مرزا غالب

رشکِ ہم طرحی و دردِ اثرِ بانگِ حزیں
نالۂِ مرغِ سحر تیغِ دو دم ہے ہم کو
دل و جگر میں پر افشاں جو ایک موجۂِ خوں ہے
ہم اپنے زعم میں سمجھے ہوئے تھے اس کو دم آگے
سخن میں خامۂِ غالب کی آتش افشانی
یقین ہے ہم کو بھی، لیکن اب اس میں دم کیا ہے
نالے عدم میں چند ہمارے سپرد تھے
جو واں نہ کھنچ سکے سو وہ یاں آ کے دم ہوئے

انشاء اللہ خان انشا

کہتے ہو ووں سے ہو کے ادھر آؤ ووں چلیں
کیا خوب کیوں نہ دوڑ پڑوں ایسے دم کے ساتھ
جلد پھٹکارئے سبزے کے نشہ کو کوڑا
کھینچیے اور کوئی سلفے کا دم یا معبود
چار زانو ہو اب انشاؔ بھی زمیں سے اونچا
یک و جب رہنے لگا سادہ کی دم یا معبود
کہہ کر گئے آتا ہوں کوئی دم کو ابھی میں
پھر دے چلے کل کی سی طرح مجھ کو دم اچھا

بہادر شاہ ظفر

وہ سو سو اٹھکھٹوں سے گھر سے باہر دو قدم نکلے
بلا سے اس کی گر اس میں کسی مضطر کا دم نکلے
نکال اے چارہ گر تو شوق سے لیکن سر پیکاں
ادھر نکلے جگر سے تیر ادھر قالب سے دم نکلے
جگر پر داغ لب پر دود دل اور اشک دامن میں
تری محفل سے ہم مانند شمعِ صبح دم نکلے
تمنا ہے یہ دل میں جب تلک ہے دم میں دم اپنے
ظفرؔ منہ سے ہمارے نام اس کا دم بہ دم نکلے
جب کہتے ہیں کچھ بات رکاوٹ کی ترے ہم
رک جاتا ہے یہ سینہ میں دم کہہ نہیں سکتے
ظفرؔ سے کہتا ہے مجنوں کہیں دردِ دلِ محزوں
جو غم سے فرصت اب اک دم ہمیں بھی ہو تمہیں بھی ہو

حیدر علی آتش

سوائے رنج کچھ حاصل نہیں ہے اس خرابے میں
غنیمت جان جو آرام تو نے کوئی دم پایا
رفتگاں کا بھی خیال اے اہل عالم کیجیے
عالم ارواح سے صحبت کوئی دم کیجیے

داغ دہلوی

کبھی توڑتے ہیں وہ خنجر کو اپنے
کبھی نبض بسمل میں دم دیکھتے ہیں
سلامت رہے دل برا ہے کہ اچھا
ہزاروں میں یہ ایک دم دیکھتے ہیں
وہ آنکھیں سامری فن ہیں وہ لبِ عیسٰی نفس دیکھو
مجھی پر سحر ہوتے ہیں مجھی پر دم بھی ہوتے ہیں
جو کہتا ہوں کہ مرتا ہوں تو فرماتے ہیں مر جاؤ
جو غش آتا ہے تو مجھ پر ہزاروں دم بھی ہوتے ہیں

شیخ ابراہیم ذوق

اگرچہ دیر ہے جانے میں تیرے
نہیں پر اپنے دم میں دم ابھی سے

مصحفی غلام ہمدانی

دیکھے ہے وہ دھکدھکی میں جب سے
تب سے مرا دھکدھکے میں دم ہے
دمِ رخصت ہے مرا آج مری بالیں پر
تم اگر وقفہ کرو گے کوئی دم کیا ہو گا

مومن خان مومن

ہوئی خجالت سے نفرت افزوں گلے کیے خوب آخریں دم
وہ کاش اک دم ٹھہر کے آتے کہ میرے لب پر بھی دم نہ ہوتا

