امام بخش ناسخ

سر رہے یا جائے کچھ ہم میکشوں کو ڈر نہیں
کون سا مینائے مے اے محتسب بے سر نہیں

انشاء اللہ خان انشا

گرچہ ہم سخت گنہ گار ہیں لیکن واللہ
دل میں جو ڈر ہے ہمیں ہے اسی ڈر کا تکیہ

بہادر شاہ ظفر

شبِ وصال میں بھی میری جان کو آرام
عزیزو دردِ جدائی کے ڈر سے کچھ نہ ہوا

شیخ ابراہیم ذوق

شعلۂِ آہ کو بجلی کی طرح چمکاؤں
پر مجھے ڈر ہے کہ وہ دیکھ کے ڈر جائیں گے

مصحفی غلام ہمدانی

رات کے رہنے کا نہ ڈر کیجیے
ایک تو شب یاں بھی سحر کیجیے
اس بت کو نہیں ہے ڈر خدا سے
بگڑی بندے سے گر خدا سے
کچھ خوب نہیں یہ خود نمائی
ہاں اے بت شوخ ڈر خدا سے
لگیں ہیں دیکھنے جب مصحفیؔ ہم اس کے کوچے میں
ٹک اک پھر کر بھی رسوائی کے ڈر سے دیکھ لیتے ہیں
مصحفیؔ اس کی گلی میں جو تو جاتا ہے سدا
اپنی بدنامی کا کچھ تجھ کو بھی ڈر ہے کہ نہیں
اے مصحفیؔ کیوں دبوں نہ اس سے
عاشق کا ہے شیوہ ڈر کے چلنا

مصطفٰیٰ خان شیفتہ

گستاخیوں کی تاب کسے اس کی بزم میں
بے باکیِ نسیم سے ہرگز نہ ڈر چراغ

مرزا رفیع سودا

رات ملا تھا مجھے تنہا رقیب
یارِ خدا کا ہی میں ڈر کر گیا

یگانہ چنگیزی

ہے جان کے ساتھ اور اک ایمان کا ڈر بھی
وہ شوخ کہیں دیکھ نہ لے مڑ کے ادھر بھی
اللہ ری بے تابی دل وصل کی شب کو
کچھ کشمکش شوق بھی کچھ صبح کا ڈر بھی
بھاری ہے مسافر پہ بہت گور کی منزل
سنتے ہیں کہ اس راہ میں ہے جان کا ڈر بھی
وہ کشمکش غم ہے کہ میں کہہ نہیں سکتا
آغاز کا افسوس اور انجام کا ڈر بھی

باقی صدیقی

کیا دورِ جہاں سے ڈر گئے ہم
کیوں تجھ سے گریز کر گئے ہم
جانے کل رنگ زندگی کیا ہو
وقت کی کروٹوں سے ڈر ساقی

جون ایلیا

مدتوں بعد گھر گیا تھا میں
جاتے ہی میں وہاں سے ڈر آیا
تم سے جاناں ملا ہوں جس دن سے
بے طرح خود سے ڈر گیا ہوں میں
اب جان کا میری جسم شل ہے
میں خود سے ہی ڈر کے تھک گیا ہوں
کتنا ڈراؤنا ہے یہ شہر نبود و بود
ایسا ڈراؤنا کہ یہاں ڈر بھی کچھ نہیں

خواجہ میر درد

کتنے بندوں کو جان سے کھویا
کچھ خدا کا بھی تو نے ڈر نہ کیا

شکیب جلالی

پیار کی جو سے گھر گھر ہے چراغاں ورنہ
اک بھی شمع نہ روشن ہو ہوا کے ڈر سے
دشمنوں پر کبھی تکیہ کرنا
اپنے سائے سے کبھی ڈر جانا

عرفان صدیقی

ہیولے رات بھر محراب و در میں پھرتے رہتے ہیں
میں سمجھا تھا کہ اپنے گھر میں ڈر ایسا نہیں ہو گا
جانے کب سے ایک سناٹا بسا ہے ذہن میں
اب کوئی ان کو پکارے گا تو ڈر جائیں گے لوگ

الطاف حسین حالی

واعظو آتش دوزخ سے جہاں کو تم نے
یہ ڈرایا ہے کہ خود بن گئے ڈر کی صورت
ڈر نہیں غیر کا جو کچھ ہے سو اپنا ڈر ہے
ہم نے جب کھائی ہے اپنے ہی سے زک کھائی ہے

