدت چمن میں تھی
روشن جمالِ یار سے ہے انجمن تمام
دہکا ہوا ہے آتشِ گل سے چمن تمام
نشو و نمائے سبزہ و گل سے بہار میں
شادابیوں نے گھیر لیا ہے چمن تمام

احمد فراز

اول اول تو نہ تھے واقفِ آداب قفس
اور اب رسم و رہ اہلِ چمن یاد نہیں
شگفتِ گل کی صدا میں رنگِ چمن میں آؤ
کوئی بھی رت ہو بہار کے پیرہن میں آؤ
کبھی ہم پر بھی ہو احسان کہ بنا دیتے ہو
اپنی آمد سے بیاباں کو چمن تم جیسے

امیر مینائی

منہ پھر نہ کر وطن کی طرف یوں وطن کو چھوڑ
چھوٹے جو بوئے گل کی طرح سے چمن کو چھوڑ
کہتی ہے بوئے گل سے صبا آ کے صبح دم
اب کچھ ادھر ادھر کی ہوا کھا، چمن کو چھوڑ

شاذ تمکنت

کئی مہر و مہ اتر آئے تھے وہ یہیں تھے میرے گھر آئے تھے
وہ کلی کلی سے در آئے تھے وہ چمن چمن سے چلے گئے

فراق گورکھپوری

رس میں ڈوبا ہوا لہراتا بدن کیا کہنا
کروٹیں لیتی ہوئی صبحِ چمن کیا کہنا

مجروح سلطان پوری

سوئے مقتل کہ پئے سیرِ چمن جاتے ہیں
اہلِ دل جام بہ کف سر بہ کفن جاتے ہیں
جو ٹھہرتی تو ذرا چلتے صبا کے ہم راہ
یوں بھی ہم روز کہاں سوئے چمن جاتے ہیں
ہمیں شعور جنوں ہے کہ جس چمن میں رہے
نگاہ بن کے حسینوں کی انجمن میں رہے
تو اے بہار گریزاں کسی چمن میں رہے
مرے جنوں کی مہک تیرے پیرہن میں رہے
جھونکے جو لگ رہے ہیں نسیم بہار کے
جنبش میں ہے قفس بھی اسیر چمن کے ساتھ
کہاں بچ کر چلی اے فصلِ گل مجھ آبلہ پا سے
مرے قدموں کی گل کاری بیاباں سے چمن تک ہے

محسن نقوی

کلیوں کی طرح پھوٹ سرِ شاخِ تمنا
خوشبو کی طرح پھیل چمن تا بہ چمن تو
خمار موسم خوشبو حد چمن میں کھلا
مری غزل کا خزانہ ترے بدن میں کھلا

ناصر کاظمی

پھول جھڑنے کی شام آ پہنچی
نو بہارِ چمن! چمن میں آ
مدت ہوئی کہ سیرِ چمن کو ترس گئے
گل کیا غبارِ بوئے سمن کو ترس گئے
ممکن نہیں متاعِ سخن مجھ سے چھین لے
گو باغباں یہ کنجِ چمن مجھ سے چھین لے
سینچی ہیں دل کے خون سے میں نے یہ کیاریاں
کس کی مجال میرا چمن مجھ سے چھین لے
موہنے لبھانے والے پیارے پیارے لوگ
دیکھنا چمن چمن بسنت آ گئی