مرزا غالب

بامیدِ نگاہِ خاص ہوں محمل کشِ حسرت
مبادا ہو عناں گیرِ تغافل لطفِ عام اس کا
ہیں اہلِ خرد کس روشِ خاص پہ نازاں؟
پابستگی رسم و رہِ عام بہت ہے

حیدر علی آتش

دل میں سوائے یار جگہ ہو نہ غیر کی
خلوت سرائے خاص نہیں عام کے لیے

داغ دہلوی

آپ ہیں اور مجمع اغیار
روز دربارِ عام ہوتا ہے
محروم کیوں‌رہوں میں جی بھر کے کیوں نہ لوں میں
دیتا ہے رزق سب کو ہے فیضِ عام تیرا
عالم کو ہے دعوی محبت
یہ خاص بھی عام ہو گئی ہے

مصحفی غلام ہمدانی

دید کرنے کو چاہئیں آنکھیں
ہر طرف جلوہ عام ہے تیرا

مصطفٰی خان شیفتہ

تقلیدِ عدو سے ہمیں ابرام نہ ہو گا
ہم خاص نہیں اور کرم عام نہ ہو گا

مومن خان مومن

جب تو چلے جنازۂِ عاشق کے ساتھ ساتھ
پھر کون وارثوں کے سنے اذن عام کو

فیض احمد فیض

کہو تو ہم بھی چلیں فیض، اب نہیں سردار
وہ فرق مرتبہ خاص و عام، کہتے ہیں
کوئی مسیحا نہ ایفائے عہد کو پہنچا
بہت تلاش پسِ قتلِ عام ہوتی رہی

جون ایلیا

آہ وہ عیش راز جاں ہائے وہ عیش راز جاں
ہائے وہ عیش راز جاں شہر میں عام ہو گیا
تیغ بازی کا شوق اپنی جگہ
آپ تو قتلِ عام کر رہے ہیں
ایک قتالہ چاہیے ہم کو
ہم یہ اعلان عام کر رہے ہیں

جگر مراد آبادی

اللہ اگر توفیق نہ دے انسان کے بس کا کام نہیں
فیضان محبت عام سہی عرفان محبت عام نہیں
یہ تو نے کہا کیا اے ناداں فیاضی قدرت عام نہیں
تو فکر و نظر تو پیدا کر کیا چیز ہے جو انعام نہیں
مجھے دے رہے ہیں تسلیاں وہ ہر ایک تازہ پیام سے
کبھی آ کے منظرِ عام پر کبھی ہٹ کے منظرِ عام سے

سراج الدین ظفر

اے سہی قد تری نسبت سے سب اونچی قدریں
باوجود روش عام ابھی باقی ہیں
اے سہی قد تری نسبت سے سب اونچی قدریں
باوجود روش عام ابھی باقی ہیں

عبدالحمید عدم

چھپ چھپ کے جو آتا ہے ابھی میری گلی میں
اک روز مرے ساتھ سرِ عام چلے گا
رقص کرتا ہوں جام پیتا ہوں
عام ملتی ہے عام پیتا ہوں

شکیب جلالی

شکیبؔ! اپنے تعارف کے لیے یہ بات کافی ہے
ہم اس سے بچ کے چلتے ہیں جو رستہ عام ہو جائے

عرفان صدیقی

انہیں سے ہو دل و جاں پر سکینیوں کا نزول
قرار ان کے ہی فیضان عام سے آئے

جمال احسانی

یہ جو لڑتا جھگڑتا ہوں سب سے
بچ رہا ہوں قبول عام سے میں

اسرار الحق مجاز

اپنی نظروں میں نشاط جلوۂ خوباں لیے
خلوتی خاص سوئے بزم عام آ ہی گیا
کہاں تک حسن بھی آخر کرے پاس روا داری
اگر یہ عشق خود ہی فرق خاص و عام رہنے دے

بہزاد لکھنوی

تمہارے حسن کی تسخیر عام ہوتی ہے
کہ اک نگاہ میں دنیا تمام ہوتی ہے
نگاہِ حسن مبارک تجھے در اندازی
کبھی کبھی مری محفل بھی عام ہوتی ہے

زہرا نگاہ

تیرا ستم ہم پہ عام دیکھیے کب تک رہے
تلخی دوراں پہ نام دیکھیے کب تک رہے
چھا گئیں تاریکیاں کھو گیا حسنِ نظر
وعدۂ دیدار عام دیکھیے کب تک رہے

تلوک چند محروم

محرومی قسمت ہے مری خاص وگرنہ
مشہور جہاں ہے کرم عام تمہارا
نظارۂ جہاں سے نہ دے دل کو داغِ رشک
عبرت کی آنکھ سے یہ تماشائے عام دیکھ

حسرت موہانی

جو وہ نظر بسر لطفِ عام ہو جائے
عجب نہیں کہ ہمارا بھی کام ہو جائے
رہین یاس رہیں اہل آرزو کب تک
کبھی تو آپ کا دربارِ عام ہو جائے

سیف الدین سیف

سنا ہے اب ترے لطف و کرم کی
حکایت عام ہوتی جا رہی ہے

شاد عظیم آبادی

تقرب جن کو ہے ان کو بھی یک گونہ ہے مایوسی
یہ حالت ہے تو پھر دیدار تیرا عام کیا ہو گا

شکیل بدایونی

غم عاشقی سے کہہ دو رہِ عام تک نہ پہنچے
مجھے خوف ہے یہ تہمت ترے نام تک نہ پہنچے
تری انجمن میں ظالم عجب اہتمام دیکھا
کہیں زندگی کی بارش کہیں قتلِ عام دیکھا
وہ نگاہِ مست اٹھی گردش میں جام آ ہی گیا
یعنی وقت امتیاز خاص و عام آ ہی گیا

فانی بدایونی

اجل مرا اتنا کام کر دے کہ کام میرا تمام کر دے
رہے کوئی زندگی کے ہاتھوں جہاں میں رسوائے عام کب تک

احمد فراز

دیکھو یہ میرے خواب تھے دیکھو یہ میرے زخم ہیں
میں نے تو سب حسابِ جاں بر سرِ عام رکھ دیا

فراق گورکھپوری

میکدے میں آج اک دنیا کو اذن عام تھا
دورِ جام بے خودی بیگانۂ ایام تھا

قتیل شفائی

گو دیکھ چکا ہوں پہلے بھی نظارہ دریا نوشی کا
ایک اور صلائے عام کہ ساقی رات گزرنے والی ہے

کلیم عاجز

کیا غم ہے اگر شکوۂ غم عام ہے پیارے
تو دل کو دکھا تیرا یہی کام ہے پیارے

مجروح سلطان پوری

سکھائیں دستِ طلب کو ادائے بیباکی
پیام زیرلبی کو صلائے عام کریں
سکھائیں دستِ طلب کو ادائے بیباکی
پیام زیرلبی کو صلائے عام کریں

ناصر کاظمی

شکوہ بہ طرزِ عام نہیں آپ سے مجھے
ناکام ہوں کہ کام نہیں آپ سے مجھے
اے منصفو حقائق و حالات سے الگ
کچھ بحثِ خاص و عام نہیں آپ سے مجھے