مرزا غالب

کہتے ہو نہ دیں گے ہم دل اگر پڑا پایا
دل کہاں کہ گم کیجیے ؟ ہم نے مدعا پایا
تجاہل پیشگی سے مدعا کیا
کہاں تک اے سراپا ناز کیا کیا؟
گر تجھ کو ہے یقینِ اجابت ، دعا نہ مانگ
یعنی، بغیر یک دلِ بے مدعا نہ مانگ
بزم میں اس کے روبرو کیوں نہ خموش بیٹھیے
اس کی تو خامشی میں بھی ہے یہی مدعا کہ یوں
میں بھی منہ میں زبان رکھتا ہوں
کاش پوچھو کہ مدعا کیا ہے
مستانہ طے کروں ہوں رہِ وادیِ خیال
تا باز گشت سے نہ رہے مدعا مجھے
کہوں جو حال تو کہتے ہو مدعا کہیے
تمہیں کہو کہ جو تم یوں کہو تو کیا کہیے ؟

داغ دہلوی

پھر نہ رکئے جو مدعا کہیے
ایک کے بعد دوسرا کہیے
آپ اب میرا منہ نہ کھلوائیں
یہ نہ کہیے کہ مدعا کہیے
میرے مطلب سے کیا غرض مطلب
آپ اپنا تو مدعا کہیے
اس تجاہل کا کیا ٹھکانا ہے
جان کر جو نہ مدعا جانے

شیخ ابراہیم ذوق

آج ان سے مدعی کچھ مدعا کہنے کو ہیں
پر نہیں معلوم کیا کہویں گے کیا کہنے کو ہیں

مصحفی غلام ہمدانی

وہ آرزو نہ رہی اور وہ مدعا نہ رہا
ہمارے آپ کے ہرگز وہ ماجرا نہ رہا
نہ ہم مفت مرتے ہیں کوئے بتاں میں
کہ مرنے سے یاں مدعا زندگی ہے

مصطفٰی خان شیفتہ

کہا کل میں نے اے سرمایۂ ناز
تلون سے ہے تم کو مدعا کیا
نہ لکھنا تھا غمِ ناکامیِ عشق
جوابِ نامۂِ بے مدعا کیا
تاثیرِ نالہ نکتۂِ بعد الوقوع ہے
یاں غیرِ رسم اور کوئی مدعا نہ تھا

مومن خان مومن

کیا جب التفات اس نے ذرا سا
پڑی ہم کو حصول مدعا کی
آہ طولِ امل ہے روز فزوں
گرچہ اک مدعا نہیں ہوتا
پوچھنا حال یار ہے منظور
میں نے ناصح کا مدعا جانا

میر مہدی مجروح

مدعی گھات ہی میں رہتے ہیں
کیوں کہ واں عرضِ مدعا کیجے

فیض احمد فیض

نہ پوچھو عہد الفت کی، بس اک خوا ب پریشاں تھا
نہ دل کو راہ پر لائے نہ دل کا مدعا سمجھے

یگانہ چنگیزی

رہے دنیا میں محکوم دلِ بے مدعا ہو کر
خوشا انجام اٹھے بھی تو محروم دعا ہو کر

باقی صدیقی

کیا بتاؤں کہ مدعا کیا ہے
دل ترے درد کے سوا کیا ہے
ہر قدم پر نیا تماشا ہو
اور دنیا کا مدعا کیا ہے

جون ایلیا

کس سے اظہار مدعا کیجے
آپ ملتے نہیں ہیں کیا کیجے
تھوک دے خون جان لے وہ اگر
عالم ترک مدعا میرا
کس طرح ترک مدعا کیجے
جب کوئی اپنا مدعا ہی نہیں
یہاں وہ کون ہے جو انتخاب غم پہ قادر ہو
جو مل جائے وہی غم دوستوں کا مدعا ہو گا

جگر مراد آبادی

وہ مجھ سے پوچھتے ہیں ایک مقصد میری ہستی کا
بتاؤں کیا کہ میرا مدعا یوں بھی ہے اور یوں بھی

سراج الدین ظفر

عشق کو کائنات کا مقصد و مدعا سمجھ
پھر ترا ظرف ہے اسے درد سمجھ دوا سمجھ

عبدالحمید عدم

میں نے سمجھا تھا میں محبت ہوں
میں نے سمجھا تھا مدعا ہوں میں
ہر محبت کی بنا ہے چاشنی
ہر لگن میں مدعا موجود ہے

