انشاء اللہ خان انشا

یاں وہ آتش نفساں ہیں کہ بھریں آہ تو جھٹ
آگ دامان شفق کو بھی لگا سکتے ہیں
کالی کاغذ کی ابھی ایک کتر کر بیچا
زاہد بزم کے منہ پر تو لگا سکتے ہیں

بہادر شاہ ظفر

لگے یوں تو ہزاروں ہی تیرِ ستم کہ تڑپتے رہے پڑے خاک پہ ہم
ولے ناز و کرشمہ کی تیغِ دو دم لگی ایسی کہ تسمہ لگا نہ رہا

حیدر علی آتش

انسان خوبرو سے باقی رہے تفاوت
اس واسطے پری کو دو پر لگا دیے ہیں
وصف کمانِ ابرو جو کیجیے سو کم ہے
بے تیر بسملوں کے تودے لگا دیے ہیں
فرط شوق اس بت کے کوچہ میں لگا لے جائے گا
کعبۂِ مقصود تک مجھ کو خدا لے جائے گا
آرائشِ جمال بلا کا نزول ہے
اندھیر کر دیا جو وہ مسی لگا چکے

داغ دہلوی

غیر کو منہ لگا کے دیکھ لیا
جھوٹ سچ آزما کے دیکھ لیا
ہے یہی راہِ منزلِ مقصود
خوب رستے لگا دیا تو نے

شیخ ابراہیم ذوق

صبح رخ سے کون شام زلف میں جاتا تھا آہ
اے دل شامت زدہ شامت لگا کر لے گئی
اے پری پہلو سے میرے کیا کہوں تیری نگاہ
دل اڑا کر لے گئی یا پر لگا کر لے گئی
ذوقؔ مر جانے کا تو اپنے کوئی موقع نہ تھا
کوئے جاناں میں اجل ناحق لگا کر لے گئی

مصحفی غلام ہمدانی

سر نیاز رہا زیر پائے یاد مدام
حنا کی طرح میں قدموں سے کب لگا نہ رہا
خلوت ہو کبھو تو یوں کہے وہ
کوئی در سے لگا ہوا کھڑا ہے
تیری تصویر کو لے کر شیریں
اپنی چھاتی سے لگا رکھتی ہے
کپڑے بدل کے آئے تھے آگ مجھے لگا گئے
اپنے لباس سرخ کی مجھ کو بھڑک دکھا گئے
گرچہ نہ تھے کچھ اتنے گرم لیک دکھا ادائے شرم
دل کو لگے جو نرم نرم سخت قلق لگا گئے
کی ہم سے باغباں نے یہ کاوش کہ آخرش
ہم آشیاں کو آگ لگا کر چلے گئے
بے ادب کے تئیں مطلق نہیں صحبت کا شعور
شانہ کتنا تری زلفوں سے لگا جاتا ہے
اگر یہ نگاہیں ہیں کم بخت اپنی
تو کچھ ہم کو تہمت لگا کر رہیں گی
گرتے تھے خریدار کب اس طرح سے اس پر
پاؤں سے ترے لگتے ہی مہندی کو لگا بھاگ

مومن خان مومن

بیزار زندگانی کا جینا محال تھا
وہ بھی ہماری نعش کو ٹھوکر لگا گئے
مہندی ملے گا پانوں سے دشمن تو آن کر
کیوں میرے تفتہ سینے کو ٹھوکر لگا گیا

میر مہدی مجروح

مجروحؔ ہوئے مائل کس آفت دوراں پر
اے حضرت من تم نے دل بھی نہ لگا جانا

فیض احمد فیض

اور کیا دیکھنے کو باقی ہے
آپ سے دل لگا کے دیکھ لیا

باقی صدیقی

راہ میں شمع جلا بیٹھے ہیں
کس سے ہم آس لگا بیٹھے ہیں
باقیؔ ابھی یہ کون تھا موجِ صبا کے ساتھ
صحرا میں اک درخت لگا کر چلا گیا
دل کو آنے لگا بسنے کا خیال
آگ جب گھر کو لگا دی ہم نے

