مرزا غالب

وفا دامن کشِ پیرایہ و ہستی ہے اے غالب
کہ پھر نزہت گہِ غربت سے تا حد وطن لائ

امام بخش ناسخ

خبر نہ شام غریبی کی مجھ کو تھی ناسخؔ
چھپی ہوئی تھی یہ صبحِ وطن کے پردے میں

انشاء اللہ خان انشا

شغل آئینہ سے لذت یہ اٹھائی ہے کہ بس
ہم فقیروں نے کیا اپنا وطن آئینے میں

حیدر علی آتش

انجام کار کا نہیں آتا خیال کچھ
غربت میں بھولے بیٹھے ہیں یار وطن ہنوز
رگڑوائیں یہ مجھ سے ایڑیاں غربت میں وحشت نے
ہوا مسدود رستہ جادۂِ راہ وطن بگڑا
آج ہی چھوٹے جو چھٹتا یہ خرابہ کل ہو
ہم غریبوں کو ہے کیا غم یہ وطن ہے کس کا
وحشت مجنوں و آتشؔ میں ہے بس اتنا ہی فرق
کوئی بن میں مست ہے کوئی وطن میں مست ہے

شیخ ابراہیم ذوق

یا رب یہ دل ہے یا کہ ہے آئینہ نظر
دکھلا رہا ہے سیر و سفر در وطن مجھے

فیض احمد فیض

ادھر تقاضے ہیں مصلحت کے ، ادھر تقاضائے دردِ دل ہے
زباں سنبھالیں کہ دل سنبھالیں، اسیر ذکرِ وطن سے پہلے
دل شکنی بھی، دلداری بھی
یادِ وطن، کچھ اس سے زیادہ

سراج الدین ظفر

پھرتی ہے جستجو میں نسیم وطن کہاں
اب میں خزاں رسیدہ کہاں اور چمن کہاں

قمر جلالوی

صبر آ گیا یہ کہہ کر دل سے غمِ وطن میں
سب پھول ہی نہیں کانٹے بھی تھے چمن میں
بلبل ہے گلستاں میں پروانہ انجمن میں
سب اپنے اپنے گھر ہیں اک ہم نہیں وطن میں
سنتے ہیں اب وہاں بھی چھائی ہوئی ہے ظلمت
ہم تو چراغ جلتے چھوڑ آئے تھے وطن میں

عرفان صدیقی

جگوں کے کھوئے ہوؤں کو پکارتا ہے یہ کون
صدا تو خاکِ وطن کی طرف سے آتی ہے
مٹی ہی میں ملنا ہے تو اس شہر سے کیوں جائیں
مٹی تو میاں ارضِ وطن میں بھی وہی ہے
لاؤ کچھ دیر کو پہلوئے بتاں میں رک جائیں
ہم مسافر ہیں، ہمارا تو وطن وہ بھی ہے

مصطفی زیدی

ایسی سونی تو کبھی شامِ غریباں بھی نہ تھی
دل بجھے جاتے ہیں اے تیرگی صبحِ وطن
نا قابل بیان اندھیروں کے باوجود
میری دعائے صبحِ وطن کی شریک تھی

الطاف حسین حالی

کبک و قمری میں ہے جھگڑا کہ چمن کس کا ہے
کل بتا دے گی خزاں یہ کہ وطن کس کا ہے

احسان دانش

بڑھنے دو اور شوقِ شہادت عوام میں
کچھ بانجھ تو نہیں ہے یہ خاکِ وطن ابھی
رقصاں ابھی ہیں شامِ غریباں کی جھلکیاں
روشن نہیں ہے خندۂ‌ صبح‌ وطن ابھی

اختر شیرانی

بھلا چکی دل سے شامِ غربت ہر ایک نقشہ ہر ایک صورت
ہماری آنکھوں میں لیکن اب تک فروغ صبحِ وطن ہے باقی

زہرا نگاہ

قدم قدم پہ فروزاں ہیں آنسوؤں کے چراغ
انہیں بجھاؤ تو صبحِ وطن کی بات کرو

علی سردار جعفری

وطن سے دور یارانِ وطن کی یاد آتی ہے
قفس میں ہم نوایانِ چمن کی یاد آتی ہے

ثروت حسین

وہیں پر مرا سیم تن بھی تو ہے
اسی راستے میں وطن بھی تو ہے

حسرت موہانی

غربت کی صبح میں بھی نہیں ہے وہ روشنی
جو روشنی کہ شام سواد وطن میں تھی
شامِ غریباں کے برابر کہاں
مذہب عشاق میں صبحِ وطن
اچھا ہے اہلِ جور کیے جائیں سختیاں
پھیلے گی یوں ہی شورش حبِ وطن تمام

رسا چغتائی

چراغ صبح سے شام وطن کی بات کرو
جو راہ میں ہے ابھی اس کرن کی بات کرو

احمد فراز

یہ بھی کیا کم ہے غریبُ الوطنی میں کہ فرازؔ
ہم کو بے مہری ارباب وطن یاد نہیں
کبھی کبھی دوریوں سے کوئی پکارتا ہے
فرازؔ جانی فرازؔ پیارے وطن میں آؤ

امیر مینائی

منہ پھر نہ کر وطن کی طرف یوں وطن کو چھوڑ
چھوٹے جو بوئے گل کی طرح سے چمن کو چھوڑ
ہے روح کو ہوس کہ نہ چھوڑے بدن کا ساتھ
غربت پکارتی ہے کہ غافل، وطن کو چھوڑ

شاذ تمکنت

وہ بجھے بجھے وہ لٹے لٹے سرِ راہ شاذؔ ملے تو تھے
انہیں اب وطن میں نہ ڈھونڈیے کہ وہ اب وطن سے چلے گئے
جہاں بھی چھاؤں ملی دو گھڑی کو بیٹھ رہے
دیارِ غیر کہاں تھا وطن ہی ایسا تھا

کیفی اعظمی

غربت کی ٹھنڈی چھاؤں میں یاد آئی اس کی دھوپ
قدر وطن ہوئی ہمیں ترکِ وطن کے بعد

مجروح سلطان پوری

زباں ہماری نہ سمجھا یہاں کوئی مجروحؔ
ہم اجنبی کی طرح اپنے ہی وطن میں رہے
دشمن کی دوستی ہے اب اہل وطن کے ساتھ
ہے اب خزاں چمن میں نئے پیرہن کے ساتھ

ناصر کاظمی

رنگ بھر دے اندھیری راتوں میں
جانِ صبحِ وطن! وطن میں آ
تو ہے دلوں کی روشنی تو ہے سحر کا بانکپن
تیری گلی گلی کی خیر اے مرے دل ربا وطن
اس کی خوشبو دکھاتی ہے کیا کیا سمے
دشتِ غربت میں یادِ وطن پھول ہے