انشاء اللہ خان انشا

لینے نہ دیویں گے مجھے ٹک چین جیتے جی
دشمن یہ دونو گردشِ ایام اور عشق

حیدر علی آتش

آنکھ وہ فتنۂِ دوراں کسے دکھلاتا ہے
شعبدہ جانتے ہیں گردشِ ایام کو ہم
مئے گل رنگ سے لبریز رہیں جام سفید
چشم بدبیں کو کرے گردشِ ایام سفید

داغ دہلوی

خوش ہیں وہ دورِ فلک سے آج کل
دن پھرے ہیں گردشِ ایام کے

مصحفی غلام ہمدانی

شبِ ہجراں کی سیاہی نہ ہوئی روز سفید
یہ ورق تو نے نہ اے گردشِ ایام الٹا

مصطفٰی خان شیفتہ

عمر کٹتی ہے تصور میں رخ و کاکل کے
رات دن اور ہے ، اے گردشِ ایام اپنا

مومن خان مومن

جب جانتے تاثیر کہ دشمن بھی وہاں سے
اپنی طرح اے گردشِ ایام نکلتا

فیض احمد فیض

دستِ فلک میں گردشِ تقدیر تو نہیں
دستِ فلک میں گردشِ ایام ہی تو ہے

مرزا رفیع سودا

ہے شیشۂ مے عینک پیری مجھے سوداؔ
نظارہ کن اب شیب کے ایام کا ہوں میں

باقی صدیقی

جو ہم بدلے تو کوئی بھی نہ بدلا
جو تم بدلے تو بدلا دور ایام
چپکے چپکے دل سے گزر
دیکھ نہ لے دور ایام
ہر چند وہ نگاہیں ہمارے لیے نہ تھیں
پھر بھی حریف گردشِ ایام بن گئیں
علاج تلخیِ ایام کی ضرورت ہے
فسانے ہو چکے اب کام کی ضرورت ہے

عبدالحمید عدم

خوش ہوں کہ زندگی نے کوئی کام کر دیا
مجھ کو سپرد گردشِ ایام کر دیا
تو رقص کرے گرد مرے اور میں گاؤں
یہ کھیل بھی اے گردشِ ایام چلے گا
خالی ہے ابھی جام میں کچھ سوچ رہا ہوں
اے گردشِ ایام میں کچھ سوچ رہا ہوں

قمر جلالوی

بہار ایسی کوئی اے گردشِ ایام آ جائے
بجائے صید خود صیاد زیرِ دام آ جائے
مے کدے میں جو کوئی جام بدل جاتا ہے
عالمِ گردشِ ایام بدل جاتا ہے

مجید امجد

رہ رہ کے جیالے راہیوں کو دیتا ہے یہ کون آواز
کونین کی ہنستی منڈیروں پر، تم ہو کہ غمِ ایام
تماشا ہے کہ جن کے واسطے گردش میں تھے عالم
انہیں بھی سوجھتے ہیں گردشِ ایام کے شکوے

الطاف حسین حالی

غفلت ہے کہ گھیر ے ہوئے ہے چار طرف سے
اور معرکۂ گردشِ ایام ہے درپیش

احسان دانش

کر رہا ہوں دوستوں کے زعم پر ترکِ وطن
شاید اب آغاز دور گردشِ ایام ہے

بیان میرٹھی

پائمال غم پسے جاتے ہیں سرمے کی طرح
لے اڑی کس کے قدم سے گردش ایام رقص

ظہیر کاشمیری

یوں ان کی جفاؤں سے ملی ہم کو بصیرت
ہم جھک نہ سکے گردشِ ایام کے آگے

احمد راہی

گردش جام نہیں گردش ایام تو ہے
سعیٔ ناکام سہی پھر بھی کوئی کام تو ہے

تلوک چند محروم

تم جس سے پھرو اس سے ہو برگشتہ زمانہ
دم بھرنے لگی گردشِ ایام تمہارا

سیف الدین سیف

قیامت ہے محبت رفتہ رفتہ
غمِ ایام ہوتی جا رہی ہے

سیماب اکبر آبادی

شامِ فرقت انتہائے گردشِ ایام ہے
جتنی صبحیں ہو چکی ہیں آج سب کی شام ہے

شکیل بدایونی

مجھ پہ ہی ختم ہوا سلسلۂ نوحہ گری
اس قدر گردشِ ایام پہ رونا آیا
صبح کا افسانہ کہہ کر شام سے
کھیلتا ہوں گردشِ ایام سے

فانی بدایونی

قابو ہی غمِ عشق پہ چلتا نہیں ورنہ
احسان غم گردشِ ایام نہ لیتے