جون ایلیا

ہے تو بارے یہ عالمِ اسباب
بے سبب چیخنے لگا کیجے
میں شمعِ سحر کا نغمہ گر تھا
اب تھک کے کراہنے لگا ہوں
تمہارا ہجر منا لوں اگر اجازت ہو
میں دل کسی سے لگا لوں اگر اجازت ہو
دل جو ہے آگ لگا دوں اس کو
اور پھر خود ہی ہوا دوں اس کو

جگر مراد آبادی

آئے تھے دل کی پیاس بجھانے کے واسطے
اک آگ سی وہ اور لگا کر چلے گئے

سراج الدین ظفر

دل بھی خراب عشق ہے دل کو بھی دے سزائے شوق
اس کو بھی طور کی طرح آگ لگا کے بھول جا

عبدالحمید عدم

اٹھے نہ تاکہ آپ کی جانب نظر کوئی
جتنی بھی تہمتیں ہیں لگا دیجیے مجھے

قمر جلالوی

مجھ تشنہ لب کی ساقی تشنہ لبی بڑھا دی
دے کر ذرا سا پانی اک آگ سی لگا دی

عرفان صدیقی

غزل میں اس کو ستم گر کہا تو روٹھ گیا
چلو‘ یہ حرفِ ملامت لگا نشانے پر
وہ خدا ہے کہ صنم، ہاتھ لگاکر دیکھیں
آج اس شخص کو نزدیک بلا کر دیکھیں
دیکھتے ہیں تو لہو جیسے رگیں توڑتا ہے
ہم تو مر جائیں گے سینے سے لگا کر اس کو
خوشبو کی طرح ساتھ لگا لے گئی ہم کو
کوچے سے ترے بادِ صبا لے گئی ہم کو
کیسی آنکھیں ہیں کہ دریاؤں کو پہچانتی ہیں
کیسا دل ہے کہ سرابوں سے لگا رکھا ہے
اجنبی رستوں میں آخر دھول ہی دیتی ہے ساتھ
جانے والے اپنے دامن سے لگا لے چل مجھے
اب کے اس در سے نہ نکلا کسی امید کا چاند
شب کے سناٹے میں آواز لگا بھی آئے

اختر حسین جعفری

تشنگی کا ستارا زوالوں میں ہے آج اپنا سفر اپنے پیالوں میں ہے
رنگ اچھا لگا زہر میٹھا لگا رات ڈھلنے لگی رت بدلنے لگی

الطاف حسین حالی

یعقوب سے بشر کو دی تو نے ناصبوری
یوسف سے پارسا پر بہتان لگا کے چھوڑا
اک دسترس سے تیری حالیؔ بچا ہوا تھا
اس کے بھی دل پہ آخر چرکا لگا کے چھوڑا

رئیس فروغؔ

کس نے توڑا ہے زمیں اور قدم کا رشتہ
آج کی رات یہی کھوج لگا کر دیکھو

احسان دانش

ہم چٹانیں ہیں کوئی ریت کے ساحل تو نہیں
شوق سے شہر پناہوں میں لگا دو ہم کو

اکبر معصوم

ایک مدت سے باغ دنیا کا
اپنے دل میں لگا رہا ہوں میں

بشیر بدر

یوں ترس کھا کے نہ پوچھو احوال
تیر سینے پہ لگا ہو جیسے
ہم زمانے کے ستائے ہیں بہت
اپنے سینے سے لگا لو ہم کو

بیان میرٹھی

تمہارے جلوے غضب کے دیکھے تمہارے چھینٹے بلا کے پائے
لگا لگا دی بجھا بجھا کر بجھا بجھا دی لگا لگا کر

ضیا جالندھری

جا بجا شعلہ بیاں چرب زباں تاک میں ہیں
کوئی تجھ کو بھی نہ باتوں میں لگا کر لے جائے

عبید اللہ علیم

پلٹ سکوں ہی نہ آگے ہی بڑھ سکوں جس پر
مجھے یہ کون سے رستے لگا گیا اک شخص

فارغ بخاری

ہزار ترکِ وفا کا خیال ہو لیکن
جو روبرو ہوں تو بڑھ کر گلے لگا لینا
کسی کو چوٹ لگے اپنے دل کو خوں کرنا
زمانے بھر کے غموں کو گلے لگا لینا