مرزا غالب

اپنے پہ کر رہا ہوں قیاس اہلِ دہر کا
سمجھا ہوں دل پذیر متاعِ ہنر کو میں
ہمارے شعر ہیں اب صرف دل لگی کے اسدؔ
کھلا، کہ فائدہ عرضِ ہنر میں خاک نہیں

انشاء اللہ خان انشا

کہہ لیے کیوں نہ ہو سبزے کہ سخن میرا سیکھ
وایۂِ ابرِ بہاری کے ہنر لیتا ہے
لطف ایزدی ہی سے امید ہے انشا اللہ
کچھ نہیں رکھتے ہیں ہم فضل و ہنر کا تکیہ

حیدر علی آتش

جو چاہیں یار سے کہیں اغیار غم نہیں
خواجہ کو ہیں غلام کے عیب و ہنر کھلے

داغ دہلوی

کچھ دیکھ رہے ہیں دل بسمل کا تڑپنا
کچھ غور سے قاتل کا ہنر دیکھ رہے ہیں

شیخ ابراہیم ذوق

نہ خوب و زشت نہ عیب و ہنر کو دیکھتے ہیں
یہ چیز کیا ہے بشر ہم بشر کو دیکھتے ہیں
بنا کے آئینہ دیکھے ہے پہلے آئینہ گر
ہنر ور اپنے ہی عیب و ہنر کو دیکھتے ہیں

مصحفی غلام ہمدانی

ادھر سے جھانکتے ہیں گہہ ادھر سے دیکھ لیتے ہیں
غرض ہم اس کی صورت سو ہنر سے دیکھ لیتے ہیں

مصطفٰیٰ خان شیفتہ

اہلِ زمانہ دیکھتے ہیں عیب ہی کو بس
کیا فائدہ جو شیفتہ عرضِ ہنر کریں
زر کسب کر کہ عشرتِ خسرو نصیب ہو
فرہاد کو سنا ہے ، ہوا جو ہنر سے فیض؟

فیض احمد فیض

دامنِ درد کو گلزار بنا رکھا ہے
آؤ اک دن دل پر خوں کا ہنر تو دیکھو

میر انیس

شہید عشق ہوئے قیس نام ور کی طرح
جہاں میں عیب بھی ہم نے کیے ہنر کی طرح

جون ایلیا

قریۂ گریہ میں مرا گریہ ہنر ورانہ ہے
یاں سے کہیں ٹلوں گا میں داد ہنر لیے بغیر

خواجہ میر درد

سب کے جوہر نظر میں آئے دردؔ
بے ہنر تو نے کچھ ہنر نہ کیا

سراج الدین ظفر

راحت جان ظفرؔ ہیں شاہدان بے ہنر
روندنے کو ان کے قدموں میں ہنر رکھ دیجیے

عرفان صدیقی

یا بازوئے ستم میں ہے یہ تیغ آخری
یا دست کشتگاں میں ہنر کچھ نہیں بچا
اب تلک بزم میں آنا ہی تھا اک کار ہنر
ہم نے آغاز کیا کار ہنر جانے کا
تم نہ ہوتے تو سمجھتی تمہیں دنیا عرفانؔ
فائدہ عرضِ ہنر میں تھا، ہنر میں کیا تھا
اس سے بچھڑ کے باب ہنر بند کر دیا
ہم جس میں جی رہے تھے وہ گھر بند کر دیا
ہوں مشتِ خاک مگر کوزہ گر کا میں بھی ہوں
سو منتظر اسی لمس ہنر کا میں بھی ہوں
شاعری سے کوئی قاتل راہ پر آتا نہیں
اور ہم کو دوسرا کوئی ہنر آتا نہیں
دستِ رفو نے سینے کے سب زخم سی دیے
اندر کا حال ناز ہنر نے کہا نہیں
عشق میں کہتے ہیں فرہاد نے کاٹا تھا پہاڑ
ہم نے دن کاٹ دیے یہ بھی ہنر ہے سائیں
کھیل سب آنکھوں کا ہے سارا ہنر آنکھوں کا ہے
پھر بھی دنیا میں خسارہ سر بہ سر آنکھوں کا ہے
میرے جہاز اسی کی ہواؤں سے ہیں رواں
میری شناور ی کا ہنر بھی اسی کا ہے
عجب مصاف سکوت و سخن میں جاری ہے
کسے وسیلۂ عرضِ ہنر بنایا جائے

احسان دانش

دانشؔ تھا اکہرا مرا پیراہن ہستی
بے پردہ زمانے پہ مرا عیب و ہنر تھا

ادا جعفری

لکھا گیا مجھے آواز خامشی کی طرح
خود اپنا عکس بنوں سایۂ ہنر میں رہوں

عبید اللہ علیم

پگھل رہے ہیں جہاں لوگ شعلۂ جاں سے
شریک میں بھی اسی محفل ہنر میں ہوں
جو زخم زخم زباں بھی ہے اور نمو بھی ہے
تو پھر یہ وہم ہے کیسا کہ ہم ہنر سے گئے

علی سردار جعفری

پیمبروں کی طرح سے جیو زمانے میں
پیام شوق بنو دولت ہنر کی طرح
یہ نفع خوروں کی دانش فروش دنیا ہے
متاعِ علم کی جنس ہنر کی خیر مناؤ

ماجد صدیقی

کچھ کہو یہ کس جنم کی ہے سزا ماجدؔ تمہیں
روز و شب کیوں ہے یہ تخلیقِ ہنر کا سامنا
ماجدؔ سناؤں شہر بہ تشریح اب کسے
اس سے تو آپ اپنا ہنر دیکھتا رہوں