جمال احسانی

اس کے ملنے ہی سے پہلے جانے کیوں
اس کو کھو دینے کا ڈر موجود ہے

رئیس فروغؔ

دریا جیسی بات نہ کر
پانی سے ڈر جاؤں گا

احسان دانش

سنتا ہوں کہ آپ کے وفادار
انجام وفا سے ڈر رہے ہیں

اسرار الحق مجاز

حسن نے شوق کے ہنگامے تو دیکھے تھے بہت
عشق کے دعوئے تقدیس سے ڈر جانا تھا

بشیر بدر

سر سے پا تک وہ گلابوں کا شجر لگتا ہے
با وضو ہو کے بھی چھوتے ہوئے ڈر لگتا ہے
مجھ میں رہتا ہے کوئی دشمن جانی میرا
خود سے تنہائی میں ملتے ہوئے ڈر لگتا ہے

ضیا جالندھری

دل آج کچھ اس طرح دھڑکتا ہے کہ جیسے
اب شوق ملاقات پہ حاوی کوئی ڈر ہے

عالم تاب تشنہ

سفر میں راہ کے آشوب سے نہ ڈر جانا
پڑے جو آگ کا دریا تو پار کر جانا

ماجد صدیقی

وہ یونہی گھرا رہتا ہجر کے حصاروں میں
اور میں کہ طوفاں تھا الجھنوں سے ڈر جاتا
میں ابھی موت سے بچ کر نکلا
موت کیسی؟ یہ مرا ڈر نکلا
تھا نہ جانے کون سے بے رحم ڈر کا سامنا
میں نہ کر پایا کبھی اپنی نظر کا سامنا

جوش ملیح آبادی

دعا ہے میری اے دل تجھ سے دنیا کوچ کر جائے
اور ایسی کچھ بنے تجھ پر کہ ارمانوں سے ڈر جائے

سید ضمیر جعفری

یوں قتلِ عام نوعِ بشر کر دیا گیا
راسخ طبیعتوں ہی میں ڈر کر دیا گیا

سیف الدین سیف

یوں میں سہما ہوا گھبرایا ہوا رہتا ہوں
جیسے ہر وقت کسی بات کا ڈر ہوتا ہے
تیری خاموشی سے دہشت ہے عیاں
تیری آواز میں ڈر بولتا ہے

شاد عظیم آبادی

دل گلہ کرتا تھا خوب اس شوخ کا
تذکرہ محشر کا سن کر ڈر گیا

شکیل بدایونی

صدق و صفائے قلب سے محروم ہے حیات
کرتے ہیں بندگی بھی جہنم کے ڈر سے ہم
غم سے کہاں اے عشق مفر ہے
رات کٹی تو صبح کا ڈر ہے
اتنے خائف ہیں مے و مہ سے جناب واعظ
نام کوثر بھی جو سنتے ہیں تو ڈر جاتے ہیں
پی شوق سے واعظ ارے کیا بات ہے ڈر کی
دوزخ ترے قبضے میں ہے جنت ترے گھر کی

اختر ہوشیارپوری

مجھے کسی سے نقب زنی کا خطر نہیں تھا
میں اختراپنے ہی جسد خاکی سے ڈر رہا تھا

احمد فراز

دل کو تری چاہت پہ بھروسا بھی بہت ہے
اور تجھ سے بچھڑ جانے کا ڈر بھی نہیں جاتا
اتنا مانوس نہ ہو خلوتِ غم سے اپنی
تو کبھی خود کو بھی دیکھے گا تو ڈر جائے گا
نشتر چبھے ہوئے تھے رگِ جاں کے آس پاس
وہ چارہ گر تھا اور مجھے ڈر بھی اسی کا تھا
بس اک نگاہ سے لٹتا ہے قافلہ دل کا
سو رہروان تمنا بھی ڈر کے دیکھتے ہیں

شاذ تمکنت

کون جانے مری تنہائی پسندی کیا ہے
بس ترے ذکر کا اندیشہ ترے نام کا ڈر
ہمہ انکسار کی کیفیت ہے دم وداع کی بے بسی
مجھے یوں پیام سکوں نہ دے تجھے اپنے آپ سے ڈر بھی ہے
تاخیر وقت دید تری برہمی کا ڈر
کتنا حسین ڈر تھا وہ ڈر کون لے گیا

کیف بھوپالی

جانِ بہار تم نے وہ کانٹے چبھوئے ہیں
میں ہر گلِ شگفتہ کو چھونے سے ڈر گیا

محسن احسان

کھینچ دو دار پہ دل داروں کو
شہریاروں کا ذرا ڈر نکلے
چھپے ہوئے تھے جو دل میں وہ ڈر پرانے تھے
کہ راستے تھے نئے ہم سفر پرانے تھے

ناصر کاظمی

یوں ترے دھیان سے لرزتا ہوں
جیسے پتے ہوا سے ڈر جائیں
دن نکلنے میں کوئی دیر نہیں
ہم نہ سو جائیں اب تو ڈر ہے یہ