انشاء اللہ خان انشا

پھر شام کو آئے تو کہا صبح کو یوں ہی
رہتا ہے سدا آپ پر الزام ہمارا

حیدر علی آتش

عاشق ہوں ہر طرح سے گنہ گار ہوں ترا
حاجت قصور کی نہیں الزام کے لیے

داغ دہلوی

وہ کریں عذر وفا اچھی کہی
مجھ پہ ردے رکھتے ہیں الزام کے

مصحفی غلام ہمدانی

اک تو سیپارۂ دل تم نے کیا ہے برہم
تس پہ پھر مجھ کو ہی تم دیتے ہو الزام الٹا

مصطفٰی خان شیفتہ

جس سے ہے مجھے ربط وہ ہے کون، کہاں ہے
الزام کے دینے سے تو الزام نہ ہو گا

فیض احمد فیض

ہم پر تمہاری چاہ کا الزام ہی تو ہے
دشنام تو نہیں ہے ، یہ اکرام ہی تو ہے

باقی صدیقی

چشم نظارہ پہ کیا کوئی بھی الزام نہ تھا
چاندنی رات تھی اور کوئی لبِ بام نہ تھا
کوئی تیری بات کرے
ہم پر آتا ہے الزام
کچھ لغزشوں سے کام جہاں کے سنور گئے
کچھ جراتیں حیات پر الزام بن گئیں
ترے لبوں پہ زمانے کی بات ہے باقیؔ
تجھے بھی کیا کسی الزام کی ضرورت ہے

جگر مراد آبادی

دل کے معاملات میں ناصح شکست کیا
سو بار حسن پر بھی یہ الزام آ گیا

عبدالحمید عدم

تڑپ کر میں نے توبہ توڑ ڈالی
تری رحمت پہ الزام آ رہا تھا
پڑی ہے یوں ہمیں بد نامیوں کی چاٹ عدمؔ
کہ مسکرا کے ہر الزام لیتے رہتے ہیں

قمر جلالوی

مرگِ عاشق پر تعجب اس تعجب کے نثار
مرتکب جیسے نہیں سرکار اس الزام کے
تماشہ دیکھنے کیوں جا رہے ہو خونِ ناحق کا
حنائی ہاتھ ہیں تم پر نہ کچھ الزام آ جائے
خدا کے سامنے یوں تک رہا ہے سب کے منہ قاتل
کسی پر بے خطا جیسے کوئی الزام آ جائے
ستم والوں سے پرسش ہو رہی ہے میں یہ ڈرتا ہوں
کہیں ایسا نہ ہو تم پر کوئی الزام آ جائے

عرفان صدیقی

ایسے شور کے شہر میں اتنا مدھم لہجہ
اونچا سننے والوں پر الزام نہ رکھنا

مصطفی زیدی

مت پوچھ کہ ہم ضبط کی کس راہ سے گزرے
یہ دیکھ کہ تجھ پر کوئی الزام نہ آیا

رئیس فروغؔ

شعلے کو شعلہ چاند کو چاند اور پھول کو بالکل پھول کہوں
میری آنکھیں میں تو ان کو چہرے پر الزام کہوں

احسان دانش

ادب اے جذبۂ بیباک یہ آہ و فغاں کیسی
کہ ایسی زندگی سے موت پر الزام آتا ہے

ادا جعفری

ہونٹوں پہ کبھی ان کے مرا نام ہی آئے
آئے تو سہی بر سر الزام ہی آئے

سدرشن فاکر

رونا نصیب میں ہے تو اوروں سے کیا گلہ
اپنے ہی سر لیا کوئی الزام رو پڑے

غلام محمد قاصر

چرا کے خواب وہ آنکھوں کو رہن رکھتا ہے
اور اس کے سر کوئی الزام بھی نہیں آتا