مرزا غالب

زخم پر چھڑکیں کہاں طفلان بے پروا نمک
کیا مزا ہوتا ، اگر پتھر میں بھی ہوتا نمک

داغ دہلوی

ان آنکھوں کے قربان جاؤں جنہوں نے
ہزاروں حجابوں میں پروانہ دیکھا

مصحفی غلام ہمدانی

میرؔ کیا چیز ہے سوداؔ کیا ہے
مجھ کو ان لوگوں کی پروا کیا ہے
خدا کے واسطے کر تو ہی ساقی اس کی دل داری
کہ میرے ہاتھ سے مے ، یار بے پروا نہیں پیتا

مومن خان مومن

کیا زنجیر مجھ کو چارہ گر نے کن دنوں میں جب
عدو کی قید سے وہ شوخ بے پروا نکل آیا

مرزا رفیع سودا

اس چشم کا غمزہ جو کرے قتل دو عالم
گوشے کو نگہ کے نہیں پروا کسو کی

یگانہ چنگیزی

موت آئی آنے دیجیے پروا نہ کیجیے
منزل ہے ختم سجدۂ شکرانہ کیجیے

جون ایلیا

سوچا ہے کہ اب کار مسیحا نہ کریں گے
وہ خون بھی تھوکے گا تو پروا نہ کریں گے
نہیں دنیا کو جب پروا ہماری
تو پھر دنیا کی پروا کیوں کریں ہم
ان آنگنوں میں کتنا سکونِ و سرور تھا
آرائش نظر تری پروا کیے بغیر

مجید امجد

اس اک باڑ کے اندر سب کچھ اپنا ہے
باہر دنیا، کس کو پروا دنیا کی!

الطاف حسین حالی

کہے اگر کوئی تم کو واعظ کہ کہتے کچھ اور کرتے کچھ ہو
زمانہ کی خو ہے نکتہ چینی، کچھ اس کی پروا نہ کیجیے گا

رئیس فروغؔ

جیون بھر کی بات نہ کر
ہم ایسے بے پروا سے
ہوئی اب کے برس اک بات نئی
ترا درد نہ چمکا پروا میں
کیا رہے گا میرے خوابوں کا حساب
میں کسی آغوش بے پروا میں ہوں

ادا جعفری

کون کھلونا ٹوٹ گیا ہے
بالک بے پروا کیا جانے

ظہیر کاشمیری

بشر کو دیکھیے با ایں ہمہ ساحل پہ مرتا ہے
حباب اپنا اثاثہ سیلِ بے پروا میں رکھتے ہیں