مرزا غالب

بہ ہر نمط غمِ دل باعثِ مسرت ہے
نموئے حیرتِ دل ہے ترے شباب کے ساتھ

امام بخش ناسخ

میں بزم شاہد و ساقی میں کیوں نہ وجد کروں
برائے زہد و ورع عالم شباب نہیں

انشاء اللہ خان انشا

ٹک اک اے نسیم سنبھال لے کہ بہار مستِ شراب ہے
وہ جو حسن عالم نشہ ہے اسے اب کی عین شباب ہے

حیدر علی آتش

چکور حسنِ مہ چار دہ کو بھول گیا
مراد پر جو ترا عالم شباب آیا

شیخ ابراہیم ذوق

وقت پیری شباب کی باتیں
ایسی ہیں جیسے خواب کی باتیں

مصحفی غلام ہمدانی

آنکھوں سے بہاریں گزریں کیا کیا
کس کس کا نہ میں شباب دیکھا

مومن خان مومن

ناکامیوں سے کام رہا عمر بھر ہمیں
پیری میں یاس ہے جو ہوس تھی شباب میں

میر مہدی مجروح

اس کی شوخی کا ہے تعجب کیا
حسن یہ کچھ اور اس پہ عین شباب

جون ایلیا

خون کر دوں ترے شباب کا میں
مجھ سا قاتل ترا شباب نہیں

جگر مراد آبادی

میری نگاہِ شوق بھی کچھ کم نہیں مگر
پھر بھی ترا شباب ترا ہی شباب ہے
ہم نہیں جانتے خزاں کیا ہے
کشتگان شباب ہیں ہم لوگ
میں بنوں کس لیے نہ مستِ شراب
کیوں مجسم کوئی شباب ہوا
حسن کافر شباب کا عالم
سر سے پا تک شراب کا عالم
ہمہ نور و سرور کی دنیا
ہمہ حسن و شباب کا عالم
برستا ہے کیف شباب محبت
ہر آنسو ہے جامِ شراب محبت
عجب جوش پر ہے شباب محبت
محبت ہے مستِ شراب محبت

سراج الدین ظفر

ہے بوئے گل کہیں کہیں رنگِ شراب ہے
ہر چیز میں شریک کسی کا شباب ہے

عبدالحمید عدم

ان کو عہدِ شباب میں دیکھا
چاندنی کو شراب میں دیکھا
کتنے بے رحم ہو عدمؔ تم بھی
ذکر عہدِ شباب کرتے ہو

قمر جلالوی

بنتا نہیں ہے حسن ستمگر شباب میں
ہوتے ہیں ابتدا ہی سے کانٹے گلاب میں
بچپن میں یہ سوال قیامت کب آئے گی
بندہ نواز آپ کے عہدِ شباب میں
ہمیں تو جو بھی گیا وہ فریب دے کہ گیا
ہوئے نہ کم سنی اپنی شباب کیا ہوتا