مرزا غالب

بک جاتے ہیں ہم آپ، متاعِ سخن کے ساتھ
لیکن عیار طبع خریدار دیکھ کر

امام بخش ناسخ

تو وہ یوسف ہے کہ اب منتظری میں اے جان
مثل یعقوب ہوئی چشمِ خریدار سفید
زور ہے گرمیِ بازار ترے کوچے میں
جمع ہیں تیرے خریدار ترے کوچے میں
نہیں عشق سے زرد زردار میں ہوں
اگر ہے وہ یوسف خریدار میں ہوں

انشاء اللہ خان انشا

امرد ہوئے ہیں تیرے خریدار چار پانچ
دے ایسے اور حق مجھے اغیار چار پانچ

حیدر علی آتش

زنجیر و طوق جو کہ ہے بازار دہر میں
سودا ہے اس پری کے خریدار کے لیے
جو مشتری ہے بندہ ہے اس خوش جمال کا
یوسف بنے غلام خریدار کے لیے
سیماب کی طرح سے شگفتہ ہوا مزاج
اکسیر مجھ کو میرے خریدار نے کیا
عاشق کی طرح میں جو لگا کرنے بندگی
آزاد داغ دے کے خریدار نے کیا
سایہ سا حسن کے ہمراہ ہے عشق بے باک
ساتھ یہ جنس خریدار لیے پھرتی ہے
خواہاں ترے ہر رنگ میں اے یار ہمیں تھے
یوسف تھا اگر تو تو خریدار ہمیں تھے
نعمت تھی ترے حسن کی حصہ میں ہمارے
تو کانِ ملاحت تھا خریدار ہمیں تھے

داغ دہلوی

ہاتھ آتی ہے متاعِ الفت
ہاتھ ملتے ہیں خریدار یہ کیا
نہیں ہے جنسِ وفا کی تمہیں جو قدر نہ ہو
بنیں گے کتنے خریدار دیکھتے جاؤ

مصحفی غلام ہمدانی

میاں مصحفیؔ بیچتے ہو جو دل کو
تو لاؤ خریدار پیدا ہوا ہے
ہم دل کو لیے بر سرِ بازار کھڑے ہیں
حیران تمنائے خریدار کھڑے ہیں
شیریں سخناں سب ہی شکر بیچیں ہیں لیکن
انصاف کرو جوش خریدار کدھر ہے
سودے میں جستجو کے تری اے متاعِ حسن
سر مارتے پھریں ہیں خریدار ہر طرف

مصطفٰی خان شیفتہ

کم رغبتی سے لیتے ہیں دل، ہوشیار ہیں
بڑھتا ہے مول شوقِ خریدار دیکھ کر

مرزا رفیع سودا

غمزہ ادا نگاہ تبسم ہے دل کا مول
تم بھی اگر ہو اس کے خریدار کچھ کہو

باقی صدیقی

دل جنس محبت کا خریدار نہیں ہے
پہلی سی وہ اب صورت بازار نہیں ہے
دل کے سودے میں کوئی سود نہیں
جنس ہے خام خریدار غلط
دل سے باہر ہیں خریدار ابھی
سامنے ہے بھرا بازار ابھی

جون ایلیا

وقت کو سود پہ دے اور نہ رکھ کوئی حساب
اب بھلا کیسا زیاں کوئی خریدار نہیں

عرفان صدیقی

بازار میں آئے ہیں تو کیوں مول گھٹائیں
شاید کوئی اپنا بھی خریدار نکل آئے

احسان دانش

بازار ازل یوں تو بہت گرم تھا لیکن
لے دے کے محبت کے خریدار ہمیں تھے

ادا جعفری

حیرت سے شگوفوں کی جھپکتی نہیں آنکھیں
کس آن سے کانٹوں کا خریدار چلے ہے

ظہیر کاشمیری

جس ہم نفس کو مجھ سے متاع وفا ملی
وہ ہم نفس مرا ہی خریدار بن گیا