حیدر علی آتش

عارف ہے وہ جو حسن کا جویا جہاں میں ہے
باہر نہیں ہے یوسف اسی کارواں میں ہے
دنیا سے کوچ کرنا ہے اک روز رہروو
بانگ جرس سے شور یہی کارواں میں ہے
جرس کے ساتھ دل رہتے ہیں نالاں
مرے یوسف کا عاشق کارواں ہے
کیا حال ہے کسی نے نہ پوچھا ہزار حیف
نالاں رہے جرس کی طرح کارواں میں ہم
آگاہ جذبِ عشق زلیخا سے تھا نہ حسن
یوسف کو چاہ میں خبر کارواں نہ تھی
رہ جانا پیچھے جسم کا جاں سے عجب نہیں
کس کارواں کی گرد پسِ کارواں نہ تھی
بانگ جرس سے آگے ہر اک کا قدم رہا
گرد اپنے کارواں کے پسِ کارواں نہ تھی
عجب کیا چھٹا روح سے جامۂِ تن
لٹے راہ میں کارواں کیسے کیسے

داغ دہلوی

ہر ہر نفس میں دل سے نکلنے لگا غبار
کیا جانے گردِ راہ یہ کس کارواں کی ہے
یہ سد راہ ہوا کس کا پاسِ رسوائی
رکے ہوئے ہیں مرے اشک کارواں کی طرح

مصحفی غلام ہمدانی

رہے جاتے ہیں پیچھے یاروں سے
گرد دنبال کارواں ہیں ہم
گر نقاب اس کے منہ سے اٹھی نہیں
شور کیوں کارواں سے اٹھتا ہے
نہ پہنچوں گے منزل کو تم مصحفیؔ
گیا دور اب کارواں بیٹھیے
کہتی تھی خلق رہ اے زلیخا
کنعاں سے چلا ہے کارواں ایک
سفر کی مجھ سے کیا کہتے ہو جاؤ
کروں کیا گر ہوا ہے کارواں جمع
صبح ہوتے خوابِ غفلت سے جو چونکے ہم تو ہائے
آنکھ کے کھلتے ہی دیکھا کارواں کوئی نہیں

مصطفٰی خان شیفتہ

پیام دوست ہوا قاصدوں کو وجہ شرف
نسیمِ مصر سے عزت ہے کارواں کے لیے
بیتُ الحزن میں نغمۂ شادی بلند ہے
نکلا ہی بابِ مصر سے ہے کارواں ہنوز
کیا وہ متاع جس کی نہ ہو کوئی گھات میں
ڈرتا ہوں میں جو دزد پسِ کارواں نہ ہو

میر مہدی مجروح

زلیخا کی مچی جاتی ہیں آنکھیں
کہیں یوسف نہ ہو اس کارواں میں

یگانہ چنگیزی

سنیں گے چھیڑ کے افسانۂ دل مرحوم
ادھر سے ملکِ عدم کا جو کارواں نکلا
تڑپ کے آبلہ پا اٹھ کھڑے ہوئے آخر
تلاش یار میں جب کوئی کارواں نکلا
اب اپنی روح ہے اور سیر عالمِ بالا
کنویں سے یوسف گم کردہ کارواں نکلا
عجیب بھول بھلیاں ہے منزلِ ہستی
بھٹکتا پھرتا ہے گم گشتہ کارواں اپنا
کدھر سے آتی ہے یوسف کی بوئے مستانہ
خراب پھرتا ہے جنگل میں کارواں اپنا
جرس نے مژدۂ منزل سنا کے چونکایا
نکل چلا تھا دبے پاؤں کارواں اپنا
سر پٹکتے ہیں عبث نقشِ قدم پر دیر سے
آبلہ پا جستجوئے کارواں کیوں کر کریں

باقی صدیقی

اداسی منزلوں کی کہہ رہی ہے
ادھر سے کوئی گزرے کارواں کیوں
راہوں پہ آج ان کا تصور بھی ہے گراں
منزل کے پاس کل جو ہمیں کارواں ملے
آپ کو کارواں سے کیا مطلب
آپ تو میرِ کارواں ٹھہرے
جوش جنوں میں زیست کے سارے نشاں جلے
منزل جلی، مقام جلے ، کارواں جلے

جون ایلیا

ہم آندھیوں کے بن میں کسی کارواں کے تھے
جانے کہاں سے آئے ہیں جانے کہاں کے تھے

عبدالحمید عدم

وہاں بہاروں کے زمزمے تھے وہاں نگاروں کے جمگھٹے تھے
وہاں ستاروں کے کارواں تھے حضور کو کچھ تو یاد ہو گا

قمر جلالوی

کدھر ڈھونڈے گا اپنے قافلے سے چھوٹنے والے
نہ گردِ کارواں ہو گی نہ شورِ کارواں ہو گا
اٹھ اٹھ کے دیکھتا ہوں کسے راہ میں غبار
کوئی شکستہ پا تو نہیں کارواں سے دور
ہم بھی انہیں کے ساتھ چلے وہ جہاں چلے
جیسے غبارِ راہ پسِ کارواں چلے
اے راہبر یقیں جو تری راہبری میں ہو
مڑ مڑ کے دیکھتا ہوا کیوں کارواں چلے
سمجھتا ہے کہ اب میں پا شکستہ اٹھ نہیں سکتا
مگر مڑ مڑ کہ تکتا جا رہا ہے کارواں پھر بھی

