باقی صدیقی

سورج ڈوب رہا ہے آؤ طوف بادہ و جام کریں
تم بھی ذرا زلفوں کو سنوارو ہم بھی ذرا آرام کریں
کس کا وعدہ کیسی تمنا، اٹھ اے دل آرام کریں
ان کو بات کا پاس نہیں تو ہم کیوں نیند حرام کریں
کچھ کم نہیں جہاں سے جہاں کی مسرتیں
جب پاس آئیں دشمن آرام بن گئیں
مری حیات بی صدمے اٹھا نہی سکتی
تری نظر کو بھی آرام کی ضرورت ہے

جگر مراد آبادی

یارب یہ مقام عشق ہے کیا گو دیدہ و دلِ ناکام نہیں
تسکین ہے اور تسکین نہیں آرام ہے اور آرام نہیں
دل کو سکون روح کو آرام آ گیا
موت آ گئی کہ دوست کا پیغام آ گیا
یہ کیا مقام عشق ہے ظالم کہ ان دنوں
اکثر ترے بغیر بھی آرام آ گیا

عبدالحمید عدم

کر لیتے ہیں تخلیق کوئی وجہ اذیت
بھاتا نہیں خود ہم کو بھی آرام ہمارا
دل کو دل سے کام رہے گا
دونوں طرف آرام رہے گا
ٹھہرا ہے مرے ذہن میں جو قافلۂ گل
تھوڑا سا تو لے کر یہاں آرام چلے گا
زباں پر آپ کا نام آ رہا تھا
غمِ ہستی کو آرام آ رہا تھا
میں وہ مسافر روشن خیال ہوں یارو
جو راستے میں بھی آرام لیتے رہتے ہیں

قمر جلالوی

چارہ گر میرے سکوں پر یہ نہ کہہ آرام ہے
اضطرابِ دل نہ ہونا موت کا پیغام ہے

مصطفی زیدی

ہر اک نے کہا کیوں تجھے آرام نہ آیا
سنتے رہے ہم لب پہ ترا نام نہ آیا

رئیس فروغؔ

اپنا حال نہ جانے کیا ہے ویسے بات بنانے کو
دنیا پوچھے درد بتاؤں تو پوچھے آرام کہوں

احسان دانش

پھر وہ یاد آئے ہوئی مدہوش دل کی کائنات
پھر اٹھا دردِ جگر پھر کچھ مجھے آرام ہے
خاکدان دہر میں تسکین کا جویا نہ ہو
آہ جب تک دل دھڑکتا ہے کہاں آرام ہے
واصل مضراب خاموشی ہے ہر تارِ نفس
اس سے کہہ دو اب ترے بیمار کو آرام ہے
یہ ساون یہ گھٹا یہ بجلیاں یہ ٹوٹتی راتیں
بھلا ایسے میں دل والوں کو کب آرام آتا ہے
خدا رکھے تجھے اے سر زمین شہرِ خاموشاں
یہیں آ کر ہر اک بے چین کو آرام آتا ہے

بیان میرٹھی

خاک کرتی ہے برنگ چرخ نیلی فام رقص
ہر دو عالم کو ترا رکھتا ہے بے آرام رقص

ظہیر کاشمیری

اک سحر سا طاری تھا ظہیرؔ اہلِ خرد پر
تھے مہر بہ لب حسنِ دل آرام کے آگے

غلام محمد قاصر

بغیر اس کے اب آرام بھی نہیں آتا
وہ شخص جس کا مجھے نام بھی نہیں آتا

احمد راہی

دل کی بیتابی کا آخر کہیں انجام تو ہے
میری قسمت میں نہیں دہر میں آرام تو ہے

رسا چغتائی

جب تک سر پہ دھوپ کھڑی ہے
سایہ بے آرام چلے گا

سیف الدین سیف

چین اب مجھ کو تہِ دام تو لینے دیتے
تیرے فتنے کہیں آرام تو لینے دیتے

شاد عظیم آبادی

یہاں اپنی پڑی ہے تجھ سے اے غم خوار کیا الجھوں
یہ کون آرام ہے مر جاؤں تب آرام آئے گا
گرفتاران گیسو پر نہیں کچھ منحصر ناصح
پھنسا ہے جو تعلق میں اسے آرام کیا ہو گا
تھا موت کا کھٹکا جاں فرسا صد شکر کہ نکلا وہ کانٹا
گر ہو نہ قیامت کا دھڑکا اب تو ہیں بڑے آرام سے ہم

شکیل بدایونی

ان کی یاد ان کی تمنا ان کا غم
کٹ رہی ہے زندگی آرام سے

فانی بدایونی

لطف و کرم کے پتلے ہو اب قہر و ستم کا نام نہیں
دل پہ خدا کی مار کہ پھر بھی چین نہیں آرام نہیں
وقفۂ موت بھی غنیمت ہے
کچھ تو فی الجملہ مل گیا آرام
تیری ہی رضا اور تھی ورنہ ترے بسمل
تلوار کے سائے میں بھی آرام نہ لیتے

احمد فراز

ہوتے رہے دل لمحہ بہ لمحہ تہہ و بالا
وہ زینہ بہ زینہ بڑے آرام سے اترے

شاذ تمکنت

قصۂ شوق کے عنوان دل آرام کئی
میں نے کس پیار سے رکھے ہیں ترے نام کئی

قتیل شفائی

تڑپتی ہیں تمنائیں کسی آرام سے پہلے
لٹا ہو گا نہ یوں کوئی دلِ ناکام سے پہلے
پلکوں پہ اب نہیں ہے وہ پہلا سا بارِ غم
رونے کے بعد کچھ ہمیں آرام بھی تو ہے
خود نمائی تو نہیں شیوۂ ارباب وفا
جن کو جلنا ہو وہ آرام سے جل جاتے ہیں
مطمئن گرمی احساس جفا سے بھی نہیں
دل کو پہنچے بھی تو آرام کہاں تک پہنچے

کلیم عاجز

جب پیار کیا چین سے کیا کام ہے پیارے
اس میں تو تڑپنے ہی میں آرام ہے پیارے
میں ہوں جہاں سو فکر میں سو رنج میں سو درد
تو ہے جہاں آرام ہی آرام ہے پیارے
ہم دل کو لگا کر بھی کھٹکتے ہیں دلوں میں
تو دل کو دکھا کر بھی دل آرام ہے پیارے
اتنا بھی کسی دوست کا دشمن نہ ہو کوئی
تکلیف ہے ان کے لیے آرام ہمارا