مرزا غالب

نقشِ فریادی ہے کس کی شوخی تحریر کا
کاغذی ہے پیرہن ہر پیکرِ تصویر کا
شوق اس دشت میں دوڑائے ہے مجھ کو،کہ جہاں
جادہ غیر از نگہ دیدۂ تصویر نہیں

امام بخش ناسخ

مرض عشق میں پیٹھ اپنی یہ بستر سے لگی
نہ کبھی صفحہ سے جس شکل ہو تصویر جدا
تیری صورت سے کسی کی نہیں ملتی صورت
ہم جہاں میں تری تصویر لیے پھرتے ہیں

بہادر شاہ ظفر

ہے دل کو جو یاد آئی فلکِ پیر کسی کی
آنکھوں کے تلے پھرتی ہے تصویر کسی کی
چاہیے اس کا تصور ہی سے نقشہ کھینچنا
دیکھ کر تصویر کو تصویر پھر کھینچی تو کیا
دیکھ ٹک غور سے آئینۂِ دل کو میرے
اس میں آتا ہے نظر عالم تصویر نہ توڑ

شیخ ابراہیم ذوق

نہ کھینچو عاشق تشنہ جگر کے تیر پہلو سے
نکالے پر ہے مثل ماہی تصویر پہلو سے
مصور لیلیٰ و مجنوں کی ناکامی پہ حیراں ہیں
کبھی بیٹھا نہ مل کر پہلوئے تصویر پہلو سے

مصحفی غلام ہمدانی

اس کے کوچے میں جو دیکھے گا کرے گا مجھے یاد
اپنی صورت کی میں تصویر کیے جاتا ہوں
کی تھی جو میں مرقع عالم سے انتخاب
اے مصحفیؔ دریغ وہ تصویر کیا ہوئی
پانو میں قیس کے زنجیر بھلی لگتی ہے
یوں ہی دیوانے کی تصویر بھلی لگتی ہے

یگانہ چنگیزی

ہوش اڑ نہ جائیں صنعت بہزاد دیکھ کر
آئینہ رکھ کے سامنے تصویر دیکھنا
جم گئی گرد فنا ایسی کہ چھٹنے کی نہیں
کس غضب کا رنگ پکڑا یاسؔ کی تصویر نے
دیتی ہے وحشتِ دل پھر مجھے تعبیر بہار
جلوہ گر خواب میں رہنے لگی تصویرِ بہار
اٹھنے ہی کو ہے بیچ سے پردہ حجاب کا
محفل تمام عالم تصویر ہو نہ جائے

باقی صدیقی

کس نے کھینچی حیات کی تصویر
ہاتھ میں جام پاؤں میں زنجیر
اتنے باریک تھے نقوش حیات
بنتے بنتے بگڑ گئی تصویر

عبدالحمید عدم

جواب دینے کی عادت نہیں خدا کو اگر
تو کیا پرستش تصویر کر رہا ہوں میں

قمر جلالوی

سیکھ اب میری نظر سے حسن کی زیبائشیں
سینکڑوں رنگینیاں بھر دیں تری تصویر میں
مصور اپنی صورت مجھ سے پہچانی نہیں جاتی
میں ایسا ہو گیا ہوں یا مری تصویر بگڑی ہے

عرفان صدیقی

میں بھی اے سرخی بے نام تجھے پہچانوں
تو حنا ہے کہ لہو، پیکرِ تصویر میں آ
عکس نظارہ کرو زود پشیمانی کا
اب تمہاری یہی تصویر تمہارے لیے ہے

مجید امجد

جاؤداں قدر وں کی شمعیں بجھ گئیں تو جل اٹھی تقدیرِ دل
اب تو اس مٹی کے ہر ذی روح ذرے میں بھی ہے تصویرِ دل

عبید اللہ علیم

میں کیسے جیوں گر یہ دنیا ہر آن نئی تصویر نہ ہو
یہ آتے جاتے رنگ نہ ہوں اور لفظوں کی تنویر نہ ہو
چہرہ ہوا میں اور مری تصویر ہوئے سب
میں لفظ ہوا مجھ میں ہی زنجیر ہوئے سب

غلام محمد قاصر

آنکھ سے بچھڑے کاجل کو تحریر بنانے والے
مشکل میں پڑ جائیں گے تصویر بنانے والے
جامِ جم لایا ہے گھر گھر دنیا کے حالات
دل کی باتیں ہم تیری تصویر سے پوچھتے ہیں

حسرت موہانی

کہنے کو تو میں بھول گیا ہوں مگر اے یار
ہے خانۂ دل میں تری تصویر ابھی تک

خاطر غزنوی

فضا کا ذرہ ذرہ عشق کی تصویر تھا کل شب جہاں میں تھا
میں خود اپنی نظر میں صاحب توقیر تھا کل شب جہاں میں تھا

سیماب اکبر آبادی

وہ جب رنگ پریشانی کو خلوت گیر دیکھیں گے
تو اپنے ہر تصور میں مری تصویر دیکھیں گے
سنا ہے حسن کو دہ چند کر دیتا ہے یہ شیشہ
لگا کر اپنے دل میں آپ کی تصویر دیکھیں گے

شان الحق حقی

گو ترستا ہے ابھی تک تری تحریر کو دل
پھر بھی جانے تری تصویر کہاں سے آئی
کس طرف جاتے ہیں یارو یہ بگڑتے ہوئے نقش
یہ سنورتی ہوئی تصویر کہاں سے آئی

شکیل بدایونی

آج پھر گردشِ تقدیر پہ رونا آیا
دل کی بگڑی ہوئی تصویر پہ رونا آیا
دل کے بہلانے کی تدبیر تو ہے
تو نہیں ہے تری تصویر تو ہے

فانی بدایونی

عشق فانیؔ اس پہ اپنی یہ بساط
کھیلتی ہیں بجلیاں تصویر سے
روز ہے دردِ محبت کا نرالا انداز
روز دل میں تری تصویر بدل جاتی ہے

اختر ہوشیارپوری

رخصت رقص بھی ہے پاؤں میں زنجیر بھی ہے
سر منظر مگر اک بولتی تصویر بھی ہے

احمد فراز

منتظر کب سے تحیر ہے تری تقریر کا
بات کر تجھ پر گماں ہونے لگا تصویر کا
جس طرح بادل کا سایہ پیاس بھڑکاتا رہے
میں نے یہ عالم بھی دیکھا ہے تری تصویر کا
مسافرت میں بھی تصویر گھر کی دیکھتے ہیں
کوئی بھی خواب ہو تعبیر گھر کی دیکھتے ہیں
فراز جب کوئی نامہ وطن سے آتا ہے
تو حرف حرف میں تصویر گھر کی دیکھتے ہیں

قتیل شفائی

کچھ بھی ہو آپ کے ماحول کا معیار حیات
آپ کے ذہن میں تصویر ہماری ہو گی

کیف بھوپالی

اتنی حیا کیوں آئینے سے
یہ تو مری تصویر نہیں ہے

مجروح سلطان پوری

حادثے اور بھی گزرے تری الفت کے سوا
ہاں مجھے دیکھ مجھے اب میری تصویر نہ دیکھ

محسن احسان

کس حیرتِ آئینہ کے نخچیر ہیں دونوں
تصویر ہوا وہ کبھی تصویر ہوا میں
ترے جمال کا پرتو عزیز ہے لیکن
تری ادا تری تصویر تک نہیں پہنچی