مرزا غالب

سیماب پشت گرمی آئینہ دے ہے ہم
حیراں کیے ہوئے ہیں دل بے قرار کے
بے پردہ سوئے وادی مجنوں گزر نہ کر
ہر ذرے کے نقاب میں دل بے قرار ہے
آ، کہ مری جان کو قرار نہیں ہے
طاقتِ بیدادِ انتظار نہیں ہے

امام بخش ناسخ

ہزاروں گور کی راتیں ہیں کاٹنی ناسخؔ
ابھی تو روز سیہ میں تو بے قرار نہ ہو

بہادر شاہ ظفر

گئی یک بہ یک جو ہوا پلٹ نہیں دل کو میرے قرار ہے
کروں اس ستم کو میں کیا بیاں مرا غم سے سینہ فگار ہے

داغ دہلوی

ہنسا ہنسا کے شبِ وصل اشک بار کیا
تسلیاں مجھے دے دے کے بے قرار کیا
یہ کس نے جلوہ ہمارے سر مزار کیا
کہ دل سے شور اٹھا ہائے بے قرار کیا
نہ پوچھ دل کی حقیقت مگر یہ کہتے ہیں
وہ بے قرار رہے جس نے بے قرار کیا
یہ مزہ تھا دل لگی کا، کہ برابرآگ لگتی
نہ تجھے قرار ہوتا، نہ مجھے قرار ہوتا
مجھ سا نہ دے زمانے کو پروردگار دل
آشفتہ دل فریفتہِ دل بے قرار دل
تاثیر عشق یہ ہے ترے عہد حسن میں
مٹی کا بھی بنائیں تو ہو بے قرار دل
اس نے کہا ہے صبر پڑے گا رقیب کا
لے اور بے قرار ہوا بے قرار دل
تم بھی بے چین ہم بھی ہیں بے چین
تم بھی ہو بے قرار ہم بھی ہیں

شیخ ابراہیم ذوق

پہنچے گا تیرے پاس کبوتر سے پیشتر
مکتوب شوق اڑا کے ترے بے قرار کا

مصحفی غلام ہمدانی

میرا قصور کیا ہے صانع کو چاہیے تھا
مقدار حسن دیتا صبر و قرار مجھ کو
اے مصحفیؔ تصور اس کا جو سامنے ہے
آتا نہیں شبِ غم یک دم قرار مجھ کو
گر اور بھی مری تربت پہ یار ٹھہرے گا
تو زیر خاک نہ یہ بے قرار ٹھہرے گا
اسے نہ دفن کرو سمجھو تو کوئی یارو
زمیں میں مصحفیٔؔ بے قرار ٹھہرے گا
دل کو یہ اضطرار کیسا ہے
دیکھیو بے قرار کیسا ہے
حالِ دل بے قرار ہے اور
شاید کہ خیالِ یار ہے اور
وہ ہم سے کرے ہے کل کا وعدہ
اوروں سے وہاں قرار ہے اور
ہوا تو غیر سے جب ہمکنار میرے ساتھ
کہاں وہ وعدہ رہا اور کہاں قرار رہا

مصطفٰی خان شیفتہ

چڑھ گئے ہیں کسی کے پھر دم پر
شیفتہؔ آج بے قرار نہیں
وہ آتے آتے غیر کے کہنے سے تھم گئے
اب کیا کروں علاج دل بے قرار کا

مومن خان مومن

صبر کر صبر ہو چکا جو کچھ
اے دل بے قرار ہونا تھا
میں اگر آپ سے جاؤں تو قرار آ جائے
پر یہ ڈرتا ہوں کہ ایسا نہ ہو یار آ جائے

فیض احمد فیض

عشق منت کش قرار نہیں
حسن مجبور انتظار نہیں
چمن میں غارتِ گلچیں سے جانے کیا گزری
قفس سے آج صبا بے قرار گزری ہے
آج یوں موج در موجِ غم تھم گیا، اس طرح غم زدوں کو قرار آ گیا
جیسے خوشبوئے زلفِ بہار آ گئی، جیسے پیغامِ دیدارِ یار آ گیا

مرزا رفیع سودا

موجِ نسیم آج ہے آلودہ گرد سے
دل خاک ہو گیا ہے کسی بے قرار کا
برق دیکھی ہو جس نے سو جانے
مجھ دل بے قرار کی صورت

یگانہ چنگیزی

ٹھہر ٹھہر دلِ وحشی بہار آنے دے
ابھی سے بہرِ خدا اتنا بے قرار نہ ہو
بچھا ہے دامِ تمنا اسیر ہو بلبل
قفس کی یاد میں اس طرح بے قرار نہ ہو
نظامِ دہر نے کیا کیا نہ کروٹیں بدلیں
مگر ہم ایک ہی پہلو سے بے قرار رہے