تلوک چند محروم

بے درد ہے انساں تو ہیں سب اس کے ہنر عیب
ہے دل میں اگر درد تو ہر عیب ہنر ہے

ثروت حسین

یہ جو روشنی ہے کلام میں کہ برس رہی ہے تمام میں
مجھے صبر نے یہ ثمر دیا مجھے ضبط نے یہ ہنر دیا
بند قبائے سرخ کی منزل ان پر سہل ہوئی ہے
جن ہاتھوں کو آگ چرا لینے کے ہنر آتے ہیں

جوش ملیح آبادی

آؤ پھر جوشؔ کو دے کر لقب شاہ سخن
دل و دین سخن و جان ہنر تازہ کریں

حفیظ جالندھری

اہلِ نظر کوئی نہیں اس لیے خود پسند ہوں
آپ ہی دیکھتا ہوں میں اپنے ہنر کو کیا کروں

حفیظ ہوشیارپوری

ناشناس غم فقط داد ہنر دیتے رہے
ہم متاع غم کو رسوائے ہنر دیکھا کیے

سید ضمیر جعفری

الفاظ دل کی آگ سے محروم ہو گئے
جب شاعری کو صرف ہنر کر دیا گیا
کیسے کیسے دکھ دیکھے
کیا کیا عیب ہنر کے ہیں

سیف الدین سیف

جیسے دریا میں گہر بولتا ہے
سات پردوں میں ہنر بولتا ہے

شکیل بدایونی

پھر بھی شکیلؔ اس دور میں پیارے
صاحب فن ہے اہلِ ہنر ہے

اختر ہوشیارپوری

یوں بھی تو اس نے حوصلہ افزائی کی مری
حرف سخن کے ساتھ ہی زخم ہنر دیا
کیوں کاغذی پھولوں سے سجاتا نہیں گھر کو
اس دور کو شکوہ ہے مرے ذوق ہنر سے
کوئی بھی چیز نہ رکھنا کہ تعاقب میں ہیں لوگ
اپنی مٹی ہی مگر دست ہنر میں رکھنا

اکبر حمیدی

شبوں کو جاگتے ہو جس کے خواب میں اکبرؔ
وہ شاہکار کمال ہنر سے نکلے گا

احمد فراز

عجب فسونِ خریدار کا اثر ہے کہ ہم
اسی کی آنکھ سے اپنے ہنر کو دیکھتے ہیں
دیکھا مجھے تو ترکِ تعلق کے باوجود
وہ مسکرا دیا یہ ہنر بھی اسی کا تھا
یہ اب جو سر ہیں خمیدہ کلاہ کی خاطر
یہ عیب بھی تو ہم اہلِ ہنر سے نکلا تھا
تو آئینہ فروش و خریدار کور چشم
اس شہر میں فراز دکانِ ہنر نہ کھول
سنا ہے اس کو بھی ہے شعر و شاعری سے شغف
سو ہم بھی معجزے اپنے ہنر کے دیکھتے ہیں

اقبال ساجد

آنکھ کے اندھوں کو کیوں دکھلاتے ہو پرواز حرف
کاغذوں پہ اب تماشائے ہنر کرتے ہو کیوں
لفظ اگر بوتے تو پھر فصل معانی کاٹتے
دوستو! اب شکوۂ اہلِ ہنر کرتے ہو کیوں

شاذ تمکنت

شاذؔ کو صبر عطا کر کے بڑا کام کیا
اس نے کیا مانگا تھا کیا پایا ہے اے رب ہنر
تجھے آ گہی کی نہیں خبر مری گمرہی پہ نہ طنز کر
ارے وقت وقت کی بات ہے یہی عیب رشک ہنر بھی ہے
شکر کرتا ہوں خدا نے مجھے محسود کیا
اب میں سمجھا کہ مرے پاس ہنر کیا کچھ ہے
ہر شے ہے ناتمام یہ احساس کیوں ہے آج
ہر عیب سے جواز ہنر کون لے گیا

کیف بھوپالی

جسم پر باقی یہ سر ہے کیا کروں
دستِ قاتل بے ہنر ہے کیا کروں

محسن احسان

بے آب آئنوں کو بھی اک آب بخش دی
ہر چند بے ہنر تھے یہ کار ہنر کیا
تھا میر جی کو عزتِ سادات کا خیال
ہم نے سخن کو جنس دکانِ ہنر کیا
تمہیں چراغ بجھانے کا زعم ہے لیکن
ہمیں طلوعِ سحر کا ہنر بھی آتا ہے
تھی جن کی لو سے دیارِ سخن میں تابانی
وہ طاق طاق چراغ ہنر پرانے تھے
اب کہیں سے نہ خریدار وفا آئے گا
اب کوئی جنس نہ بازار ہنر میں رکھیے

محسن نقوی

وہ مجھ کو ٹوٹ کے چاہے گا چھوڑ جائے گا
مجھے خبر تھی اسے یہ ہنر بھی آتا ہے
قسمت شاعر سیماب صفت دشت کی موت
قیمت ریزۂ الماس ہنر سناٹا

ناصر کاظمی

خمِ ہر لفظ ہے گل معنٰی
اہلِ تحریر کا ہنر دیکھو
جی جلاتا ہوں اور سوچتا ہوں
رائگاں یہ ہنر نہ جائے کہیں
اہلِ دل آنکھ جدھر کھولیں گے
اک دبستانِ ہنر کھولیں گے