عرفان صدیقی

نہ ملے خبر کبھی دوستو مرے حال میرے ملال کی
تو بچھڑ کے اپنے حبیب سے پسِ کارواں اسے دیکھنا
اے ہوا‘ کل تیری راہوں پر نشاں میرا بھی تھا
کارواں میں کچھ غبارِ کارواں میرا بھی تھا
تو رہزنوں کو بھی توفیقِ خواب دے یارب
کہ دشتِ شب میں مرا کارواں ابھی تک ہے

الطاف حسین حالی

یاران تیز گام نے محمل کو جالیا
ہم محوِ نالۂ جرسِ کارواں رہے

اسرار الحق مجاز

اذن خرام لیتے ہوئے آسماں سے ہم
ہٹ کر چلے ہیں رہ گزر کارواں سے ہم

بہزاد لکھنوی

جب دل نہیں رہا تو تمنا کا کام کیا
جب کارواں نہیں تو پسِ کارواں ہیں کیوں

علی سردار جعفری

راستہ نہیں چلتے صرف خاک اڑاتے ہیں
کارواں سے بھی آگے گردِ کارواں کیوں ہے

ماجد صدیقی

کل بھی تھا ساتھ ولولوں کا ہجوم
آج بھی میرِ کارواں ہیں ہم

تلوک چند محروم

تن خاکی رہے گا ہمرہ انوار جاں کب تک
چلے گی کارواں کے ساتھ گردِ کارواں کب تک
اے راہرو قدم نہ رکھ اس پر غرور سے
یہ خاک وہ ہے جس میں کئی کارواں ملے
مری فغاں ہی سے رونق ہے میری ہستی کی
صدا جرس کی ضروری ہے کارواں کے لیے

جلیل مانک پوری

سب پھرے لے کے اپنے یوسف کو
میں پھرا گردِ کارواں لے کر

جوش ملیح آبادی

بن کے پیچھے ہے اک خفی ہلچل
گرد پا کارواں ہے کیا معلوم

حسرت موہانی

کچھ ایسی دور بھی تو نہیں منزلِ مراد
لیکن یہ جب کہ چھوٹ چلیں کارواں سے ہم

حفیظ جالندھری

سنا ہے اس طرف سے بھی جناب عشق گزریں گے
مری ہستی نہ اڑ جائے غبارِ کارواں ہو کر
سوئے منزل لیے جاتا ہے ظالم
ہمیں اس کارواں والے نے مارا

سیف الدین سیف

یہ رات یہ ٹوٹتی امیدیں
اللہ یہ کارواں ٹھہر جائے
ساتھ مثل غبار ہو لیں گے
منتظر کارواں کے ہم بھی ہیں

سیماب اکبر آبادی

ہوائے شوق کی قوت وہاں لے آئی ہے مجھ کو
جہاں منزل بھی گردِ کارواں معلوم ہوتی ہے
غمِ واماندگی سے بے نیاز ہوش بیٹھا ہوں
چلی آتی ہے آواز درائے کارواں پھر بھی

شکیل بدایونی

وفا شعار تہی دست آئے منزل پر
کہاں کہاں پہ لٹا کارواں نہیں معلوم
سمجھ رہا تھا کہ نا امیدی نہ پردہ دار امید ہو گی
نظر اٹھا کر جو میں نے دیکھا غبار تھا کارواں سے پہلے
وادیِ غربت میں یوں گم کردہ منزل تھا شکیلؔ
رہزن منزل کو خضر کارواں سمجھا تھا میں

فانی بدایونی

بتا اب اے جرس دور میں کدھر جاؤں
نشان گرد رہِ کارواں نہیں ملتا

اختر ہوشیارپوری

زمین پر ہی رہے آسماں کے ہوتے ہوئے
کہیں نہ گھر سے گئے کارواں کے ہوتے ہوئے

اکبر حمیدی

بھٹک رہا ہے اکیلا جو کوہ و صحرا میں
اس ایک آدمی کو کارواں بنانا ہے
رہ گماں سے عجب کارواں گزرتے ہیں
مری زمیں سے کئی آسماں گزرتے ہیں

فراق گورکھپوری

ایک کو ایک کی خبر منزل عشق میں نہ تھی
کوئی بھی اہل کارواں شاملِ کارواں نہ تھا
عشق تنہا سے ہوئیں آباد کتنی منزلیں
اک مسافر کارواں در کارواں بنتا گیا

قابل اجمیری

حوادث ہم سفر اپنے تلاطم ہم عناں اپنا
زمانہ لوٹ سکتا ہے تو لوٹے کارواں اپنا
ہمیں بھی دیکھ لو آثار منزل دیکھنے والو
کبھی ہم نے بھی دیکھا تھا غبارِ کارواں اپنا
نا مرادی اپنی قسمت گمرہی اپنا نصیب
کارواں کی خیر ہو ہم کارواں تک آ گئے
عالم سوزِ تمنا بے کراں کرتے چلو
ذرے ذرے کو شریکِ کارواں کرتے چلو
راستے میں بجھ نہ جائیں آرزؤں کے چراغ
ذکر منزل کارواں در کارواں کرتے چلو

مجروح سلطان پوری

میں اکیلا ہی چلا تھا جانب منزل مگر
لوگ ساتھ آتے گئے اور کارواں بنتا گیا

محسن نقوی

وصل کے شہر کی روشنی ایک تو
ہجر کے دشت میں کارواں ایک میں

ناصر کاظمی

سفر ہے اور غربت کا سفر ہے
غمِ صد کارواں دیکھا نہ جائے
شہر خلقِ خدا سے بیگانہ
کارواں میرِ کارواں سے دور
تیرے آوارگانِ غربت کو
شاملِ کارواں کرے کوئی