مرزا غالب

ہے مشتمل نمودِ صور پر وجودِ بحر
یاں کیا دھرا ہے قطرہ و موج و حباب میں
لگاؤ اس کا ہے باعث قیامِ مستی کا
ہوا کو لاگ بھی ہے کچھ مگر حباب کے ساتھ

امام بخش ناسخ

وفور اشک سے کیوں ہے گلے تلک پانی
ہمارا کاسۂِ سر کاسۂِ حباب نہیں
بے ثبات اپنی بزمِ عیش جو ہے
شیشۂِ مے کی جا حباب ملا

انشاء اللہ خان انشا

ہے یہی ڈول جب تک آنکھوں میں
دم بسان حباب باقی ہے

بہادر شاہ ظفر

تری گلی میں بہائے پھرے ہے سیل سرشک
ہمارا کاسۂِ سر کیا ہوا حباب ہوا

حیدر علی آتش

دریائے خوں کیا ہے تری تیغ نے رواں
حاصل ہوا ہے رتبہ سروں کو حباب کا
اے موج بے لحاظ سمجھ کر مٹائیو
دریا بھی ہے اسیر طلسم حباب کا
کسی کے محرم آبِ رواں کی یاد آئی
حباب کے جو برابر کبھی حباب آیا

شیخ ابراہیم ذوق

گزرنے گر یہ مرے سر سے اتنا آب تو دے
کہ سر پہ چرخ بھی دکھلائی جوں حباب تو دے
رکھے ہے حوصلہ دریا کب اہلِ ہمت کا
نہیں یہ اتنا کہ بھر کاسۂِ حباب تو دے

مصحفی غلام ہمدانی

محروم ہے نامہ دارِ دنیا
پانی سے تہی حباب دیکھا
جو ہیں آشنائے مشرب وہ کسی سے ہوں نہ سائل
اسی واسطے رہے ہے قدح حباب الٹا
جز تیری ہوا کے اپنے سر میں
مانند حباب کچھ نہ نکلا
بحر جہاں میں دیر شد آمد روا نہیں
مانند قطرہ جا تو برنگ حباب آ
نت ترے انتظار غسل سے ہے
بحر کے دیدۂِ حباب میں جان

میر انیس

نمود و بود کو عاقل حباب سمجھے ہیں
وہ جاگتے ہیں جو دنیا کو خواب سمجھے ہیں
اگر غرور ہے اعدا کو اپنی کثرت پر
تو اس حیات کو ہم بھی حباب سمجھے ہیں

جون ایلیا

دامن میں کیے ہیں جمع گرداب
جیبوں میں حباب رکھ رہا ہوں
سرِ صحرا حباب بیچے ہیں
لب دریا سراب بیچے ہیں

جگر مراد آبادی

تو ہے دریائے حسن و محبوبی
شکل موج و حباب ہیں ہم لوگ
عین قربت بھی عین فرقت بھی
ہائے وہ قطرہ جو حباب ہوا
دل کو چھونا نہ اے نسیم کرم
اب یہ دل روکش حباب ہوا
غم کی ہر موج موجِ طوفاں خیز
دل کا عالم حباب کا عالم

سراج الدین ظفر

دل کارزار عشق و وفا میں ہے پیش پیش
طوفاں کے سامنے ہے اگرچہ حباب ہے

قمر جلالوی

کشتی کسی غریب کی ڈوبی ضرور ہے
آنسو دکھائے دیتا ہے چشمِ حباب میں

شکیب جلالی

کب تک رہے گا روح پہ پیراہنِ بدن
کب تک ہوا اسیر رہے گی حباب میں