مرزا غالب

یہ نہ تھی ہماری قسمت کہ وصالِ یار ہوتا
اگر اور جیتے رہتے ، یہی انتظار ہوتا
کس کا سرا غ جلوہ ہے حیرت کو اے خدا
آیئنہ فرشِ شش جہتِ انتظار ہے
پچ آپڑی ہے وعدۂِ دلدار کی مجھے
وہ آئے یا نہ آئے پہ یاں انتظار ہے
غفلت کفیلِ عمر و اسدؔ ضامنِ نشاط
اے مر گِ ناگہاں تجھے کیا انتظار ہے
آ، کہ مری جان کو قرار نہیں ہے
طاقتِ بیدادِ انتظار نہیں ہے

امام بخش ناسخ

جو ہچکی آئی تو خوش میں ہوا کہ موت آئی
کسی کو یار کا اتنا بھی انتظار نہ ہو
تمام عمر یوں ہی ہو گئی بسر اپنی
شبِ فراق گئی روز انتظار آیا

داغ دہلوی

غضب کیا ترے وعدے پہ اعتبار کیا
تمام رات قیامت کا انتظار کیا
نہ آئے راہ پہ وہ عجزِ بے شمار کیا
شبِ وصال بھی میں نے تو انتظار کیا
آپ کا اعتبار کون کرے
روز کا انتظار کون کرے
ہجر میں زہر کھا کے مر جاؤں
موت کا انتظار کون کرے
کھینچ لائے گا جذبِ دل ان کو
ہمہ تن انتظار ہم بھی ہیں

شیخ ابراہیم ذوق

ہے عین وصل میں بھی مری چشم سوئے در
لپکا جو پڑ گیا ہے مجھے انتظار کا

مصحفی غلام ہمدانی

شتاب آئیو ٹھہرا رکھیں گے ہم اس کو
جو جاں لبوں پہ شبِ انتظار ٹھہرے گا
اے دیدہ نہ رو کہ تجھ پر اک شب
رنج شبِ انتظار ہے اور
پس از وفات بھی اپنی ہوئیں نہ آنکھیں بند
زبس کہ تیرے ہی آنے کا انتظار رہا

مصطفٰی خان شیفتہ

نعش پر تو خدا کے واسطے آ
مر گئے تیرے انتظار میں ہم
نعش پر تو خدا کے واسطے آ
مر گئے تیرے انتظار میں ہم

مومن خان مومن

کیا شبِ انتظار ہونا تھا
ناحق امیدوار ہونا تھا

فیض احمد فیض

عشق منت کش قرار نہیں
حسن مجبور انتظار نہیں
نہ پوچھ جب سے ترا انتظار کتنا ہے
کہ جن دنوں سے مجھے تیرا انتظار نہیں
تم آئے ہو، نہ شبِ انتظار گزری ہے
تلاش میں ہے سحر، بار بار گزری ہے
وہ دن کہ کوئی بھی جب وجہِ انتظار نہ تھی
ہم ان میں تیرا سوا انتظار کرتے رہے

یگانہ چنگیزی

ہنوز گوش بر آواز غیر ہے کوئی
امیدوار ازل اب تک انتظار میں ہے
قسم ہے وعدۂ صبر آزمائے جاناں کی
کہ لذت ابدی ہے تو انتظار میں ہے

باقی صدیقی

حد نہیں انتظار کی کوئی
آگے ہم جتنا انتظار کریں
ہر ستارے سے روشنی مانگی
ہر شبِ انتظار کو دیکھا

جون ایلیا

نہ ہوا نصیب قرار جاں ہوسِ قرار بھی اب نہیں
ترا انتظار بہت کیا ترا انتظار بھی اب نہیں

جگر مراد آبادی

جب نگاہیں اٹھ گئیں اللہ ری معراج شوق
دیکھتا کیا ہوں وہ جان انتظار آ ہی گیا

سراج الدین ظفر

کھیلا ہو جو درازی گیسوئے یار سے
وہ کیا ڈرے گا طول شبِ انتظار سے

عبدالحمید عدم

بہشت میں بھی جناب زاہد تمہیں نہ ترجیح مل سکے گی
وہاں بھی خوش ذوق عاصیوں کا تپاک سے انتظار ہو گا

