مرزا غالب

پاتے نہیں جب راہ تو چڑھ جاتے ہیں نالے
رکتی ہے مری طبع، تو ہوتی ہے رواں اور

امام بخش ناسخ

عوض ملک جہاں ملکِ سخن ہے ناسخؔ
گو نہیں حکم رواں طبعِ رواں رکھتے ہیں

حیدر علی آتش

وطن میں اپنے اہلِ شوق کی طرح
سفر میں روز و شب ریگِ رواں ہے
ساکن ہیں جوشِ اشک سے آبِ رواں میں ہم
رہتے ہیں مثل مردم آبی جہاں میں ہم
سختی راہِ عشق سے واقف ہوئے نہ پاؤں
جوش جنوں مرے لیے تخت رواں ہوا
تو دیکھنے گیا لب دریا جو چاندنی
استادہ تجھ کو دیکھ کے آبِ رواں ہوا
اثر منزلِ مقصود نہیں دنیا میں
راہ میں قافلۂِ ریگِ رواں ہے کہ جو تھا
کوہ و صحرا و گلستاں میں پھرا کرتا ہے
متلاشی وہ ترا آبِ رواں ہے کہ جو تھا
منزل ہی دور ہے جو یہ پہنچی نہیں ہنوز
دم لینے والی راہ میں عمرِ رواں نہ تھی
چھٹیں گے زیست کے پھندے سے کس دن اے آتشؔ
جنازہ ہو گا کب اپنا رواں نہیں معلوم

شیخ ابراہیم ذوق

جو روتا کھول کر دل تنگ نائے دہر میں عاشق
تو جوئے کہکشاں میں بھی فلک پر خوں رواں ہوتا
ترے خونیں جگر کی خاک پر ہوتا اگر سبزہ
تو مژگاں کی طرح اس سے بھی پیہم خوں رواں ہوتا
رکاوٹ دل کی اس کافر کے وقت ذبح ظاہر ہے
کہ خنجر میری گردن پر ہے رک رک کر رواں ہوتا

مصحفی غلام ہمدانی

شمع کی طرح بزم گیتی میں
داغ بیٹھے ہیں اور رواں ہیں ہم
خبر پس روؤں سے تم ان کی نہ پوچھو
جو روحیں عدم کو رواں ہو گئی ہیں
ازبسکہ اس سفر میں منزل کو ہم نہ پہنچے
آوارگی نے ہم کو ریگِ رواں بنایا
خونِ جگر سے میرے گل کی شبیہ کھینچی
نالے کو میرے لے کر سروِ رواں بنایا
سیرِ مہتاب کر آئے ہم بھی
بارے اس آبِ رواں کی دولت

میر مہدی مجروح

یہ سفر دیکھیے کہاں ہو تمام
مثل ریگِ رواں رواں ہوں میں

فیض احمد فیض

شاخ پر خونِ گل رواں ہے وہی
شوخی رنگِ گلستاں ہے وہی

مرزا رفیع سودا

تجھ سے تو کسو طرح مرا کچھ نہیں چلتا
جز خون کہ آنکھوں سے شب و روز رواں ہے

باقی صدیقی

دیکھ کر صورت ساحل باقیؔ
چل دیے موجِ رواں کی صورت
تم دکھاتے اگر نہ راہ حیات
جانے کس سمت ہم رواں ہوتے
ہم ہوں کہ ہو گردِ راہ باقیؔ
منزل ہے اسی کی جو رواں ہے
آوازِ جرس ہے یا فغان ہے
کس حال میں قافلہ رواں ہے
سب کو ساحل کا پاس ہے باقیؔ
کس سے موجِ رواں کی بات کریں
خیال ناخدا پھر بھی مسلط ہے زمانے پر
اگرچہ سیلِ رواں تک ساتھ دیتا ہے
ایک قطرہ جہاں نہ ملتا تھا
ہم نے چشمے وہاں رواں دیکھے

جگر مراد آبادی

کیا تعجب کہ مری روحِ رواں تک پہنچے
پہلے کوئی مرے نغموں کی زباں تک پہنچے

شکیب جلالی

تپتے صحرا تو مری منزلِ مقصود نہ تھے
میں کہیں ہم سفر ابرِ رواں کیوں نہ ہوا
سوکھے ہوئے پتوں کے جہاں ڈھیر ملے ہیں
دیکھا تھا وہیں سیلِ رواں موسمِ گل کا

عرفان صدیقی

یہی دنیا ہے تو اس تیغِ مکافات کی دھار
ایک دن گردنِ خنجر پہ رواں دیکھئے گا
ڈبو دیا ہے تو اب اس کا کیا گلہ کیجیے
یہی بہاؤ سفینے رواں بھی رکھتا تھا
کیوں تعاقب کر رہی ہے تشنگی‘ اے تشنگی
کیا کوئی خیمہ سر آبِ رواں میرا بھی تھا
موجِ گل ہے نہ کہیں آبِ رواں ہے جاناں
ساتھ ہے کوئی تو عمر گزراں ہے جاناں
گرمیِ شوق کا صلہ دشت کی سلطنت غلط
چشمۂ خوں کا خوں بہا جوئے رواں نہیں نہیں
تیرے رک جانے سے یہ لشکر بھی پیاسا مر نہ جائے
تشنہ لب صحرا میں اے جوئے رواں میں ہی نہیں
سایہ نکلے گا جو پیکر نظر آتا ہے تمہیں
وہم ٹھہرے گا جسے سروِ رواں لکھتے ہو
پہاڑ راستہ روکے تو ان سے عرض کرو
رکے اگر کوئی جوئے رواں علیؑ سے کہو
کچھ دور تو بہتے چلے جائیں گے بھنور تک
کچھ دیر سر آبِ رواں عیش کریں گے
کیسا موسم ہے کوئی پیاس کا رشتہ بھی نہیں
میں بیاباں ہوں، نہ وہ ابرِ رواں جیسا ہے
یہاں سے پیاسوں کے خیمے تو اٹھ گئے کب کے
یہ کیوں رکی ہوئی جوئے رواں ابھی تک ہے
ساعتِ وصل بھی عمر گزراں سے کم ہے
کیا سمندر ہے کہ اک موجِ رواں سے کم ہے

مجید امجد

یہ دو ساتھی نہ جانے کب بچھڑ جائیں
مری عمرِ رواں ہے اور میں ہوں
پکارتی رہی ہنسی، بھٹک گئے ریوڑ
نئے گیاہ، نئے چشمۂ رواں کے لیے