عرفان صدیقی

مجھے قبول نہیں ہے یہ عرضِ حال کی شرط
کہ میں سخن بھی کروں اور مدعا بھی نہ آئے

مجید امجد

جولاں گہِ حیات انھی کی ہے ، دوستو
فتراک میں ہے جن کے دلِ مدعا شکار

احسان دانش

جس مدعائے شوق کی دریافت ہیں حضور
مایوس کر رہا ہے وہی مدعا مجھے

بہزاد لکھنوی

خدا کو ڈھونڈ رہا تھا کہیں خدا نہ ملا
زہے نصیب کہ بندے کو مدعا نہ ملا
ان سے شکوہ کیوں کروں ان سے شکایت کیا کروں
خود بڑی مشکل سے اپنا مدعا سمجھا تھا میں
اک نظر پر منحصر تھی زیست کی کل کائنات
ہر نظر کو جانِ جان مدعا سمجھا تھا میں

ماجد صدیقی

لے ہاتھ سے ہاتھ اب ملا بھی
کھل جائے گا حرفِ مدعا بھی
غزل لکھوں تو کسے اپنا مدعا مانوں
کوئی صنم بھی تو ہو میں جسے خدا مانوں

تلوک چند محروم

یہ آرزو ہے اب نہ رہے کوئی آرزو
یہ مدعا ہے اب دلِ بے مدعا ملے
جوانی جا چکی محرومؔ ذوق آرزو کیسا
تمہارے بے نیاز مدعا ہونے کا وقت آیا

جوش ملیح آبادی

اس بات کی نہیں ہے کوئی انتہا نہ پوچھ
اے مدعائے خلق مرا مدعا نہ پوچھ

حسرت موہانی

دعا میں ذکر کیوں ہو مدعا کا
کہ یہ شیوہ نہیں اہل رضا کا
وہ چپ ہو گئے مجھ سے کیا کہتے کہتے
کہ دل رہ گیا مدعا کہتے کہتے
ایک بھی ارماں نہ رہ جائے دل مایوس میں
یعنی آخر بے نیاز مدعا ہو جائیے

حفیظ جالندھری

دل سبھی کچھ زبان پر لایا
اک فقط عرضِ مدعا کے سوا
دلِ بے مدعا ہے اور میں ہوں
مگر لب پر دعا ہے اور میں ہوں

سیماب اکبر آبادی

منزل ملی مراد ملی مدعا ملا
سب کچھ مجھے ملا جو ترا نقشِ پا ملا

شاد عظیم آبادی

دیکھا تو تھا یہی سبب حسرت و الم
مجبور ہو کے ترک کیا مدعا غرض
تاثیر کو نہ آہ سے پوچھوں تو کیا کروں
کیوں خود اٹھا لیا دلِ بے مدعا کا کام

شان الحق حقی

نظر چرا گئے اظہار مدعا سے مرے
تمام لفظ جو لگتے تھے آشنا سے مرے

شکیل بدایونی

کوئی آرزو نہیں ہے کوئی مدعا نہیں ہے
ترا غم رہے سلامت مرے دل میں کیا نہیں ہے
انہیں آمادۂ مہر و وفا کرنے کا وقت آیا
بڑی مدت میں عرضِ مدعا کرنے کا وقت آیا
مظہر حسنِ طلب ہو گی نگاہِ بے طلب
مدعا یہ ہے کہ ترک مدعا کرتا ہوں میں

عزیز حامد مدنی

اس گفتگو سے یوں تو کوئی مدعا نہیں
دل کے سوا حریف کوئی دوسرا نہیں

فانی بدایونی

کارگاہ حسرت کا حشر کیا ہوا یا رب
داغِ دل پہ کیا گزری نقش مدعا ہو کر
اب اسے ناامید کیوں کہیے
دل کو توفیق مدعا ہی نہیں
دعا تو خیر دعا سے امید خیر بھی ہے
یہ مدعا ہے تو انجام مدعا معلوم

احمد فراز

نہ چاہنے پہ بھی تجھ کو خدا سے مانگ لیا
یہ حال ہے دلِ بے مدعا کے ہوتے ہوئے

امیر مینائی

اتنا بکیے کہ کچھ کہے وہ
یوں کھولیے قفل مدعا کو

فراق گورکھپوری

مٹتا بھی جا رہا ہوں پورا بھی ہو رہا ہوں
میں کس کی آرزو ہوں میں کس کا مدعا ہوں

قیوم نظر

شبنم سر نوکِ خار یعنی
لب پہ مرے حرفِ مدعا ہے
قیامت ہے کہ وہ یوں بھی ہیں نا خوش
دعا میں بھی تھا حرفِ مدعا کیا

ناصر کاظمی

کب تلک مدعا کہے کوئی
نہ سنو تم تو کیا کہے کوئی