باقی صدیقی

گزر گیا ہے محبت کا مرحلہ شاید
ترے خیال سے بھی دل نہ بے قرار ہوا
پھر تسلی کسی کی یاد آئی
پھر دل بے قرار کو دیکھا
ہجوم رنج و الم میں صبر و قرار پر غور کر رہا ہوں
ملا ہے جو اختیار اس اختیار پر غور کر رہا ہوں
بیکلی کو قرار مان گئے
لے غم زیست ہار مان گئے

جون ایلیا

بد دلی میں بے قراری کو قرار آیا تو کیا
پا پیادہ ہو کے کوئی شہسوار آیا تو کیا
نہ ہوا نصیب قرار جاں ہوسِ قرار بھی اب نہیں
ترا انتظار بہت کیا ترا انتظار بھی اب نہیں

جگر مراد آبادی

جان ہی دے دی جگرؔ نے آج پائے یار پر
عمر بھر کی بے قراری کو قرار آ ہی گیا

قمر جلالوی

کیونکر رکھو گے ہاتھ دل بے قرار پر
میں تو تہِ مزار ہوں تم تو ہو مزار پر
ابرو چڑھے ہوئے ہیں دل بے قرار پر
دو دو کھنچی ہوئی ہیں کمانیں شکار پر
کس نے کیے یہ جور، حضور آپ نے کیے
کس پر ہوئے یہ جور، دل بے قرار پر
دل انہیں کیا دیا قرار نہیں
عشق کو حسن ساز گار نہیں
یہ ہو نہ ہو مزار کسی مضطرب کا ہے
جب سے چڑھے ہیں قبر پہ ہیں بے قرار پھول

الطاف حسین حالی

اک خوشی ہو گئی ہے تحمل کی ورنہ اب
وہ حوصلہ رہا نہیں صبر و قرار کا

احسان دانش

مرے جہان‌ محبت میں پڑ گئی ہلچل
سکونِ دل نے مجھے اور بے قرار کیا
کسی مقام پہ دل کو سکوں ہو کیا معنی
جو بے قرار ازل ہے وہ بے قرار رہے
جہانِ حسن کے اسرار پا نہیں سکتا
جو عشق اپنی حدوں تک ہی بے قرار رہے
ہیں اس طرح کے ضوابط بھی بے قراری میں
کہ تیرے ساتھ زمانہ بھی بے قرار رہے

اختر شیرانی

یقین وعدہ نہیں تاب انتظار نہیں
کسی طرح بھی دلِ زار کو قرار نہیں
شبوں کو خواب نہیں خواب کو قرار نہیں
کہ زیب دوش وہ گیسوئے مشکبار نہیں
وہ آئیں یوں مرے آغوش عشق میں اخترؔ
کہ جیسے آنکھوں میں اک خواب بے قرار آئے

ادا جعفری

دھیان آ گیا تھا مرگِ دل نامراد کا
ملنے کو مل گیا ہے سکوں بھی قرار بھی
جو چراغ سارے بجھا چکے انہیں انتظار کہاں رہا
یہ سکوں کا دور شدید ہے کوئی بے قرار کہاں رہا

بیان میرٹھی

زمیں میں زلزلہ ہے آسماں میں تہلکہ ہے
کسی نے آج کسی دل کو بے قرار کیا
کہ کیوں ہو عاشق و معشوق کا جہاں دشمن
کہ حسن و عشق نے اچھوں کو بے قرار کیا

بیخود بدایونی

وصل میں بھی یہ مضطرب ہی رہا
اس دل بے قرار نے مارا
وفور شرم سے واں اجتناب مد نظر
ہجوم شوق سے یاں بے قرار دل میرا

علی سردار جعفری

یہ بے کس و بے قرار چہرے
صدیوں کے یہ سوگوار چہرے
یہی میرا شعر و نغمہ یہی میری فکر و حکمت
جو سرور و درد مندی دل بے قرار میں ہے

تلوک چند محروم

غلط کی ہجر میں حاصل مجھے قرار نہیں
اسیر یاس ہوں پابند انتظار نہیں
ہے ان کے عہدِ وفا سے مناسبت دل کو
اسے قیام نہیں ہے اسے قرار نہیں
لکھا ہے اس کے مقدر میں اضطراب دوام
قرار کیا ہے دل بے قرار کیا جانے