قمر جلالوی

اب انہیں انتظار ہے میرا
جب مجھے ان کا انتظار نہیں
او محو بزمِ غیر تجھے کچھ خبر بھی ہے
گلشن میں کر رہے ہیں ترا انتظار پھول

شکیب جلالی

دل کیوں دھڑکنے لگتا ہے ابھرے جو کوئی چاپ
اب تو نہیں کسی کا مجھے انتظار بھی

عرفان صدیقی

تم تو سچے ہو مگر دل کا بھروسا کچھ نہیں
بجھ نہ جائے یہ چراغِ انتظار اگلے برس

مجید امجد

میں ایک پل کے رنجِ فراواں میں کھو گیا
مرجھا گئے زمانے مرے انتظار میں

الطاف حسین حالی

گر صبح تک وفا نہ ہوا وعدہ وصال
سن لیں گے وہ مآل شبِ انتظار کا

احسان دانش

اسی نواح میں اہلِ نظر بھی ممکن ہیں
کچھ اور دیر سرِ طور انتظار رہے

اختر شیرانی

یقین وعدہ نہیں تاب انتظار نہیں
کسی طرح بھی دلِ زار کو قرار نہیں

ادا جعفری

ہر آستاں پہ ناصیہ فرسا ہیں آج وہ
جو کل نہ کر سکے تھے تیرا انتظار بھی
جو چراغ سارے بجھا چکے انہیں انتظار کہاں رہا
یہ سکوں کا دور شدید ہے کوئی بے قرار کہاں رہا

اکبر معصوم

پس فصیل زمانوں کا انتظار نہ ہو
یہ شہر اور کسی شہر کا غبار نہ ہو

آنس معین

تعلقات میں آئی ہے بس یہ تبدیلی
ملیں گے اب بھی مگر انتظار کم ہوگا

بہزاد لکھنوی

مٹنے کا غم نہیں ہے بس اتنا ملال ہی
کیوں تیرا انتظار کیا ہائے کیا کیا

بیان میرٹھی

یہ آبلے نہیں نکلی ہے آنکھ ہر مو پر
ترا تو میرے سراپے نے انتظار کیا
ہنوز سنگ میں آئینہ ہے خوشا فرہاد
کہ بعد مرگ بھی شیریں کا انتظار کیا
سروں پہ داور محشر نے فرش کیں آنکھیں
تمہارے آنے کا کیا کیا نہ انتظار کیا

بیخود بدایونی

مر رہا ہوں مگر نہیں مرتا
خلش انتظار نے مارا

علی سردار جعفری

ترے ہاتھ کی بلندی میں فروغ کہکشاں ہے
یہ ہجوم ماہ و انجم ترے انتظار میں ہے

فارغ بخاری

کیا شورش جنوں ہے ذرا کم نہیں ہوا
قربت کے باوجود ترا انتظار بھی
فارغؔ خیالِ یار سے میں ہم سبو رہا
گزری ہے میکدے میں شبِ انتظار بھی

احمد راہی

لمحہ لمحہ شمار کون کرے
عمر بھر انتظار کون کرے

تلوک چند محروم

غلط کی ہجر میں حاصل مجھے قرار نہیں
اسیر یاس ہوں پابند انتظار نہیں
نصیب راحت قرب دوام ہو جس کو
وہ لذت خلش انتظار کیا جانے

جلیل مانک پوری

کمال عشق تو دیکھو وہ آ گئے لیکن
وہی ہے شوق وہی انتظار باقی ہے

جوش ملیح آبادی

مرے خدا نے مرے سب گناہ بخش دیے
کسی کا رات کو یوں میں نے انتظار کیا

حفیظ جالندھری

او بے نصیب دن کے تصور سے خوش نہ ہو
چولا بدل لیا ہے شبِ انتظار نے

حفیظ ہوشیارپوری

تمام عمر ترا انتظار ہم نے کیا
اس انتظار میں کس کس سے پیار ہم نے کیا
تلاش دوست کو اک عمر چاہیے اے دوست
کہ ایک عمر ترا انتظار ہم نے کیا

