مرزا غالب

افسوس کہ دنداں کا کیا رزق فلک نے
جن لوگوں کی تھی درخورِ عقدِ گہر انگشت
دامِ ہر موج میں ہے حلقۂِ صد کامِ نہنگ
دیکھیں کیا گزرے ہے قطرے پہ گہر ہونے تک
غالب خدا کرے کہ سوارِ سمندرِ ناز
دیکھوں علی بہادرِ عالی گہر کو میں
ترے جواہرِ طرفِ کلہ کو کیا دیکھیں
ہم اوجِ طالعِ لعل و گہر کو دیکھتے ہیں

حیدر علی آتش

گنج پنہاں ہیں تصرف میں بنی آدم کے
کان سے لعل یہ دریا سے گہر لیتا ہے
نشہ ہی میں یا الٰہی میکشوں کو موت دے
کیا گہر کی قدر جب آب گہر جاتا رہا
ہنس کر دکھائے دانت جو ہم کو تو کیا ہوا
لے لیجیے جو قیمت سلکِ گہر کھلے

شیخ ابراہیم ذوق

ہم خوب ہیں واقف ترے انداز کمر سے
یہ تار نکلتا ہے کوئی دل کے گہر سے
مرے آنسو ہمیشہ ہیں برنگ لعل غرقِ خوں
جو غوطہ آب میں تو نے گہر مارا تو کیا مارا
بقدر مایہ نہیں گر ہر اک کا رتبہ و نام
تو ہاں حباب کو دیکھیں کوئی گہر تو کہے

مصحفی غلام ہمدانی

کیا دکھاوے صفائی طبع مری
جس جگہ ہوں خذف گہر سب کے
خواہی میں روؤں لختِ جگر خواہ اشک صرف
آنکھوں میں میری لعل و گہر دونوں ایک ہیں
ہم ہیں اور خوشۂِ پرویں کا تماشا ہمہ شب
جا کے جھمکائیے یہ عقد گہر اور کہیں

مصطفٰیٰ خان شیفتہ

اب ایک اشک ہے درِ نایاب، وہ کہاں
تارِ نظر جو گریہ سے سلکِ گہر کریں
آزردہ جفائے ’’دے ‘‘ و ’’تیر‘‘ کو نہیں
یک ذرہ آب و آتشِ لعل و گہر سے فیض

فیض احمد فیض

جوہری بند کیے جاتے ہیں بازارِ سخن
ہم کسے بیچنے الماس و گہر جائیں گے

مرزا رفیع سودا

فیض ترے وصف بنا گوش کا
اپنے سخن کو تو گہر کر گیا

میر انیس

تمام خلق ہے خواہان آبرو اے رب
چھپا مجھے صدف قبر میں گہر کی طرح
تمہارے حلقہ بہ گوشوں میں ایک ہم بھی ہیں
پڑا رہے یہ سخن کان میں گہر کی طرح

باقی صدیقی

یہ زمانہ، یہ دل دیواہ
رشتہ سنگ و گہر یاد آیا
دنیا کو ہے اب کانچ کے ٹکڑوں کی ضرورت
کس کے لیے دریا سے نکالو گے گہر اب
آغوش صدف کھلی تو باقیؔ
ہم آب گہر بھی دیکھ لیں گے

شکیب جلالی

اپنا دامن بھی اب تو میسر نہیں
کتنے ارزاں ہوئے آنسوؤں کے گہر

عرفان صدیقی

سب جل گیا جو تھا ہمیں پیارا جہان میں
خوشبو نہ گل، صدف نہ گہر، کچھ نہیں بچا
مرے گم گشتگاں کو لے گئی موجِ رواں کوئی
مجھے مل جائے پھر گنجِ گہر ایسا نہیں ہو گا
اک اسمِ جاں پہ ڈال کے خاک فرامشی
اندھے صدف میں ہم نے گہر بند کر دیا
ندی سے پھول نہ گنجِ گہر نکلتا ہے
جو طشتِ موج اٹھاتا ہوں سر نکلتا ہے
آبِ رواں اسی کے اشارے سے ہے سراب
بادل کے پاس گنجِ گہر بھی اسی کا ہے
ندی کی تہہ میں اترنا تجھی سے سیکھا ہے
خزینۂ صدف بے گہر سلام تجھے
دھیرے دھیرے ختم ہونا سر کا سودا، دل کا درد
رفتہ رفتہ ہر صدف کو بے گہر کرنا مجھے

ادا جعفری

وہ تشنگی تھی کہ شبنم کو ہونٹ ترسے ہیں
وہ آب ہوں کہ مقید گہر گہر میں رہوں

علی سردار جعفری

ابرِ نیساں کی نہ برکت ہے نہ فیضان بہار
قطرے گم ہو گئے تعمیر گہر سے پہلے
سمندروں کے تلاطم نے مجھ کو پالا ہے
چمک رہا ہوں اسی واسطے گہر کی طرح
مخمل سی بچھا دیں گے قدموں کے تلے ساحل
دریا ابل آئیں گے صد موجِ گہر لے کر
گزر نہ جائے کہیں بحر و بر سے خون کی دھار
فروغ شبنم و آب و گہر کی خیر مناؤ

فارغ بخاری

ہے کوکھ کوئی صدف نہیں ہے
لازم تو نہیں گہر ہی ٹھہرے

تلوک چند محروم

جواب ابرِ نیساں تجھ کو ہم نے چشمِ تر جانا
کہ ہر اک قطرۂ اشکِ چکیدہ کو گہر جانا

جلیل مانک پوری

موتیوں سے منہ ترا بھرنا جلیلؔ
آصف عالی گہر کا کام ہے

جوش ملیح آبادی

پھر فیض عاشقی سے بہ ایں بے بضاعتی
جیب جہاں میں دولت لعل و گہر ہیں ہم
طبق زر میں لگا کر پئے نظر جاناں
آؤ پھر آبروئے لعل و گہر تازہ کریں

سیف الدین سیف

جیسے دریا میں گہر بولتا ہے
سات پردوں میں ہنر بولتا ہے

عزیز حامد مدنی

وہی ہیں آج بھی اس جسم نازنیں کے خطوط
جو شاخِ گل میں جو موجِ گہر میں ہوتے ہیں

اختر ہوشیارپوری

دریا کا سینہ چیر کے ابھرے جو سطح پر
دامن میں سنگریزے تھے اخترؔ گہر نہ تھے

احمد فراز

سنا ہے جب سے حمائل ہیں اس کی گردن میں
مزاج اور ہی لعل و گہر کے دیکھتے ہیں

امیر مینائی

غربت کدۂ دہر میں صدمے سے ہیں صدمے
اس پر بھی کبھی یاد ہمیں گہر نہیں آتا
کون کہتا ہے ملے خاک میں آنسو میرے
چھپ رہی گرد یتیمی میں گہر کی صورت
آنکھیں ملیں ہیں اشک بہا نے کے واسطے
بے کار ہے صدف جو صدف میں گہر نہ ہو

مجروح سلطان پوری

اہل تقدیر یہ ہے معجزۂ دست عمل
جو خزف میں نے اٹھایا وہ گہر ہے کہ نہیں

محسن احسان

میری تر دامنی چشم پہ یوں طنز نہ کر
میں صدف ہوں تو مرا دل ہے گہر کی صورت

محسن نقوی

میں زخم زخم ہوا جب تو مجھ پہ بھید کھلا
کہ پتھروں کو سمجھتی رہیں گہر آنکھیں
جہاں لہو کے سمندر کی حد ٹھہرتی ہے
وہیں جزیرۂ لعل و گہر بھی آتا ہے