جلیل مانک پوری

تمہیں آرام سے سونا مبارک
مجھے شب بھر قرار آئے نہ آئے

حسرت موہانی

اثر کچھ کچھ رہے گا وصل میں بھی رنج فرقت کا
دلِ مضطر کو آئے گا قرار آہستہ آہستہ

رسا چغتائی

تجھ سے ملنے کو بے قرار تھا دل
تجھ سے مل کر بھی بے قرار رہا

سیماب اکبر آبادی

میں دل کی قدر کیوں نہ کروں ہجرِ یار میں
ان کی سی شوخیاں ہیں اسی بے قرار میں
سیمابؔ بے تڑپ سی تڑپ ہجرِ یار میں
کیا بجلیاں بھری ہیں دل بے قرار میں
تھی تاب حسن شوخی تصویر یار میں
بجلی چمک گئی نظر بے قرار میں

شاد عظیم آبادی

خزاں کا دور گیا موسمِ بہار آیا
مگر نہ اس دل بے صبر کو قرار آیا
شکایت دلِ مضطر کہاں تلک اے موت
دعائیں دوں گا تجھے گر اسے قرار آیا

شان الحق حقی

رکھنے کو تیرے وعدۂ نا معتبر کی لاج
جھیلی ہے دل نے زحمت صبر و قرار تک
ہمارے واسطے ہمدم قرار دل مت ڈھونڈ
کہ پا گیا ہے دلوں میں قرار اور ہی کچھ

فانی بدایونی

دل ہے مضطرب فانیؔ آنکھ محوِ حیرت ہے
دل نے دے دیا شاید آنکھ کو قرار اپنا
آداب عاشقی کا تقاضا ہے اور بات
تو ورنہ دل کی آڑ میں خود بے قرار ہے
موت کا انتظار تھا آئی
جائیے اب مجھے قرار آیا
خدا کی مار جو اب دل پہ اختیار رہے
بہت قرار کے پردے میں بے قرار رہے
سکون موت مری لاش کو نصیب نہیں
رہے مگر کوئی اتنا نہ بے قرار رہے
نگاہ دل دوز کی دہائی جمال جاں سوز کی دہائی
رہِ محبت میں غم نے لوٹا شکیب و صبر و قرار میرا
ازل میں خلق ہوئی تھی جو بجلیوں کی روح
تری نگاہ مری جان بے قرار ہوئی

احمد فراز

نہ حریف جاں نہ شریکِ غم شبِ انتظار کوئی تو ہو
کسے بزم شوق میں لائیں ہم دل بے قرار کوئی تو ہو
تو پاس بھی ہو تو دل بے قرار اپنا ہے
کہ ہم کو تیرا نہیں انتظار اپنا ہے

امیر مینائی

کل تو آفت تھی دل کی بیتابی
آج بھی بے قرار سا ہے کچھ

فراق گورکھپوری

راز اس آنکھ کا نہیں کھلتا
دل شکیبا بھی بے قرار بھی ہے

قابل اجمیری

کوئی جواب ہے اس طرز دلربائی کا
سکوں بھی لوٹ لیا بے قرار بھی نہ کیا

قتیل شفائی

ہو چکا انتظار سونے دے
اے دل بے قرار سونے دے

قیوم نظر

یوں بھی تو سکوں ملا ہے برسوں
پھرتے رہے بے قرار سے ہم

کیفی اعظمی

جھکی جھکی سی نظر بے قرار ہے کہ نہیں
دبا دبا سا سہی دل میں پیار ہے کہ نہیں
تو اپنے دل کی جواں دھڑکنوں کو گن کے بتا
مری طرح ترا دل بے قرار ہے کہ نہیں

مجروح سلطان پوری

بہت ہی تلخ نوا ہوں مگر عزیز وطن
میں کیا کروں جو ترا درد بے قرار کرے

میرا جی

دیدۂ اشک بار ہے اپنا
اور دل بے قرار ہے اپنا

ناصر کاظمی

نصیبِ عشق دل بے قرار بھی تو نہیں
بہت دنوں سے ترا انتظار بھی تو نہیں
بہت فسردہ ہے دل، کون اس کو بہلائے
اداس بھی تو نہیں بے قرار بھی تو نہیں
کرتا اسے بے قرار کچھ دیر
ہوتا اگر اختیار کچھ دیر
آنکھوں میں کٹی پہاڑ سی رات
سو جا دل بے قرار کچھ دیر
پھر جاگ اٹھے خوشی کے آنسو
پھر دل کو ملا قرار کچھ دیر
نہ ڈھونڈ ناصرِ آشفۃ حال کو گھر میں
وہ بوئے گل کی طرح بے قرار اپنا ہے