رسا چغتائی

تیرے آنے کا انتظار رہا
عمر بھر موسمِ بہار رہا

سیماب اکبر آبادی

نچلا رہا نہ سوزِ دروں انتظار میں
اس آگ نے سرنگ لگا دی مزار میں
خلوت خیالِ یار سے ہے انتظار میں
آئیں فرشتے لے کے اجازت مزار میں
ہم کو تو جاگنا ہے ترے انتظار میں
آئی ہو جس کو نیند وہ سوئے مزار میں
عمرِ دراز مانگ کے لائی تھی چار دن
دو آرزو میں کٹ گئے دو انتظار میں
او پردہ دار اب تو نکل آ کہ حشر ہے
دنیا کھڑی ہوئی ہے ترے انتظار میں

شاد عظیم آبادی

کچھ ایسا کر کہ خلد آباد تک اے شادؔ جا پہنچیں
ابھی تک راہ میں وہ کر رہے ہیں انتظار اپنا

شان الحق حقی

دیکھا ہے کس نے منہ سحر جلوہ ساز کا
سب ولولے ہیں ایک شبِ انتظار تک

شکیل بدایونی

شکست حوصلۂ ضبطِ غم مجھے منظور
چلے بھی آؤ کہ دل کب سے انتظار میں ہے

فانی بدایونی

بے خودی پہ تھا فانیؔ کچھ نہ اختیار اپنا
عمر بھر کیا ناحق ہم نے انتظار اپنا
ذرات چشمِ شوق ہیں آمادۂ نگاہ
محرومیوں کو اب بھی ترا انتظار ہے
اب کس کو اعتبار کہ تو بے وفا نہیں
اب کس کو انتظار مگر انتظار ہے
کسی نے وعدۂ صبر آزما کیا تو ہے
خدا کرے کہ مجھے تاب انتظار رہے
قدم نکال اب تو گھر سے باہر جو دم بھی سینے سے سہل نکلے
دکھا نہ اب انتظار اپنا لحد کو ہے انتظار میرا
موت کا انتظار باقی ہے
آپ کا انتظار تھا نہ رہا

احمد فراز

نہ حریف جاں نہ شریکِ غم شبِ انتظار کوئی تو ہو
کسے بزم شوق میں لائیں ہم دل بے قرار کوئی تو ہو
تو پاس بھی ہو تو دل بے قرار اپنا ہے
کہ ہم کو تیرا نہیں انتظار اپنا ہے

فراق گورکھپوری

سست پیمان و بے نیاز سہی
حسن تصویرِ انتظار بھی ہے

قتیل شفائی

ہو چکا انتظار سونے دے
اے دل بے قرار سونے دے

قیوم نظر

یہ زندگی عمر بھر کا رونا
گھبرا گئے انتظار سے ہم

کلیم عاجز

بڑی طلب تھی بڑا انتظار دیکھو تو
بہار لائی ہے کیسی بہار دیکھو تو

کیفی اعظمی

وہ پل کہ جس میں محبت جوان ہوتی ہے
اس ایک پل کا تجھے انتظار ہے کہ نہیں

مجروح سلطان پوری

جگائیں ہم سفروں کو اٹھائیں پرچم شوق
نہ جانے کب ہو سحر کون انتظار کرے

محسن احسان

گزر کچھ اور بھی آہستہ اے نگار وصال
کہ ایک عمر سے میں تیرے انتظار میں تھا
اب اک کرن بھی نہیں نیم وا دریچے میں
خوشا وہ دن کہ کوئی میرے انتظار میں تھا

محسن نقوی

کھلی زمینوں میں جب بھی سرسوں کے پھول مہکیں
تم ایسی رت میں سدا مرا انتظار کرنا
اب ایک پل کا تغافل بھی سہہ نہیں سکتے
ہم اہلِ دل کبھی عادی تھے انتظار کے بھی

ناصر کاظمی

نصیبِ عشق دل بے قرار بھی تو نہیں
بہت دنوں سے ترا انتظار بھی تو نہیں
اے شہرِ طرب کو جانے والو
کرنا مرا انتظار کچھ دیر
بے کیفی روز و شب مسلسل
سرمستی انتظار کچھ دیر
وہ کوئی اپنے سوا ہو تو اس کا شکوہ کروں
جدائی اپنی ہے اور انتظار اپنا ہے