مرزا غالب

مجھے اس سے کیا توقع بہ زمانۂِ جوانی
کبھی کودکی میں جس نے نہ سنی مری کہانی
کب وہ سنتا ہے کہانی میری
اور پھر وہ بھی زبانی میری

امام بخش ناسخ

سو قصوں سے بہتر ہے کہانی مرے دل کی
سن اس کو تو اے جان زبانی مرے دل کی

حیدر علی آتش

گوش زد ہوتے ہی ہوئی دشمن
نیند تیری مری کہانی کی
کون سے دل میں محبت نہیں جانی تیری
جس کو سنتا ہوں وہ کہتا ہے کہانی تیری
صبح تک شام سے کرتی ہے زباں ذکر جمال
نیند آتی ہے کسے سن کے کہانی تیری

مرزا رفیع سودا

ہے گوش زدہ خلق مرا قصۂ جانکاہ
جب سے کہ نہ سمجھے تھا تو چڑیا کی کہانی

جون ایلیا

زندگی کیا ہے اک کہانی ہے
یہ کہانی نہیں سنانی ہے

سراج الدین ظفر

جہاں میں ذوق حسن جاؤدانی لے کے آیا ہوں
کہاں کی کس خرابے میں کہانی لے کے آیا ہوں

عبدالحمید عدم

بس اس قدر ہے خلاصہ مری کہانی کا
کہ بن کے ٹوٹ گیا اک حباب پانی کا
ملا ہے ساقی تو روشن ہوا ہے یہ مجھ پر
کہ حذف تھا کوئی ٹکڑا مری کہانی کا

عرفان صدیقی

صبح تلک جینا تھا سو ہم نے بات کو کیا کیا طول دیا
اگلی رات کو پھر سوچیں گے اگلا موڑ کہانی کا
سسکیاں بھرتی رہی رات ہوا آنگن میں
رات بھر کہتی رہی کوئی کہانی بارش
دل کا جو حال ہوا دشمنِ جانی کا نہ ہو
آخرِ شب کبھی آغاز کہانی کا نہ ہو

احسان دانش

عمرِ رفتہ کی کہانی کیا ہے
ایک تہمت ہے جوانی کیا ہے

اختر شیرانی

مری آنکھوں سے ظاہر خوں فشانی اب بھی ہوتی ہے
نگاہوں سے بیاں دل کی کہانی اب بھی ہوتی ہے
تمہارے گیسوؤں کی چھاؤں میں اک رات گزری تھی
ستاروں کی زباں پر یہ کہانی اب بھی ہوتی ہے

آنس معین

جیون کو دکھ دکھ کو آگ اور آگ کو پانی کہتے
بچے لیکن سوئے ہوئے تھے کس سے کہانی کہتے

بہزاد لکھنوی

فریاد ہے اب لب پر جب اشک فشانی تھی
یہ اور کہانی ہے وہ اور کہانی تھی
جب درد سا تھا دل میں اب درد ہی خود دل ہے
ہاں اب جو حقیقت ہے پہلے یہ کہانی تھی
غضب تو یہ ہے ہم نے محفل کی محفل
سنا کر وفا کی کہانی لٹا دی
لب پہ ہے فریاد اشکوں کی روانی ہو چکی
اک کہانی چھڑ رہی ہے اک کہانی ہو چکی
آخری آنسو مری چشم الم سے گر چکا
سننے والو ختم اب میری کہانی ہو چکی

بشیر بدر

جس سنگ پہ نظریں کیں خورشید حقیقت ہے
جس چاند سے منہ موڑا پتھر کی کہانی ہے
وہ حسن جسے ہم نے رسوا کیا دنیا میں
نادیدہ حقیقت ہے نا گفتہ کہانی ہے
وہ مصرعۂ آوارہ دیوانوں پہ بھاری ہے
جس میں ترے گیسو کی بے ربط کہانی ہے
دن تلخ حقائق کے صحراؤں کا سورج ہے
شب گیسوئے افسانہ یادوں کی کہانی ہے

عبید اللہ علیم

جوانی کیا ہوئی اک رات کی کہانی ہوئی
بدن پرانا ہوا روح بھی پرانی ہوئی

تلوک چند محروم

قریب شاخِ گل ہوتی ہے جب دستاں سرا بلبل
ہمیں بھی بھولی بسری اک کہانی یاد آتی ہے

جلیل مانک پوری

حسینوں نے رنگنیئی خواب شیریں
سنی جب ہماری کہانی لٹا دی

ثروت حسین

جسے انجام تم سمجھتی ہو
ابتدا ہے کسی کہانی کی

سیماب اکبر آبادی

کیا آ گئی نیند اہلِ محفل
کہنی تھی ہمیں بھی اک کہانی

اکبر حمیدی

گئی گزری کہانی لگ رہی ہے
مجھے ہر شے پرانی لگ رہی ہے

احمد فراز

ہم سنائیں تو کہانی اور ہے
یار لوگوں کی زبانی اور ہے
زیست اک آدھ محبت سے بسر ہو کیسے ؟
رات لمبی ہو تو پھر ایک کہانی کم ہے
اس دورِ بے جنوں کی کہانی کوئی لکھو
جسموں کو برف، خون کو پانی کوئی لکھو

اقبال ساجد

ختم راتوں رات اس گل کی کہانی ہو گئی
رنگ بوسیدہ ہوئے خوشبو پرانی ہو گئی
وہ چاند ہے تو عکس بھی پانی میں آئے گا
کردار خود ابھر کے کہانی میں آئے گا
ہوتے ہی شام جلنے لگا یاد کا الاؤ
آنسو سنانے دکھ کی کہانی نکل پڑے

امیر مینائی

حال پر اجداد و آبا کے تفاخر کیا امیر
ہیں وہ ناداں جن کو ہے قصے کہانی پر گھمنڈ

فراق گورکھپوری

زندگی درد کی کہانی ہے
چشم انجم میں بھی تو پانی ہے
آپ بیتی کہو کہ جگ بیتی
ہر کہانی مری کہانی ہے
مجھ سے کہتا تھا کل فرشتۂ عشق
زندگیِ ہجر کی کہانی ہے
کچھ نہ پوچھو فراقؔ عہدِ شباب
رات ہے نیند ہے کہانی ہے
رات بھی نیند بھی کہانی بھی
ہائے کیا چیز ہے جوانی بھی
دل بد نام تیرے بارے میں
لوگ کہتے ہیں اک کہانی بھی
زندگی عین دید یار فراقؔ
زندگیِ ہجر کی کہانی بھی

محسن احسان

بہتے ہوئے لمحوں کی کہانی ہی بدل دے
دریا تو بدلتا نہیں پانی ہی بدل دے

ناصر کاظمی

سناتا ہے کوئی بھولی کہانی
مہکتے میٹھے دریاؤں کا پانی

نوح ناروی

خیال میں اک نہ اک مزے کی نئی کہانی ہے اور ہم ہیں
ابھی تمنا ہے اور دل ہے ابھی جوانی ہے اور ہم ہیں
ادا نے چھیڑا نظر نے تاکا ستم نے لوٹا غضب نے مارا
زبان جب سے کھلی ہماری یہی کہانی ہے اور ہم ہیں
جتا چکے دردِ دل کو اپنے جو اب جتائیں تو کیا جتائیں
کہی ہوئی بھی سنی ہوئی بھی وہی کہانی ہے اور ہم ہیں