مرزا رفیع سودا

حباب لبِ جو ہیں اے باغباں ہم
چمن کو ترے کوئی دم دیکھتے ہیں

باقی صدیقی

یہ رنگ غم زیست، یہ انداز غمِ جاں
دنیا کی تمنا میں نکل جائے گا دم کیا
نگار دشت کی جانب کوئی قدم اب تو
ہجومِ شہر میں گھٹنے لگا ہے دم اب تو
نکل گیا ہے سفینہ ترا کدھر باقیؔ
صدائیں آتی ہیں ساحل سے دم بہ دم اب تو

جون ایلیا

جانِ جاں تجھ کو اب تری خاطر
یاد ہم کوئی دم نہیں کرتے
اب اپنے طور ہی میں نہیں تم سو کاش کہ
خود میں خود اپنا طور کوئی دم ملے تمہیں

جگر مراد آبادی

ہم کو مٹا سکے یہ زمانے میں دم نہیں
ہم سے زمانہ خود ہے زمانے سے ہم نہیں

قمر جلالوی

تربت میں رکے ہیں کہ کمر سیدھی تو کر لیں
منزل ہے بہت دور کی لے لیں ذرا دم اور
بے وقت عیادت کا نتیجہ یہی ہو گا
دوچار گھڑی کے لیے رک جائے گا دم اور
وہ فتنہ ساز دے کے گیا ہے یہ دم ابھی
آتا ہوں ہے کے گھر سے تیری قسم ابھی
ظالم وہ دیکھ پاس سے اٹھتے ہیں چارہ گر
تیرے مریضِ ہجر نے توڑا ہے دم ابھی
جل کر مرنا بھی بڑا کارِ اہم ہوتا ہے
یہ تو اک چھوٹے سے پروانے کا دم ہوتا ہے

ضیا جالندھری

جلتی جاتی ہیں جڑیں سوکھتے جاتے ہیں شجر
ہو جو توفیق تو آنسو ہی کوئی دم برسا

تلوک چند محروم

نہیں خوف شبِ ہجراں مجھے اب
مری غم خوار و ہم دم ہو گئی ہے

حفیظ ہوشیارپوری

ایسی بھی کیا جلدی پیارے جانے ملیں پھر یا نہ ملیں ہم
کون کہے گا پھر یہ فسانہ بیٹھ بھی جاؤ سن لو کوئی دم

رسا چغتائی

مٹی جب تک نم رہتی ہے
خوشبو تازہ دم رہتی ہے
ان جھیل سی گہری آنکھوں میں
اک لہر سی ہر دم رہتی ہے

شان الحق حقی

مایوس طلب جان کے اس دشت ہوس میں
یاروں نے دیے ہیں مجھے دم اور طرح کے

شکیل بدایونی

بے کسی سے مرنے مرنے کا بھرم رہ جائے گا
وہ ضرور آئیں گے جب آنکھوں میں دم رہ جائے گا

عزیز حامد مدنی

ہجومِ لالہ و نسریں ہو یا لب ہائے شیریں ہوں
مری موجِ نفس سے تازہ دم ہوتے ہی رہتے ہیں

فانی بدایونی

میں وہ آزردۂ وہم مسرت ہوں معاذ اللہ
کہ غم کو غم سمجھنے سے بھی گھبراتا ہے دم میرا
بقا کہتے ہیں جس کو وہ مرا احسان ہے فانیؔ
وہ حادث ہوں کہ دنیائے قدم بھرتی ہے دم میرا

احمد فراز

اس شہرِ آرزو سے بھی باہر نکل چلو
اب دل کی رونقیں بھی کوئی دم ہیں دوستو

فراق گورکھپوری

دل کے دھڑکوں میں زور ضرب کلیم
کس قدر اس حباب میں دم ہے
اک تلاطم سا رنگ و نکہت کا
پیکرِ ناز میں دما دم ہے

قتیل شفائی

مے خانہ بہت دور نہیں دیدۂ نم سے
آ گردشِ دوراں کوئی دم ساتھ رہے گا

کلیم عاجز

یہ دیوانے کبھی پابندیوں کا غم نہیں لیں گے
گریباں چاک جب تک کر نہ لیں گے دم نہیں لیں گے
شکایت ان سے کرنا گو مصیبت مول لینا ہے
مگر عاجزؔ غزل ہم بے سنائے دم نہیں لیں گے

ناصر کاظمی

جب تلک دم رہا ہے آنکھوں میں
ایک عالم رہا ہے آنکھوں میں