مرزا غالب

اصلِ شہود و شاہد و مشہود ایک ہے
حیراں ہوں پھر مشاہدہ ہے کس حساب میں
کب سے ہوں، کیا بتاؤں جہانِ خراب میں
شب ہائے ہجر کو بھی رکھوں گر حساب میں

انشاء اللہ خان انشا

جھوٹے وعدے سے ان کے یاں اب تک
شکوۂِ بے حساب باقی ہے

بہادر شاہ ظفر

ستم تمہارے بہت اور دن حساب کا ایک
مجھے ہے سوچ یہ ہی کس طرح حساب ہوا
پیش ہووے گا اگر تیرے گناہوں کا حساب
تنگ ظالم عرصۂِ روزِ حساب آ جائے گا

داغ دہلوی

شمار اپنی خطاؤں کا بتا دوں
تمہیں شاید حساب آئے نہ آئے

شیخ ابراہیم ذوق

نشے میں ہوش کسے جو گنے حساب کرے
جو تجھ کو دینا ہیں بوسے بلا حساب تو دے

مصحفی غلام ہمدانی

مجھ کو بھی گنے وہ عاشقوں میں
اس بات کا سو حساب کیا ہے
کیں اس نے جفائیں بے حسابی
اک دن نہ کبھو حساب دیکھا
میں حساب بوسہ جی میں کہیں اپنے کر رہا تھا
وہ لگا مجھی سے کرنے طلب اور حساب الٹا
کرتا تھا بہت سا مجھ پہ دعویٰ
پر وقت حساب کچھ نہ نکلا

مومن خان مومن

ہے اختیار یار میں سود و زیاں مگر
فاضل تھے ہم جہاں سے قضا کے حساب میں

فیض احمد فیض

کر رہا تھا غمِ جہاں کا حساب
آج تم یاد بے حساب آئے

باقی صدیقی

غم کی بھی کوئی حد نہیں باقیؔ
جب ملے بے حساب ملتا ہے

جون ایلیا

اب کسی سے مرا حساب نہیں
میری آنکھوں میں کوئی خواب نہیں
غم ابد کا نہیں ہے آن کا ہے
اور اس کا کوئی حساب نہیں
بود پل پل کی بے حسابی ہے
کہ محاسب نہیں حساب نہیں
یادوں کا حساب رکھ رہا ہوں
سینے میں عذاب رکھ رہا ہوں
نہ رکھا ہم نے بیش و کم کا خیال
شوق کو بے حساب ہی لکھا

جگر مراد آبادی

کیوں نہ ہوتا ستم بھی بے پایاں
کرم بے حساب ہونا تھا
ستم خاص یار کی ہے قسم
کرم یار بے حساب ہوا

عبدالحمید عدم

مفلسی اور کس کو کہتے ہیں!
دولتوں کا حساب کرتے ہو
ہو چکا جو حساب ہونا تھا
اور اب کیا حساب کرتے ہو

قمر جلالوی

محشر میں ایک اشکِ ندامت نے دھو دیے
جتنے گناہ تھے مری فردِ حساب میں

عرفان صدیقی

یہ ساعتِ وصال کس جتن سے ہاتھ آئی ہے
متاعِ دست برد ہے حساب کے لیے نہیں